ട്രംപിന്റെ 'എക്സിക്യൂട്ടീവ് പ്രിവിലേജ്' നീക്കം: തെളിവുകൾ പുറത്തുവിടുന്നത് തടഞ്ഞ് പ്രസിഡന്റ്

വാഷിങ്ടൻ ഡി സി: 2021 ജനുവരി 6-ന് ക്യാപ്പിറ്റളിൽ നടന്ന കലാപത്തിൽ ട്രംപിന് പങ്കുണ്ടെന്ന് ആരോപിച്ച് പൊലീസ് ഉദ്യോഗസ്ഥർ നൽകിയ കേസിൽ തെളിവുകൾ പുറത്തുവിടുന്നത് തടയാൻ പ്രസിഡന്റ് ഡോണൾഡ് ട്രംപ് എക്സിക്യൂട്ടീവ് പ്രിവിലേജ് ഉപയോഗിച്ചു. കലാപത്തിൽ പരുക്കേറ്റ പൊലീസ് ഉദ്യോഗസ്ഥരാണ് ട്രംപിനെതിരെ കോടതിയെ സമീപിച്ചത്. കലാപത്തിന് പ്രേരിപ്പിച്ചത് ട്രംപിന്റെ പ്രസംഗങ്ങളാണെന്ന് ഇവർ ആരോപിക്കുന്നു.

കേസിൽ ആവശ്യപ്പെട്ട രേഖകൾ പ്രസിഡന്റുമായുള്ള ആശയവിനിമയങ്ങളോ സ്റ്റാഫ് അംഗങ്ങൾ തമ്മിലുള്ള സംഭാഷണങ്ങളോ ആണ്. ഇവ ഭരണഘടനാപരമായി സംരക്ഷിക്കപ്പെടേണ്ടവയാണെന്ന് വൈറ്റ് ഹൗസ് വക്താവ് അറിയിച്ചു. നാഷനൽ ആർക്കൈവ്‌സിൽ സൂക്ഷിച്ചിട്ടുള്ള ചില രേഖകൾ നൽകുന്നത് തടയാനാണ് ട്രംപ് തീരുമാനിച്ചത്. 2020-ലെ തിരഞ്ഞെടുപ്പ് അട്ടിമറിക്കാനുള്ള ശ്രമങ്ങളെ ന്യായീകരിക്കുന്നതിന്റെ ഭാഗമായാണ് ട്രംപിന്റെ ഈ നീക്കമെന്ന് നിരീക്ഷകർ വിലയിരുത്തുന്നു. കേസിൽ ശിക്ഷിക്കപ്പെട്ട 1,500-ൽ അധികം ആളുകൾക്ക് ട്രംപ് മാപ്പ് നൽകുകയും ചെയ്തിരുന്നു.