യു എസിൽ ക്രോഗർ സ്റ്റോറുകളിലെ കേക്കുകൾ എഫ്ഡിഎ തിരിച്ചുവിളിച്ചു

വാഷിങ്ടൻ: ഉൽപന്നത്തിന്റെ പാക്കേജിങ്ങിൽ രേഖപ്പെടുത്താത്തതും ജീവന് ഭീഷണിയായേക്കാവുന്നതുമായ ഒരു അലർജന്റ് അടങ്ങിയതിനാൽ, വിവിധതരം കേക്കുകൾ തിരിച്ചുവിളിക്കാൻ അമേരിക്കൻ ഫുഡ് ആൻഡ് ഡ്രഗ് അഡ്മിനിസ്‌ട്രേഷൻ അടിയന്തര ഉത്തരവിറക്കി.

വെർജീനിയ ആസ്ഥാനമായുള്ള ഉക്രോപ്‌സ് ഹോംസ്റ്റൈൽ ഫുഡ്‌സ്, എൽ എൽ സി ആണ് നാല് തരം 'ഡെക്കറേറ്റഡ് പൗണ്ട് കേക്കുകൾ' തിരിച്ചുവിളിക്കുന്നത്. കാരണം, ഇവയിൽ സോയ് (Soy) എന്ന അലർജന്റ് അടങ്ങിയിരിക്കാൻ സാധ്യതയുണ്ട്. കേക്കുകൾ ഒട്ടിപ്പിടിക്കുന്നത് തടയാൻ ഉപയോഗിച്ച 'കേക്ക് റിലീസിങ് ഏജന്റി'ലാണ് സോയയുടെ സാന്നിധ്യം കണ്ടെത്തിയത്.

8-ഇഞ്ച് പൗണ്ട് കേക്ക് വിത്ത് ബട്ടർക്രീം ഐസിങ്/പിങ്ക് റോസസ്, 8-ഇഞ്ച് പൗണ്ട് കേക്ക് വിത്ത് ബട്ടർക്രീം ഐസിങ്/റെഡ് റോസസ്, 6-ഇഞ്ച് പൗണ്ട് കേക്ക് വിത്ത് ബട്ടർക്രീം ഐസിംഗ്/റെഡ് റോസസ്, 6-ഇഞ്ച് പൗണ്ട് കേക്ക് വിത്ത് ബട്ടർക്രീം ഐസിങ്/കൺഫെറ്റി. വെർജീനിയ, വെസ്റ്റ് വെർജീനിയ എന്നിവിടങ്ങളിലെ 28 ക്രോഗർ മിഡ്-അറ്റ്‌ലാന്റിക് സ്റ്റോറുകളിലും ഉക്രോപ്‌സ് മാർക്കറ്റ് ഹാളുകളിലുമാണ് ഈ കേക്കുകൾ വിറ്റഴിച്ചത്.

ഡിസംബർ 15, 2025 ബെസ്റ്റ്-ബൈ തീയതി രേഖപ്പെടുത്തിയ ഉൽപന്നങ്ങൾ മാത്രമാണ് തിരിച്ചുവിളിച്ചത്. അമേരിക്കയിൽ ഏകദേശം 20 ലക്ഷത്തോളം പേർക്ക് സോയ് അലർജിയുണ്ട്. ഈ കേക്കുകൾ കഴിക്കുന്നത് നേരിയ ചൊറിച്ചിൽ പോലുള്ള ലക്ഷണങ്ങൾക്കോ അല്ലെങ്കിൽ ജീവന് തന്നെ ഭീഷണിയായേക്കാവുന്ന അനാഫൈലാക്സിസിനോ കാരണമായേക്കാം.

തിരിച്ചുവിളിച്ച ഉൽപന്നങ്ങൾ വാങ്ങിയ ഉപഭോക്താക്കൾ ഉടൻ തന്നെ അവ തിരികെ നൽകി മുഴുവൻ തുകയും തിരികെ വാങ്ങണമെന്ന് എഫ്.ഡി.എ. നിർദേശിച്ചു. ഈ വിഷയവുമായി ബന്ധപ്പെട്ട് ഇതുവരെ ആരോഗ്യപ്രശ്നങ്ങളൊന്നും റിപ്പോർട്ട് ചെയ്യപ്പെട്ടിട്ടില്ല.