ഓക്​ലഹോമയിൽ ദമ്പതികളെ മരിച്ച നിലയിൽ കണ്ടെത്തി: കൊലപാതകത്തിന് പിന്നിൽ മകൻ?; പ്രതിയ്ക്കായി തിരച്ചിൽ

ഓക്​ലഹോമ: പുഷ്മതഹാ കൗണ്ടിയിലെ ക്ലേടണിന് സമീപം ഇരട്ടക്കൊലപാതകം. പ്രതികൾക്കായി ഓക്​ലഹോമ സ്റ്റേറ്റ് ബ്യൂറോ ഓഫ് ഇൻവെസ്റ്റിഗേഷൻ തിരച്ചിൽ ഊർജിതമാക്കി. ഇക്കഴിഞ്ഞ വ്യാഴാഴ്ച വൈകിട്ട് സ്റ്റേറ്റ് ഹൈവേ 43-ലെ ഒരു വീട്ടിൽ നടത്തിയ പരിശോധനയിലാണ് പ്രായം ചെന്ന ദമ്പതികളുടെ മൃതദേഹങ്ങൾ കണ്ടെത്തിയത്. കൊലപാതകത്തിന്റേതിന് സമാനമായ പരുക്കുകളാണ് ഇരുവരുടെയും ശരീരത്തിൽ ഉണ്ടായിരുന്നത്.

കൊല്ലപ്പെട്ട ദമ്പതികളുടെ മകനായ 35-കാരനായ ജെഫ്രി സ്കോട്ട് ബേക്കറിനെയാണ് കേസിൽ പോലീസ് തിരയുന്നത്. ഇയാൾ അപകടകാരിയും ആയുധധാരിയുമാണെന്ന് പൊലീസ് വ്യക്തമാക്കി. ദമ്പതികളുടെ 2013 മോഡൽ ചാര നിറത്തിലുള്ള ഡോഡ്ജ് കാരവൻ വാഹനത്തിലാണ് ഇയാൾ രക്ഷപ്പെട്ടതെന്നാണ് കരുതുന്നത്. ബേക്കറിനെക്കുറിച്ച് എന്തെങ്കിലും വിവരം ലഭിക്കുന്നവർ tips@osbi.ok.gov എന്ന ഇമെയിൽ വിലാസത്തിലോ 1-800-522-8017 എന്ന നമ്പറിലോ ബന്ധപ്പെടണമെന്ന് അധികൃതർ അറിയിച്ചു.