യുഎസ് സന്ദർശകരുടെ സമൂഹമാധ്യമം പരിശോധിക്കാൻ പദ്ധതി: 5 വർഷത്തെ വിവരങ്ങൾ നൽകണം

വാഷിങ്ടൻ ഡി സി: വീസ ആവശ്യമില്ലാത്ത രാജ്യങ്ങളിൽ നിന്നുള്ളവർ ഉൾപ്പെടെ യുഎസിലേക്ക് വരുന്ന വിനോദസഞ്ചാരികളുടെ സോഷ്യൽ മീഡിയ വിവരങ്ങൾ കർശനമായി പരിശോധിക്കാൻ യുഎസ് കസ്റ്റംസ് ആൻഡ് ബോർഡർ പ്രൊട്ടക്ഷൻ (സി ബി പി) പദ്ധതിയിടുന്നതായി റിപ്പോർട്ട്.

വീസ ഒഴിവാക്കൽ പ്രോഗ്രാമിൽ (വിസ വൈവർ പ്രോഗ്രാം) ഉൾപ്പെടുന്ന ബ്രിട്ടൻ, ഫ്രാൻസ്, ജർമനി, ദക്ഷിണ കൊറിയ തുടങ്ങിയ 42 രാജ്യങ്ങളിലെ പൗരന്മാരെയാണ് ഈ മാറ്റം പ്രധാനമായും ബാധിക്കുക. അപേക്ഷകർ കഴിഞ്ഞ അഞ്ച് വർഷത്തെ സോഷ്യൽ മീഡിയ വിവരങ്ങൾ നിർബന്ധമായും നൽകണം. കൂടാതെ, കഴിഞ്ഞ പത്ത് വർഷത്തെ ഇമെയിൽ വിലാസങ്ങൾ, മാതാപിതാക്കൾ, പങ്കാളി, സഹോദരങ്ങൾ, മക്കൾ എന്നിവരുടെ പേര്, ജനന തീയതി തുടങ്ങിയ വിശദമായ വ്യക്തിഗത വിവരങ്ങളും സമർപ്പിക്കേണ്ടി വരും.

നിലവിൽ 2016 മുതൽ സോഷ്യൽ മീഡിയ വിവരങ്ങൾ നൽകുന്നത് ഓപ്ഷനലാണ്. വിവരശേഖരണം വർധിപ്പിക്കുന്നത് യാത്രക്കാർക്ക് അംഗീകാരം ലഭിക്കാൻ കൂടുതൽ സമയമെടുക്കാനും, വ്യക്തിഗത സ്വകാര്യതയ്ക്ക് ഭീഷണിയാകാനും സാധ്യതയുണ്ടെന്ന് ഡിജിറ്റൽ അവകാശ ഗ്രൂപ്പുകൾ ഉൾപ്പെടെയുള്ളവർ മുന്നറിയിപ്പ് നൽകുന്നു.