ട്വിറ്റർ മുൻ സിഇഒ പരാഗ് അഗർവാളിന്റെ എഐ സ്റ്റാർട്ടപ്പിന് 100 മില്യൻ ഡോളർ ഫണ്ടിങ്

കലിഫോർണിയ: മുൻ ട്വിറ്റർ സിഇഒ പരാഗ് അഗർവാൾ സ്ഥാപിച്ച ആർട്ടിഫിഷ്യൽ ഇന്റലിജൻസ് (എഐ) സ്റ്റാർട്ടപ്പായ പാരലൽ വെബ് സിസ്റ്റംസ്, സീരീസ് എ ഫണ്ടിങ്ങിലൂടെ 100 മില്യൻ ഡോളർ സമാഹരിച്ചു. ഈ നിക്ഷേപത്തോടെ കമ്പനിയുടെ മൂല്യം 740 മില്യൻ ഡോളറിലെത്തി. എഐ ഏജന്റുമാർക്കായുള്ള വെബ് സെർച്ച് ഇൻഫ്രാസ്ട്രക്ചർ വികസിപ്പിക്കുന്നതിനും ഓൺലൈൻ ഉള്ളടക്ക ദാതാക്കളുമായുള്ള കരാറുകളെ പിന്തുണയ്ക്കുന്നതിനുമായാണ് പുതിയ ഫണ്ട് വിനിയോഗിക്കുക.

വെഞ്ച്വർ ക്യാപിറ്റൽ സ്ഥാപനങ്ങളായ ക്ലീനർ പെർകിൻസും ഇൻഡെക്സ് വെഞ്ചേഴ്‌സും സഹകരിച്ചാണ് ഈ ഫണ്ടിങ് സമാഹരണം. ഖോസ്ല വെഞ്ചേഴ്‌സ് ഉൾപ്പെടെയുള്ള നിലവിലുള്ള നിക്ഷേപകരും പങ്കാളികളായി.

എഐ സിസ്റ്റങ്ങൾക്ക് തത്സമയ വെബ് ഡാറ്റ ആക്‌സസ് ചെയ്യാൻ പ്രാപ്തമാക്കുന്ന ആപ്ലിക്കേഷൻ പ്രോഗ്രാമിങ് ഇന്റർഫേസുകൾ (APIs) പാരലൽ വികസിപ്പിക്കുന്നുണ്ട്. ഇത് കാലികമായ വിവരങ്ങൾ ആവശ്യമുള്ള ജോലികൾ പൂർത്തിയാക്കാൻ എഐ ഏജന്റുമാരെ അനുവദിക്കുന്നു. 

എഐ മോഡൽ ഡെവലപ്പർമാർ നൽകുന്ന നേറ്റീവ് വെബ് സെർച്ച് സവിശേഷതകളെക്കാൾ പാരലലിന്റെ സാങ്കേതികവിദ്യ മികച്ച പ്രകടനം കാഴ്ചവയ്ക്കുന്നുണ്ടെന്ന് പരാഗ് അഗർവാൾ പറ‍ഞ്ഞു. ഉൽപന്ന വികസനം ത്വരിതപ്പെടുത്തുക, ഉപഭോക്തൃ അടിത്തറ വികസിപ്പിക്കുക, കൂടാതെ പേവാളുകൾക്കും ലോഗിൻ തടസ്സങ്ങൾക്കും പിന്നിൽ വെബ് ഉള്ളടക്കം പരിമിതപ്പെടുത്തുന്നതിന്റെ വർധിച്ചുവരുന്ന വെല്ലുവിളിയെ അഭിസംബോധന ചെയ്യുക എന്നിവയാണ് പുതിയ ഫണ്ടിങ്ങിന്റെ ലക്ഷ്യങ്ങൾ.

എഐ ചാറ്റ്ബോട്ടുകൾ ഉപയോക്താക്കൾ ഓൺലൈനിൽ വിവരങ്ങൾ വീണ്ടെടുക്കുന്ന രീതി മാറ്റുന്നതിനാൽ, പ്രസാധകർക്കും സമൂഹമാധ്യമ പ്ലാറ്റ്‌ഫോമുകൾക്കും ഉള്ളടക്കത്തിലേക്കുള്ള ആക്‌സസ് പരിമിതപ്പെടുത്തേണ്ട അവസ്ഥയുണ്ട്. ഈ സാഹചര്യത്തിൽ, എഐ സിസ്റ്റങ്ങൾക്കായുള്ള പ്രവേശനക്ഷമത നിലനിർത്താൻ പ്രസാധകരെ പ്രോത്സാഹിപ്പിക്കുന്നതിനായി ഒരു ‘ഓപ്പൺ മാർക്കറ്റ് സംവിധാനം’ സൃഷ്ടിക്കാൻ പാരലൽ പദ്ധതിയിടുന്നുണ്ടെന്നും പരാഗ് അഗർവാൾ വ്യക്തമാക്കി.