യുഎസ് വീസ വൈകുന്നു: വിദേശയാത്ര ഒഴിവാക്കാൻ ജീവനക്കാർക്ക് ഗൂഗിളിന്റെ നിർദേശം

വാഷിങ്ടൻ ഡി സി: അമേരിക്കൻ എംബസികളിൽ വീസ സ്റ്റാംപിങ്ങിന് നേരിടുന്ന കനത്ത കാലതാമസം കണക്കിലെടുത്ത്, അനാവശ്യമായ വിദേശയാത്രകൾ ഒഴിവാക്കാൻ ഗൂഗിൾ തങ്ങളുടെ ജീവനക്കാർക്ക് കർശന നിർദേശം നൽകി. അമേരിക്കൻ എംബസികളിലും കോൺസുലേറ്റുകളിലും വീസ സ്റ്റാംപിങ്ങിനായുള്ള അപ്പോയിന്റ്‌മെന്റുകൾ ലഭിക്കാൻ 12 മാസം വരെ (ഒരു വർഷം) കാത്തിരിക്കേണ്ടി വരുന്ന സാഹചര്യമാണുള്ളത്.

വീസ അപേക്ഷകരുടെ സോഷ്യൽ മീഡിയ അക്കൗണ്ടുകൾ ഉൾപ്പെടെയുള്ളവ സൂക്ഷ്മമായി പരിശോധിക്കുന്ന (ഇംഹാൻസ്ഡ് സോഷ്യൽ മീഡിയ സ്ക്രീനിംഗ്) പുതിയ നിയമം വന്നതോടെയാണ് നടപടികൾ വൈകുന്നത്. എച്ച്1ബി വീസയിലുള്ളവർ, അവരുടെ കുടുംബാംഗങ്ങൾ (എച്ച്4), വിദ്യാർഥികൾ (എഫ്, ജെ, എം വീസകൾ) എന്നിവരെയാണ് ഈ പ്രതിസന്ധി പ്രധാനമായും ബാധിക്കുന്നത്.

വീസ സ്റ്റാംപിങ്ങിനായി വിദേശത്തേക്ക് പോകുന്നവർ അപ്പോയിന്റ്‌മെന്റ് ലഭിക്കാതെ മാസങ്ങളോളം അവിടെ കുടുങ്ങിപ്പോകാൻ സാധ്യതയുണ്ടെന്ന് ഗൂഗിളിന്റെ ഇമിഗ്രേഷൻ വിഭാഗം മുന്നറിയിപ്പ് നൽകുന്നു. ഗൂഗിളിന് പുറമെ ആപ്പിൾ, മൈക്രോസോഫ്റ്റ് തുടങ്ങിയ കമ്പനികളും തങ്ങളുടെ ജീവനക്കാർക്ക് സമാനമായ നിർദേശങ്ങൾ നൽകിയിട്ടുണ്ട്.