യു കെയിൽ ട്രെയിൻ ഡ്രൈവർമാർ പണിമുടക്ക്‌ പ്രഖ്യാപിച്ചു; ശമ്പള വർദ്ധനവ് ആവശ്യപ്പെട്ടുള്ള സമരം ജനുവരി 30 - മുതൽ ഫെബ്രുവരി 5 - വരെ; ട്രെയിൻ ഗതാഗതം സ്തംഭിക്കും

ലണ്ടൻ: ട്രെയിൻ ഡ്രൈവർമാർ ASLEF യൂണിയന്റെ നേതൃത്വത്തിൽ ജനുവരി 30 ചൊവ്വാഴ്ച മുതൽ ഫെബ്രുവരി 5 തിങ്കളാഴ്ച പണിമുടക്കിന് ആഹ്വാനം നൽകി. പണിമുടക്ക് ദിവസങ്ങളിൽ അധിക സമയ ജോലി ചെയ്യാൻ ഡ്രൈവർമാർ വിസമ്മതിക്കും.

ഇത് റെയിൽ നെറ്റ്‌വർക്കിന്റെ പ്രവർത്തനങ്ങളെ സാരമായി ബാധിക്കുമെന്നതിനാൽ ട്രെയിൻ ഗതാഗതം വൻ തോതിൽ തടസപ്പെടും. അത്യാവശ്യമെങ്കിൽ മാത്രമേ പണിമുടക്ക് ദിവസങ്ങളിൽ യാത്രകൾ നടത്താവൂ എന്നും കൃത്യമായ വിവരങ്ങൾ അന്വേഷിച്ചറിഞ്ഞതിനു ശേഷമേ യാത്രക്ക് ഒരുങ്ങാവൂ എന്നും യൂണിയൻ പ്രതിനിധികൾ അറിയിച്ചു.

ശമ്പള വർദ്ധനവ് ആണ് ജീവനക്കാരുടെ പ്രധാന ആവശ്യം.2019 മുതൽ ട്രെയിൻ ഡ്രൈവർമാർക്ക് ശമ്പള വർദ്ധനവ് ഉണ്ടായിട്ടില്ലെന്ന് യൂണിയൻ അവകാശപ്പെടുന്നു.

 "ചർച്ചകൾക്ക് തങ്ങൾ സർക്കാരിന് എല്ലാ അവസരങ്ങളും നൽകിയിട്ടുണ്ടെന്നും എന്നാൽ, കഴിഞ്ഞ ഒരു വർഷമായി തങ്ങളുമായി ഗതാഗത വകുപ്പ്  ബന്ധപ്പെട്ടിട്ടില്ല എന്നുമാണ് ASLEF ജനറൽ സെക്രട്ടറി മിക്ക് വീലൻ പറയുന്നത്.

"പല അംഗങ്ങൾക്കും അര പതിറ്റാണ്ടായി ശമ്പളത്തിൽ ഒരു പൈസ പോലും വർധിച്ചിട്ടില്ല, ഈ സമയത്ത് പണപ്പെരുപ്പം കുതിച്ചുയർന്നു, അതോടൊപ്പം ജീവിതച്ചെലവും. പാൻഡെമിക് സമയത്ത്, ഞങ്ങൾ ജോലി ചെയ്തപ്പോൾ വർദ്ധനവ് ആവശ്യപ്പെട്ടില്ല.

ലോക്ക്ഡൗൺ കാലത്ത് പ്രധാന തൊഴിലാളികൾ എന്ന നിലയിൽ, ചരക്കുകൾ നീക്കുന്നതിനും എൻഎച്എസ് ജീവനക്കാരെയും മറ്റ് തൊഴിലാളികളെയും ജോലിയിൽ എത്തിക്കുന്നതിനും, ഞങ്ങളുടെ ജീവൻ പണയപ്പെടുത്തി ഞങ്ങൾ ജോലി ചെയ്തു" മിക്ക് കൂട്ടിച്ചേർത്തു. തർക്കം അവസാനിപ്പിക്കുന്നതിനുള്ള ചർച്ചകൾക്ക് മുന്നോട്ട് വരണമെന്ന് അദ്ദേഹം സർക്കാരിനോട് അഭ്യർത്ഥിച്ചു.