ഐസ് റെയ്ഡ്: 79-കാരനായ യുഎസ് പൗരനു പരുക്ക്, $50 മില്യൺ നഷ്ടപരിഹാരം തേടി ക്ലെയിം ഫയൽ ചെയ്തു

യു.എസ്. പൗരനായ 79-കാരനെ ഐസ് (ഇമിഗ്രേഷൻ ആൻഡ് കസ്റ്റംസ് എൻഫോഴ്സസ്മെന്റ്) ഏജന്റുമാർ തന്റെ ബിസിനസ് സ്ഥാപനത്തിൽ വച്ച് തറയിലേക്ക് ബലമായി തള്ളിയിട്ട് പരുക്കേൽപ്പിച്ചു എന്ന് പരാതി.

ഇതിനെ തുടർന്ന് ഇദ്ദേഹം ഫെഡറൽ ഏജൻസികളിൽ നിന്ന് $50 മില്യൺ (ഏകദേശം 417 കോടിയിലധികം രൂപ) നഷ്ടപരിഹാരം തേടി അഡ്മിനിസ്ട്രേറ്റീവ് ക്ലെയി ഫയൽ ചെയ്തു.

ലോസ് ആഞ്ചലസിലെ വാൻ നൈസിലുള്ള കാർ വാഷ് ഉടമയായ റഫീ ഓല്ല ഷൗഹെദ് ആണ് പരാതി നൽകിയത്.

സെപ്റ്റംബർ 9-ന് നടന്ന റെയ്ഡിനിടെ തനിക്ക് ഒന്നിലധികം വാരിയെല്ലുകൾക്ക് പൊട്ടലും കൈമുട്ടിന് പരിക്കുകളും മസ്തിഷ്ക ക്ഷതവും സംഭവിച്ചതായി അദ്ദേഹത്തിന്റെ അഭിഭാഷകർ ഫയൽ ചെയ്ത‌ ഫെഡറൽ ടോർട്ട് ക്ലെയിമിൽ പറയുന്നു.

മാസ്ക് ധരിച്ചെത്തിയ ഐ സി ഇ, ബോർഡർ പട്രോൾ ഏജൻ്റുമാർ കാർ വാഷിൽ റെയ്ഡ് നടത്തുകയായിരുന്നു. ഈ സമയം, തന്റെ ജീവനക്കാരുടെ വർക്ക് ഓതറൈസേഷൻ രേഖകൾ ഏജന്റുമാർക്ക് കൈമാറാൻ ശ്രമിച്ചപ്പോഴാണ് ഷൗഹെദിനെ അസഭ്യം പറയുകയും ബലപ്രയോഗത്തിലൂടെ തറയിലേക്ക് വലിച്ചിടുകയും ചെയ്തതെന്ന് ക്ലെയിമിൽ പറയുന്നു. തുടർന്ന് മൂന്ന് ഏജന്റുമാർ ചേർന്ന് ഇദ്ദേഹത്തെ നിലത്ത് അമർത്തിപ്പിടിക്കുകയും ഒരാൾ കഴുത്തിൽ കാൽമുട്ട് വെക്കുകയും ചെയ്തതായും ആരോപിക്കുന്നു.

"നിങ്ങൾ ഐ സി ഇയുമായി കുഴപ്പമുണ്ടാക്കരുത്. ഞങ്ങൾ ഇവിടെയുണ്ട്," എന്നാണ് താൻ സഹായം വാഗ്ദാനം ചെയ്തപ്പോൾ ഏജന്റുമാർ പ്രതികരിച്ചതെന്നും ക്ലെയിമിൽ പറയുന്നു.

പരിക്കേറ്റ ഷൗഹെദിനെ മെട്രോപൊളിറ്റൻ ഡിറ്റൻഷൻ സെന്ററിൽ എത്തിച്ചതിന് ശേഷം യുഎസ് പൗരനാണെന്ന് തിരിച്ചറിഞ്ഞിട്ടും ഏകദേശം 12 മണിക്കൂറോളം വൈദ്യസഹായം നൽകാതെ തടഞ്ഞു വച്ചു എന്നും ക്ലെയിം ആരോപിക്കുന്നു.

ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റിക്കും അതിന്റെ ഉപ ഏജൻസികൾക്കുമെതിരെയാണ് ക്ലെയിം ഫയൽ ചെയ്തിരിക്കുന്നത്. ആക്രമണം, ബാറ്ററി, പൗരാവകാശ ലംഘനം, ഗുരുതരമായ ആരോഗ്യപ്രശ്നങ്ങളോടുള്ള മനഃപൂർവമായ അവഗണന എന്നിവ ക്ലെയിമിൽ ഉൾപ്പെടുന്നു. അമിതമായ ബലപ്രയോഗത്തെ അംഗീകരിക്കുന്ന നയങ്ങളാണ് ഏജൻസികൾ നിലനിർത്തുന്നതെന്നും ക്ലെയിം ആരോപിക്കുന്നു.

"ഒരു കുറ്റവും ചെയ്യാത്ത 79 വയസ്സുള്ള ഒരു അമേരിക്കൻ പൗരനോട് സ്വന്തം സ്ഥാപനത്തിൽ വെച്ച് നടന്നത് അതിക്രമകരവും നിയമവിരുദ്ധവുമായ നടപടിയാണ്. ഒരു മുതിർന്ന അമേരിക്കൻ പൗരന് ഇത് സംഭവിക്കാമെങ്കിൽ, ആർക്കും ഇത് സംഭവിക്കാം," ഷൗഹെദിന്റെ അഭിഭാഷകൻ വി. ജെയിംസ് ഡിസിമോൺ പറഞ്ഞു.

ഈ സംഭവത്തിന് ശേഷം ഭയം കാരണം ജീവനക്കാർ ജോലിക്ക് വരാത്തതിനെ തുടർന്ന് ഷൗഹെദ് തന്റെ സ്ഥാപനം താൽക്കാലികമായി അടച്ചുപൂട്ടി. ഫെഡറൽ അധികൃതർ ഇതുവരെ ഈ ക്ലെയിമിനോട് പ്രതികരിച്ചിട്ടില്ല.