/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/abygacxY5pgpMkgsg0Ae.jpg)
ജിദ്ദ: വധശിക്ഷയിൽ നിന്ന് രക്ഷപ്പെട്ടെങ്കിലും സൗദിയിലെ ജയിൽ തന്നെ തുടരുന്ന മലയാളിയുടെ മോചനത്തിന് സാധ്യത തെളിയുന്നു.
റിയാദിലെ ജയിലില്‍ കഴിയുന്ന കോഴിക്കോട് സ്വദേശി അബ്ദുള്‍ റഹീമിന്റെ മോചനത്തിനുള്ള നീക്കങ്ങൾക്കാണ് പ്രതീക്ഷ മുളച്ചിരിക്കുന്നത്.
ഒരു സൗദി ബാലന്റെ മരണത്തെ തുടര്‍ന്ന് പ്രതിക്രിയ എന്നോണം വധശിക്ഷാ വിധി ലഭിച്ച അബ്ദുള്‍ റഹീമിന് ദിയാധനത്തിന് പകരം കൊല്ലപ്പെട്ട ഇരയുടെ കുടുംബം മാപ്പ് നൽകുകയായിരുന്നു.
ഇതോടെ വധശിക്ഷ റദ്ദാക്കപ്പെട്ടെങ്കിലും റിയാദിലെ അപ്പീൽ കോടതി പബ്ലിക് റൈറ്റ് പ്രകാരം അബ്ദുൾറഹീം കുറ്റാക്കാരനാണെന്ന് കണ്ടെത്തുകയും ഇരുപത് വര്‍ഷത്തെ ജയിൽ ശിക്ഷ വിധിക്കുകയുമായിരുന്നു.
സുപ്രീംകോടതി ശരിവെക്കുകയും ചെയ്ത അപ്പീൽ കോടതി വിധി പ്രകാരം ജയിലിൽ കഴിഞ്ഞ കാലം പരിഗണിക്കുമെന്നും പറഞ്ഞിരുന്നു.
ഇത് പ്രകാരം ഇരുപത് കൊല്ലം പൂർത്തിയാകാൻ ആറ് മാസം ഇനിയും അവശേഷിക്കവേയാണ് കാലാവധിയ്ക്ക് മുമ്പ് തന്നെ അബ്ദുൽറഹീമിന് മോചനത്തിന് വഴി തെളിയുന്നത്. വിധിപ്രകാരം ശിക്ഷാ കാലയളവായ 20 വര്‍ഷം 2026 മെയ് 20നാണ് പൂര്‍ത്തിയാവുക.
മോചന നടപടികളുടെ ഭാഗമായി കേസ് ഫയല്‍ ഇതിനകം തന്നെ ഗവര്‍ണറേറ്റില്‍നിന്ന് ബന്ധപ്പെട്ട വകുപ്പുകളിലേക്ക് നീങ്ങിയതായാണ് വിവരം.
ഇക്കാര്യം അബ്ദുൽറഹീമിന്റെ അഭിഭാഷകരും പവര്‍ ഓഫ് അറ്റോര്‍ണി സിദ്ദീഖ് തുവൂറം ഇന്ത്യന്‍ എംബസിയും സ്ഥിരീകരിച്ചതായി സൗദിയിലെ അബ്ദുള്‍ റഹീം നിയമ സഹായ സമിതി ചെയര്‍മാന്‍ സി പി മുസ്തഫ, ജനറല്‍ കണ്‍വീനര്‍ അബ്ദുല്ല വല്ലാഞ്ചിറ, ട്രഷറര്‍ സെബിന്‍ ഇഖ്ബാല്‍ എന്നിവര്‍ അറിയിച്ചു.
19 വര്‍ഷത്തിലധികം ജയില്‍ശിക്ഷ പൂര്‍ത്തിയാക്കിയ അബ്ദുള്‍ റഹീമിന് അവശേഷിക്കുന്ന ശിക്ഷാകാലയളവിന്മേല്‍ ഇളവ് നല്‍കി മാപ്പ് ലഭിക്കാനുള്ള നിരന്തര ശ്രമത്തിലാണ് സഹായ സമിതി.
ഏകദേശം 35 കോടിയോളം രൂപ ദിയാ ധനമായി നല്‍കുകയും ദീര്‍ഘകാലത്തെ ജയില്‍ശിക്ഷ അനുഭവിക്കുകയും ചെയ്ത സാഹചര്യത്തില്‍ ശിക്ഷയില്‍ ഇളവ് നല്‍കുന്നത് പരിഗണിക്കണമെന്ന് അഭിഭാഷകര്‍ മുഖേന നിയമസഹായ സമിതി റിയാദ് ഗവര്‍ണര്‍ക്ക് അപേക്ഷ സമര്‍പ്പിച്ചിരുന്നു.
ഇക്കാര്യത്തിലുള്ള പുരോഗതി അന്വേഷിക്കുന്നതിനിടയിലാണ് ഗവര്‍ണറേറ്റിലെ നടപടികള്‍ പൂര്‍ത്തിയായി കേസ് ഫയൽ മറ്റു വകുപ്പുകളിലേക്ക് നീങ്ങിയതായുള്ള വിവരം ലഭിച്ചത്.
ഭീമമായ ദിയാധനം ശേഖരിക്കാൻ മലയാളി സമൂഹം നടത്തിയ ചരിത്രം കുറിച്ച യത്നത്തിലൂടെ ലഭിച്ചത് ലക്‌ഷ്യം കവിഞ്ഞ സംഖ്യയായിരുന്നു.