വീടുകളുടെ മൂല്യം കുറയ്ക്കാനാവില്ല; യുഎസിൽ ഭവനവില ഉയർത്താൻ ട്രംപിന്റെ പുതിയ നീക്കം

വാഷിങ്‌ടൻ ഡി സി: വീടുകളുടെ വില കുറയ്ക്കുന്നതിലല്ല, മറിച്ച് വില വർധിപ്പിക്കുന്നതിലാണ് തനിക്ക് താല്‌പര്യമെന്ന് അമേരിക്കൻ പ്രസിഡന്റ് ഡോണൾഡ് ട്രംപ്. ജനുവരി 29 ന് നടന്ന കാബിനറ്റ് യോഗത്തിലാണ് ഭവനവില സംബന്ധിച്ച തന്റെ നിലപാട് അദ്ദേഹം വ്യക്തമാക്കിയത്.

നിലവിൽ വീടുള്ളവരുടെ സമ്പത്ത് സംരക്ഷിക്കുന്നതിനായി ഭവനവില ഉയർന്നുതന്നെ ഇരിക്കണമെന്നാണ് ആഗ്രഹിക്കുന്നതെന്ന് ട്രംപ് പറഞ്ഞു. വില കുറയ്ക്കുന്നത് നിലവിലെ ഉടമകളുടെ ആസ്തി മൂല്യം ഇല്ലാതാക്കുമെന്നും അദ്ദേഹം കൂട്ടിച്ചേർത്തു.

വീടുകളുടെ വില കൂടുമ്പോഴും സാധാരണക്കാർക്ക് അത് വാങ്ങാൻ കഴിയുന്ന രീതിയിൽ ബാങ്ക് പലിശ നിരക്കുകൾ കുറയ്ക്കാനാണ് ഭരണകൂടം ലക്ഷ്യമിടുന്നത്. ഇതിനായി ഫെഡറൽ റിസർവ് മേധാവിയായി പുതിയൊരാളെ ഉടൻ നാമനിർദേശം ചെയ്യും.

വൻകിട കോർപ്പറേറ്റ് നിക്ഷേപകർ വീടുകൾ കൂട്ടത്തോടെ വാങ്ങുന്നത് തടയാൻ ജനുവരി 20ന് ട്രംപ് ഉത്തരവിട്ടിരുന്നു.

വീടുകൾ കോർപ്പറേറ്റുകൾക്കുള്ളതല്ല, സാധാരണക്കാർക്ക് താമസിക്കാനുള്ളതാണെന്ന് അദ്ദേഹം വ്യക്തമാക്കി.

നിലവിലെ ഫെഡറൽ റിസർവ് ചെയർമാൻ ജെറോം പവൽ പലിശ നിരക്ക് കുറയ്ക്കാൻ തയാറാകാത്തതിനെ ട്രംപ് രൂക്ഷമായി വിമർശിച്ചു. അടുത്തയാഴ്‌ച പുതിയ ചെയർമാനെ പ്രഖ്യാപിക്കുമെന്നാണ് റിപ്പോർട്ടുകൾ. സാധാരണക്കാർക്ക് വീട് വാങ്ങുന്നത് എളുപ്പമാക്കുമെന്നും എന്നാൽ അത് നിലവിലെ ഉടമകളെ ദരിദ്രരാക്കിക്കൊണ്ടാകില്ലെന്നും ട്രംപ് ഉറപ്പുനൽകി.