വൈറ്റ് ഹൗസിന് സമീപം വെടിവയ്പ്: 'ആശങ്കയുള്ള രാജ്യങ്ങളിലെ' ഗ്രീൻ കാർഡുകൾ കർശനമായി പുനഃപരിശോധിക്കാൻ ട്രംപ് ഭരണകൂടം

വാഷിങ്ടൻ: വാഷിങ്ടനിൽ രണ്ട് നാഷനൽ ഗാർഡ് അംഗങ്ങൾക്ക് വെടിയേറ്റ സംഭവത്തെത്തുടർന്ന്, 'രാജ്യത്തിന് ആശങ്കയുള്ള' രാജ്യങ്ങളിൽ നിന്നുള്ള എല്ലാ കുടിയേറ്റക്കാരുടെയും ഗ്രീൻ കാർഡുകൾ പൂർണമായി, കർശനമായി പുനഃപരിശോധിക്കാൻ ട്രംപ് ഭരണകൂടം ഉത്തരവിട്ടു. ബുധനാഴ്ച വൈറ്റ്‌ഹൗസിന് സമീപം നടന്ന വെടിവയ്പ്പിൽ വെസ്റ്റ് വെർജീനിയ നാഷനൽ ഗാർഡിലെ ആർമി സ്‌പെഷ്യലിസ്റ്റ് സാറാ ബെക്‌സ്‌ട്രോം, എയർഫോഴ്‌സ് സ്റ്റാഫ് സർജന്റ് ആൻഡ്രൂ വോൾഫ് എന്നിവർക്ക് ഗുരുതരമായി പരുക്കേറ്റു.

സംഭവത്തെ തുടർന്ന് അഫ്ഗാൻ പൗരനായ റഹ്മാനുള്ള ലകൻവാൾ ആണ് അറസ്റ്റിലായത്. 2021ൽ 'ഓപ്പറേഷൻ അല്ലൈസ് വെൽക്കം' എന്ന ബൈഡൻ കാലഘട്ടത്തിലെ പ്രോഗ്രാമിലൂടെയാണ് ഇയാൾ യുഎസിൽ എത്തിയത്. ഇയാളുടെ അഭയ അപേക്ഷ ഈ വർഷം ട്രംപ് ഭരണകാലത്ത് അനുവദിച്ചതാണ്. ലകൻവാൾ സിഐഎയുമായി അഫ്ഗാനിസ്ഥാനിൽ സഹകരിച്ച് പ്രവർത്തിച്ചിരുന്നതായി സ്ഥിരീകരിച്ചിട്ടുണ്ട്.

പ്രസിഡന്റ് ട്രംപിന്റെ നിർദ്ദേശപ്രകാരമാണ് യുഎസ് പൗരത്വ-കുടിയേറ്റ സേവന വിഭാഗം ഈ ഉത്തരവിറക്കിയത്. അഫ്ഗാനിസ്ഥാൻ, ക്യൂബ, ഹെയ്തി, ഇറാൻ, സോമാലിയ, ലിബിയ, സുഡാൻ, യെമൻ, വെനിസ്വേല ഉൾപ്പെടെ 19 രാജ്യങ്ങളാണ് "രാജ്യത്തിന് ആശങ്കയുള്ള" ലിസ്റ്റിൽ ഉള്ളതെന്ന് അധികൃതർ സൂചിപ്പിച്ചു. ബൈഡൻ ഭരണകൂടത്തിൽ അംഗീകരിച്ച എല്ലാ അഭയ കേസുകളും ഡിപ്പാർട്ട്‌മെന്റ് ഓഫ് ഹോംലാൻഡ് സെക്യൂരിറ്റി (ഡി എച്ച് എ) ഇപ്പോൾ അവലോകനം ചെയ്യുന്നുണ്ട്. അഫ്ഗാൻ പൗരന്മാരിൽ നിന്നുള്ള എല്ലാ കുടിയേറ്റ അപേക്ഷകളും താൽക്കാലികമായി നിർത്തിവച്ചിട്ടുണ്ട്.