തീപിടിത്ത സാധ്യത: ആമസോണിൽ വിറ്റ 2 ലക്ഷത്തിലധികം പവർ ബാങ്കുകൾ തിരിച്ചുവിളിച്ചു

വാഷിങ്ടൻ: ആമസോൺ വഴി വിറ്റഴിച്ച 2 ലക്ഷത്തിലധികം പോർട്ടബിൾ ലിഥിയം-അയൺ ബാറ്ററി പവർ ബാങ്കുകൾ തീപിടിക്കാനും പൊള്ളലേൽക്കാനുമുള്ള സാധ്യത കണക്കിലെടുത്ത് തിരിച്ചുവിളിച്ചു. കൺസ്യൂമർ പ്രൊഡക്റ്റ് സേഫ്റ്റി കമ്മിഷനാണ് (സി പി എസ് സി) ഇക്കാര്യം അറിയിച്ചത്.

ഐ എൻ ഐ യു കമ്പനിയുടെ 10,000എം എ എച്ച് പോർട്ടബിൾ പവർ ബാങ്കുകളാണ് തിരിച്ചുവിളിച്ചത് (മോഡൽ: ബി ഐ -ബി41). കറുപ്പ് അല്ലെങ്കിൽ നീല നിറത്തിലുള്ള ഇതിന് മുൻവശത്ത് ഐ എൻ ഐ യൂ ലോഗോയും എൽഇഡി ലൈറ്റും ഉണ്ടാകും. 2021 ഓഗസ്റ്റിനും 2022 ഏപ്രിലിനും ഇടയിൽ ആമസോൺ വഴിയാണ് ഇവ വിറ്റഴിച്ചത്.

ഈ പവർ ബാങ്കുകൾ അമിതമായി ചൂടാവുകയും തീപിടിക്കുകയും ചെയ്യുന്നതായി റിപ്പോർട്ടുകളുണ്ട്. ചെറിയ പൊള്ളലുകളും സ്വത്ത് നാശനഷ്ടങ്ങളും ഉൾപ്പെടെ 15 പരാതികൾ ഇതിനോടകം ലഭിച്ചിട്ടുണ്ട്. 000ജി21, 000എച്ച്21, 000121, 000എൽ21 എന്നീ സീരിയൽ നമ്പറുകളുള്ള പവർ ബാങ്കുകൾ മാത്രമാണ് തിരിച്ചുവിളിച്ചത്.

ഈ പവർ ബാങ്കുകൾ ഉപയോഗിക്കുന്നത് ഉടൻ നിർത്തുക. പൂർണമായ റീഫണ്ടിനായി ഐ എൻ യൂ ഐ ന്റെ വെബ്സൈറ്റ് റീക്കോൾ പേജിൽ സീരിയൽ നമ്പർ പരിശോധിച്ച് റജിസ്റ്റർ ചെയ്യുക. ലിഥിയം-അയൺ ബാറ്ററികൾ സാധാരണ മാലിന്യമായി ഉപേക്ഷിക്കരുതെന്നും എച്ച് എച്ച് ഡബ്ല്യൂ (ഹൗസ്ഹോൾഡ് ഹസർഡസ് വേസ്റ്റ്) കലക്ഷൻ സെന്ററുമായി ബന്ധപ്പെട്ട് സുരക്ഷിതമായി നീക്കം ചെയ്യണമെന്നും സി പി എസ് സി നിർദേശിച്ചു.