'ഇന്ത്യൻ വംശജനായ ഒരാൾ എങ്ങനെ ഇന്ത്യക്കാരെ വെറുക്കും?' ട്രംപിന്റെ മകന് മറുപടിയുമായി മെഹ്ദി ഹസൻ

വാഷിങ്ടൻ ഡി.സി: ന്യൂയോർക്ക് സിറ്റി മേയർ-ഇലക്ട് സോഹ്റാൻ മംദാനിക്കെതിരെ യുഎസ് പ്രസിഡന്റ് ഡോണൾഡ് ട്രംപിന്റെ മകൻ എറിക് ട്രംപ് ഉന്നയിച്ച 'ഇന്ത്യാ വിരുദ്ധ', 'ജൂത വിരുദ്ധ' ആരോപണങ്ങളെ ബ്രിട്ടിഷ്-അമേരിക്കൻ പത്രപ്രവർത്തകൻ മെഹ്ദി ഹസൻ രൂക്ഷമായി വിമർശിച്ചു. ഒരു അഭിമുഖത്തിൽ, 34-കാരനായ ഡെമോക്രാറ്റിനെ എറിക് ട്രംപ് 'ഇന്ത്യൻ ജനതയെ വെറുക്കുന്നയാൾ' എന്നും 'സോഷ്യലിസ്റ്റ് കമ്മ്യൂണിസ്റ്റ്' എന്നും വിശേഷിപ്പിച്ചു. ഇന്ത്യൻ, ജൂത സമൂഹങ്ങളോട് മംദാനിക്ക് ശത്രുതയുണ്ടെന്നും അദ്ദേഹം ആരോപിച്ചിരുന്നു.

ഇതിനോട് പ്രതികരിച്ച് മെഹ്ദി ഹസൻ എക്‌സിൽ കുറിച്ചത് ഇങ്ങനെയാണ്: 'സോഹ്റാൻ മംദാനി ഒരു ഇന്ത്യൻ പൗരനാണ്'. ഇന്ത്യൻ വംശജനായ ഒരാൾ എങ്ങനെ ഇന്ത്യക്കാരെ വെറുക്കുമെന്ന എറിക് ട്രംപിന്റെ വാദത്തെ ഹസൻ ചോദ്യം ചെയ്തു.

ഇന്ത്യൻ ചലച്ചിത്ര സംവിധായിക മീരാ നായരുടെ മകനാണ് മംദാനി. ഈ മാസം ന്യൂയോർക്ക് സിറ്റി മേയർ തിരഞ്ഞെടുപ്പിൽ വിജയിച്ച അദ്ദേഹം നഗരത്തിലെ ആദ്യത്തെ മുസ്‌ലിം മേയറും ഒരു നൂറ്റാണ്ടിനിടയിലെ ഏറ്റവും പ്രായം കുറഞ്ഞ നേതാവുമായി ജനുവരി 1ന് സ്ഥാനമേൽക്കും.