‘കഴുത്തറക്കും’; ലണ്ടനിൽ ഇന്ത്യൻ പ്രതിഷേധക്കാർക്കെതിരെ ഭീഷണി ആംഗ്യവുമായി പാക് നയതന്ത്രജ്ഞൻ

പഹൽഗാം ഭീകരാക്രമണത്തിനെതിരെ ലണ്ടനിലെ പാകിസ്താൻ ഹൈകമ്മീഷന് മുൻപിൽ പ്രതിഷേധം നടത്തിയ ഇന്ത്യക്കാർക്ക് നേരെ ഭീഷണി ആംഗ്യവുമായി പാകിസ്താൻ നയതന്ത്രജ്ഞൻ.

യുകെയിലെ പാകിസ്താൻ മിഷനിലെ എയർ ആൻഡ് ആർമി അറ്റാഷെയും പാകിസ്ഥാൻ ആർമി കേണലുമായ തൈമൂർ റാഹത്താണ് പ്രതിഷേധക്കാർക്ക് നേരെ കഴുത്തറക്കുന്ന ആംഗ്യം കാണിച്ചത്. ഈ സംഭവം ഇരു വിഭാഗങ്ങൾക്കുമിടയിൽ വലിയ സംഘർഷത്തിന് ഇടയാക്കി. ജമ്മു കശ്മീരിലെ പഹൽഗാമിൽ പാകിസ്ഥാൻ പിന്തുണയുള്ള ഭീകരർ 26 പേരെ കൊലപ്പെടുത്തിയതിലുള്ള പ്രതിഷേധം അറിയിക്കാനാണ് ആളുകൾ അവിടെ ഒത്തുകൂടിയത്.

ഇന്ത്യൻ വ്യോമസേന ഗ്രൂപ്പ് ക്യാപ്റ്റൻ അഭിനന്ദൻ വർത്തമാന്റെ ചിത്രം ഉയർത്തിപ്പിടിച്ചുകൊണ്ട് തൈമൂർ റാഹത്ത് നടത്തിയ ഈ പ്രവൃത്തി സോഷ്യൽ മീഡിയയിൽ വ്യാപകമായി പ്രചരിക്കുകയും ലോകമെമ്പാടുമുള്ള ആളുകൾ ഇതിനെതിരെ രൂക്ഷമായ വിമർശനം ഉന്നയിക്കുകയും ചെയ്തു. നയതന്ത്ര ഉദ്യോഗസ്ഥന്റെ ഈ പെരുമാറ്റം അങ്ങേയറ്റം പ്രകോപനപരമാണെന്ന് ലണ്ടനിലെ ഇന്ത്യൻ പ്രതിഷേധക്കാർ പ്രതികരിച്ചു. 2019 ൽ നിയന്ത്രണ രേഖ കടന്ന് പോയതിനെ തുടർന്ന് ക്യാപ്റ്റൻ അഭിനന്ദനെ പാകിസ്ഥാൻ സൈന്യം പിടികൂടുകയും പിന്നീട് വ്യാപകമായ പ്രചാരണത്തോടെ രണ്ടു ദിവസത്തിന് ശേഷം വിട്ടയക്കുകയും ചെയ്തിരുന്നു.

കൂടാതെ, പ്രതിഷേധം നടക്കുന്നതിനിടെ പാകിസ്ഥാൻ ഹൈക്കമ്മീഷണർ ഉച്ചത്തിൽ ആഘോഷ സംഗീതം പ്ലേ ചെയ്തതും വിവാദമായി. ഇത് മുറിവിൽ ഉപ്പ് തേക്കുന്നതിന് തുല്യമാണെന്നും പ്രതിഷേധക്കാർ ആരോപിച്ചു. ഈ സംഭവങ്ങളെത്തുടർന്ന് ഇരു രാജ്യങ്ങളുടെയും നയതന്ത്ര തലത്തിൽ കൂടുതൽ പ്രശ്നങ്ങൾക്ക് സാധ്യതയുണ്ടെന്നാണ് വിലയിരുത്തൽ.