വിസ അപേക്ഷ നിരസിച്ചാല്‍ കാശ് പോകുമോ?

ജോലി, ഉന്നത വിദ്യാഭ്യാസം എന്നിവയ്ക്കായി വിദേശ രാജ്യങ്ങളിലേക്ക് പോകുന്നവര്‍ നേരിടുന്ന വലിയ പ്രശ്നമാണ് വിസ അപേക്ഷ നിരസിക്കല്‍. പല കാരണങ്ങള്‍ കൊണ്ടും വിസ നിരസിക്കപ്പെടാറുണ്ട്. വേണ്ടത്ര രേഖകള്‍ നല്‍കാത്തതും തെറ്റായ വിസയ്ക്കു വേണ്ടി അപേക്ഷിക്കുന്നതും വേണ്ടത്ര സാമ്പത്തിക സുരക്ഷാ രേഖകള്‍ ഇല്ലാത്തതുമെല്ലാം വിസ നിരസിക്കാന്‍ മതിയായ കാരണങ്ങളാണ്. വിസ അപേക്ഷ വിജയകരമായി സമര്‍പ്പിച്ചതു കൊണ്ട് വിസ ഉറപ്പാക്കാന്‍ സാധിക്കില്ലെന്ന് ചുരുക്കം.

ഏതെങ്കിലും കാരണവശാല്‍ വിസ അപേക്ഷ നിരസിക്കപ്പെട്ടാല്‍ അതിനായി നല്‍കിയ ഫീസ് തിരികെ ലഭിക്കാറില്ല. ഭൂരിഭാഗം രാജ്യങ്ങളും ഇക്കാര്യത്തില്‍ സമാനമായ നയമാണ് പിന്തുടരുന്നത്. കാരണം വിസ ഫീയില്‍ ഉള്‍പ്പെടുത്തിയിരിക്കുന്നത് നടപടികള്‍ പൂര്‍ത്തിയാക്കുന്നതിനുള്ള ഫീസ് മാത്രമാണ്. പ്രീമിയം സര്‍വീസിനായി നല്‍കിയിരുന്ന ചെറിയ തുക തിരികെ ലഭിക്കാന്‍ സാധ്യതയുണ്ടെന്നൊഴിച്ചാല്‍ വിസ ഫീ ഒരിക്കലും പൂര്‍ണമായും റീഫണ്ട് ചെയ്യാറില്ല.

ഒരിക്കല്‍ വിസ നിരസിക്കപ്പെട്ടാല്‍ അടുത്ത തവണ അപേക്ഷ നല്‍കുമ്പോള്‍ ഇക്കാര്യം പരിശോധിക്കപ്പെടും. എന്നാല്‍ മുന്‍പ് ചെയ്ത തെറ്റുകള്‍ തിരുത്തി അപേക്ഷ പൂര്‍ണമായി സമര്‍പ്പിച്ചാല്‍ വിസ നിരസിക്കപ്പെടില്ല. എംബസിയുടെ നിര്‍ദേശങ്ങള്‍ പിന്തുടരുകയെന്നതാണ് വിസ തള്ളാതിരിക്കാന്‍ ആദ്യമായി ചെയ്യേണ്ടത്. എല്ലാ രേഖകളുടെയും നിരവധി പകര്‍പ്പുകള്‍ സൂക്ഷിക്കുക, അഭിമുഖത്തിന് നല്ല രീതിയില്‍ തയാറെടുത്ത് വ്യക്തമായി ഉത്തരങ്ങള്‍ പറയുക, അവസാന നിമിഷത്തിനു വേണ്ടി കാത്തിരിക്കാതെ പരമാവധി നേരത്തേ അപേക്ഷ സമര്‍പ്പിക്കുക എന്നിവയെല്ലാം വിസ ലഭിക്കാന്‍ ഫലപ്രദമാണ്.