ജിദ്ദ: കിഴക്കൻ സൗദിയിലെ വ്യവസായ നഗരമായ ജുബൈലിന് സമീപം ഉണ്ടായ റോഡപകടത്തിൽ ഒരു ഇന്ത്യൻ പ്രവാസി മരണപ്പെട്ടു. പഞ്ചാബ്, ലുധിയാന സ്വദേശിയും ഹർജിന്ദർ സിംഗ് - ബൽജിന്ദർ കൗർ ദമ്പതികളുടെ മകനുമായ ഹർദീപ് സിങ് ഡോദരിയ (33) ആണ് മരിച്ചത്.
ഭാര്യ: ബൽജിത് കൗർ. മക്കൾ: യുവരാജ് സിങ്, ജപ്നൂർ കൗർ.
ഹർദീപ് സഞ്ചരിച്ചിരുന്ന മെഴ്സിഡസ് ട്രക്ക് ഒരു വശത്തേക്ക് മറിയുകയും അദ്ദേഹം സംഭവ സ്ഥലത്ത് വെച്ച് തന്നെ മരിക്കുകയുമായിരുന്നു. പുതിയ ജുബൈൽ - റിയാദ് റോഡിലാണ് സംഭവം. സുഹൃത്ത് ഹർയാന്ദർ സിങ് ഭട്ട് ആണ് ട്രക്ക് ഓടിച്ചിരുന്നത്.
ജുബൈൽ ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം നാട്ടിലേക്ക് കൊണ്ടുപോകുമെന്ന് ഇതിനുള്ള നടപടികൾക്ക് നേതൃത്വം നൽകുന്ന പ്രവാസി വെൽഫെയർ ജനസേവന വിഭാഗം കൺവീനർ സലിം ആലപ്പുഴ അറിയിച്ചു.