മുഖ്യമന്ത്രിയുടെ കുവൈറ്റ് സന്ദർശനം യുഡിഎഫ് വഞ്ചനാ ദിനമായി ആചരിക്കും

കുവൈറ്റ് സിറ്റി  : തദ്ദേശ സ്വയം ഭരണ തെരഞ്ഞെടുപ്പിന്റെ പശ്ചാത്തലത്തിൽ പ്രവാസികൾക്കിടയിൽ സർക്കാരിന്റെ പ്രതിച്ഛായ നിർമ്മിതിക്കുവേണ്ടിയുള്ള പ്രഹസനമായാണ് തിരക്കുപിടിച്ച് മുഖ്യ മന്ത്രി നടത്തുന്ന ഗൾഫ് സന്ദർശനത്തെ യു ഡി എഫ് അനുകൂല പ്രവാസി സമൂഹം കാണുന്നത്. 

പ്രവാസി വിഷയങ്ങളിൽ വാക്കുകൾ പാലിക്കാതെ നിരന്തരം പ്രവാസികളെ പറ്റിച്ചുകൊണ്ടിരിക്കുകയാണ്

പിണറായി സർക്കാർ. കോവിഡ് ലോക്കഡൗനിനെത്തുടർന്ന്  ഗൾഫിലെ വിമാനത്താവളങ്ങൾ അടച്ചിട്ട സമയത്ത് നാട്ടിലെത്തുന്ന പ്രവാസികൾക്ക് ആറുമാസം സർക്കാർ ശമ്പളം നൽകുമെന്ന വാഗ്ദാനമാണ് പിണറായി വിജയൻ പതിവായി നടത്തിയിരുന്ന സായാഹ്ന പത്രസമ്മേളനത്തിൽ നൽകിയത്. 

എന്നാൽ നിയന്ത്രണങ്ങൾ ലഘൂകരിച്ച്  വിമാനത്താവളങ്ങൾ ഭാഗികമായി തുറന്നു പ്രവാസികൾ  നാട്ടിലെത്തിത്തുടങ്ങിയതോടെ  ആറുമാസത്തെ ശമ്പളക്കാര്യം മറന്നുവെന്ന് മാത്രമല്ല; ഇവരെ രോഗവാഹകരെന്ന് പ്രചരിപ്പിച്ചു കടുത്ത മാനസിക പീഡനം ഏൽപ്പിക്കുക കൂടിയാണ്  ഭരണകൂടം ചെയ്തത്. 

ഇത്തരത്തിൽ നിർണായക ഘട്ടത്തിൽ പ്രവാസികളെ മറന്ന  മുഖ്യമന്ത്രിയുടെ കുവൈറ്റ് സന്ദർശനത്തിന്റെ പശ്ചാത്തലത്തിൽ കുവൈറ്റിലെ യുഡിഎഫ് പോഷക സംഘടനകൾ  സംയുക്തമായി നവംബർ - 6 വ്യാഴാഴ്‌ച വൈകിട്ട് 6 മണിക്ക് വഞ്ചനാദിനം ആചരിക്കുകയാണ്. 

ഫർവാനിയ കെ എം സി സി ഓഫീസിൽ നടക്കുന്ന പരിപാടിയിലേക്ക് യു ഡി എഫ് അനുകൂല പ്രവാസി സമൂഹത്തെയും മാധ്യമ പ്രവർത്തകരെയും സംഘാടകർ ക്ഷണിച്ചിട്ടുണ്ട്.