'രാഷ്ട്രീയപരമായ പകപോക്കൽ': കാഷ് പട്ടേലിനും അറ്റോർണി ജനറലിനുമെതിരെ 12 മുൻ എഫ്ബിഐ ഏജന്റുമാർ

വാഷിങ്ടൻ: 2020ലെ വംശീയ നീതി സമരങ്ങൾക്കിടെ മുട്ടുകുത്തി പ്രതിഷേധിച്ചതിന് പുറത്താക്കപ്പെട്ട 12 മുൻ എഫ്ബിഐ ഏജന്റുമാർ എഫ്ബിഐ. തലവൻ കാഷ് പട്ടേലിനും അറ്റോർണി ജനറൽ പാം ബോണ്ടിക്കും എതിരെ കേസെടുത്തു.

ഏജന്റുമാരുടെ ഭരണഘടനാപരമായ അവകാശങ്ങൾ ലംഘിച്ചുകൊണ്ട്, അവരെ അന്യായമായി പിരിച്ചുവിട്ടു എന്നാണ് പരാതി. 2020 ജൂൺ 4ന് ജോർജ് ഫ്ലോയിഡിന്റെ കൊലപാതകത്തെ തുടർന്ന് വാഷിങ്ടൻ ഡി.സി.യിൽ നടന്ന പ്രതിഷേധങ്ങൾക്കിടെ, സംഘർഷം ഒഴിവാക്കാനായിട്ടാണ് ഏജന്റുമാർ 'മുട്ടുകുത്തി' നിന്നത്.

ഏജന്റുമാർ തെറ്റൊന്നും ചെയ്തിട്ടില്ലെന്നും എഫ്ബിഐ നിയമങ്ങൾ പാലിച്ചു എന്നുമാണ് നേരത്തെ നടന്ന ആഭ്യന്തര അന്വേഷണത്തിൽ കണ്ടെത്തിയിരുന്നത്. എന്നാൽ കാഷ് പട്ടേൽ ഡയറക്ടറായ ഉടൻ തന്നെ ഈ ഏജന്റുമാരെ പിരിച്ചുവിടാൻ ശ്രമിച്ചുവെന്നും, ഇത് രാഷ്ട്രീയപരമായ പകപോക്കലാണ് എന്നും ഹർജിയിൽ ആരോപിക്കുന്നു.