ഡാലസിൽ വൻ കാർഗോ മോഷണസംഘം പിടിയിൽ; 5 പേർ അറസ്റ്റിൽ; ഒരു മില്യൻ ഡോളർ സാധനങ്ങൾ കണ്ടെടുത്തു

ഡാലസ്: യുഎസിൽ പ്രധാന കാർഗോ മോഷണസംഘത്തെ പിടികൂടുകയും ഏകദേശം 1 മില്യൻ ഡോളർ (ഏകദേശം 8.3 കോടിയിലധികം രൂപ) വിലമതിക്കുന്ന മോഷണമുതലുകൾ കണ്ടെടുക്കുകയും ചെയ്ത് ഡാലസ് പൊലീസ്. സംഭവവുമായി ബന്ധപ്പെട്ട് അഞ്ച് പേർ അറസ്റ്റിലായി. നവംബർ 1ന്, മോഷ്ടിക്കപ്പെട്ട ഒരു ട്രെയിലർ ഒരു റിപ്പയർ ഷോപ്പിലേക്ക് കൊണ്ടുപോകുന്നത് ശ്രദ്ധയിൽപ്പെട്ടതിനെത്തുടർന്നാണ് സൗത്ത് സെൻട്രൽ ക്രൈം റിഡക്ഷൻ ടീം (സി ആർ ടി) അന്വേഷണം ആരംഭിച്ചത്.

ട്രെയിലർ ഡ്രൈവറെയും മറ്റ് രണ്ട് പേരെയും ആദ്യം കസ്റ്റഡിയിലെടുത്തു. തുടർന്നുള്ള അന്വേഷണത്തിൽ റിപ്പയർ ഷോപ്പിന്റെ ഉടമയും മാനേജരും മോഷണത്തിൽ പങ്കാളികളാണെന്ന് കണ്ടെത്തി. കടയിൽ നടത്തിയ പരിശോധനയിൽ 2022 മുതൽ ഡാലസ്-ഫോർട്ട് വർത്ത് മേഖലയിലെ (ഡ് എഫ് ഡബ്ല്യൂ) കുറഞ്ഞത് 10 മോഷണക്കേസുകളുമായി ബന്ധമുള്ള ടയറുകൾ, റിമ്മുകൾ, വാഹനങ്ങൾ, വീട്ടുപകരണങ്ങൾ എന്നിവയുൾപ്പെടെ ഒരു ദശലക്ഷം ഡോളർ മൂല്യമുള്ള സാധനങ്ങൾ കണ്ടെടുത്തു. അറസ്റ്റിലായ അഞ്ച് പേർക്കെതിരെ 300,000 ഡോളറിൽ കൂടുതലുള്ള വസ്തുക്കളുടെ മോഷണം ഉൾപ്പെടെയുള്ള ഗുരുതരമായ കുറ്റങ്ങളാണ് ചുമത്തിയിരിക്കുന്നത്.