44 വർഷമായി യുഎസിൽ കഴിയുന്ന സ്ത്രീ നാടുകടത്തൽ ഭീഷണിയിൽ; പ്രതിഷേധം ശക്തം

കലിഫോർണിയ: 44 വർഷമായി അമേരിക്കയിൽ സ്ഥിരതാമസമാക്കിയ സിതി എന്ന 59-കാരിയെ ഐസിഇ ഉദ്യോഗസ്ഥർ അറസ്റ്റ് ചെയ്ത സംഭവത്തെ തുടർന്ന് ദക്ഷിണ കലിഫോർണിയയിൽ പ്രതിഷേധം. പതിവ് ഇമിഗ്രേഷൻ പരിശോധനയ്ക്കിടെയാണ് 8 പേരക്കുട്ടികളുടെ മുത്തശ്ശിയായ ഇവരെ കസ്റ്റഡിയിലെടുത്തത്.

1981-ൽ കംബോഡിയയിൽ നിന്നാണ് സിതി അമേരിക്കയിൽ അഭയാർഥിയായി എത്തിയത്. നിലവിൽ അഡെലാന്റോയിലെ തടങ്കൽ കേന്ദ്രത്തിൽ കഴിയുന്ന സിതി കടുത്ത മാനസിക സമ്മർദ്ദത്തിലാണെന്നും അവിടുത്തെ സാഹചര്യങ്ങൾ മോശമാണെന്നും മനുഷ്യാവകാശ പ്രവർത്തകർ ആരോപിക്കുന്നു.

ഇവരെ ഉടൻ മോചിപ്പിക്കണമെന്ന് ആവശ്യപ്പെട്ട് അഭിഭാഷകർ കോടതിയിൽ ഹർജി നൽകിയിട്ടുണ്ട്. അമേരിക്കയിലെ ഏഷ്യൻ-അമേരിക്കൻ സംഘടനകൾ സിതിയുടെ മോചനത്തിനായി ശക്തമായി രംഗത്തുണ്ട്.