യുക്മ - ഫസ്റ്റ് കോൾ കേരളപൂരം വള്ളംകളി 2025 ൽ പങ്കെടുക്കുന്നത് 31 ജലരാജാക്കൻമാർ..... മൂന്ന്, നാല് ഹീറ്റ്സുകളിലെ ടീമുകളെ പരിചയപ്പെടാം

യു കെ : ഏഴാമത് യുക്മ - ഫസ്റ്റ് കോൾ കേരളപൂരം വള്ളംകളിയുടെ മുന്നൊരുക്കങ്ങൾ അതിവേഗം നടന്ന് വരികയാണ്. ഷെഫീൽഡിനടുത്ത് റോഥർഹാം മാൻവേഴ്സ് തടാകത്തിൽ വെച്ച് ആഗസ്റ്റ് 30 ശനിയാഴ്ച നടക്കുന്ന മത്സരത്തിൽ 31 ടീമുകൾ പൊതു വിഭാഗത്തിൽ മത്സരിക്കുന്നു. വനിതകളുടെ വിഭാഗത്തിൽ 11 ടീമുകൾ കൂടി മത്സരിക്കുവാൻ എത്തുന്നതോടെ ഇരു വിഭാഗങ്ങളിലും ഇക്കുറി കടുത്ത മത്സരം നടക്കുമെന്ന് ഉറപ്പിക്കാം.

മത്സരത്തിൽ പങ്കെടുക്കുന്ന ടീമുകളെ 8 ഹീറ്റ്സുകളായി തിരിച്ചിരിക്കുകയാണ്. ബോട്ട് ക്ളബ്ബുകളുടെ പേരിൽ രജിസ്റ്റർ ചെയ്തിരിക്കുന്ന ടീമുകൾ കേരളത്തിലെ വള്ളംകളി പാരമ്പര്യമനുസരിച്ച് കുട്ടനാടൻ ഗ്രാമങ്ങളുടെ പേരിലുള്ള വള്ളങ്ങളിലാണ് മത്സരിക്കുവാൻ ഇറങ്ങുന്നത്.

കുട്ടന്നാട് തായങ്കരി സ്വദേശി ജോയിച്ചൻ തോമസ് തായങ്കരി നയിക്കുന്ന BMA ബോട്ട് ക്ളബ്ബ് ബസ്സറ്റ്ലോ മത്സരിക്കുവാൻ എത്തുന്നത് തായങ്കരി വള്ളത്തിലാണ്. മുൻ വർഷങ്ങളിലെ മത്സര പരിചയവും കൃത്യതയാർന്ന പരിശീലനവുമാണ് ടീമിൻ്റെ കരുത്ത്. ടീമിൻ്റെ സ്പോൺസേഴ്സ് നീതിമാൻ ഫെയർ & റൈറ്റ്.

അഖിൽ ജോർജ്ജിൻ്റെ നായകത്വത്തിൽ എത്തുന്ന G O A T S ബോട്ട് ക്ളബ്ബ് മാഞ്ചസ്റ്റർ മത്സരത്തിനെത്തുന്നത് തികഞ്ഞ വിജയ പ്രതീക്ഷയിലാണ്. ചിട്ടയായ പരിശീലനം വഴി ലഭിച്ച ആത്മവിശ്വാസമാണ് ടീം G O A T S ൻ്റെ കരുത്ത്. കൈനകരി വള്ളത്തിലാണ് ടീം മത്സരിക്കുന്നത്. ലവ് ടു കെയർ ലിവർപൂളാണ് ടീമിൻ്റെ സ്പോൺസേഴ്സ്.

ബാബു സെബാസ്റ്റ്യൻ ക്യാപ്റ്റനായുള്ള ഫ്രണ്ട്സ് ബോട്ട് ക്ളബ്ബ് കീത്ത്‌ലി മുട്ടാർ വള്ളത്തിലാണ് മത്സരിക്കുവാൻ ഒരുങ്ങുന്നത്. കൃത്യമായ പരിശീലനം നടത്തി വരുന്ന ടീം ഫ്രണ്ട്സ് യുക്മ ട്രോഫിയിൽ എതിരാളികൾക്ക് ശക്തമായ മത്സരം കാഴ്ച വെക്കുവാനുള്ള ഒരുക്കത്തിലാണ്. ഏലൂർ കൺസൽറ്റൻസി യുകെ ലിമിറ്റഡാണ് ടീമിൻ്റെ സ്പോൺസേഴ്സ്.

പച്ച വള്ളത്തിൽ മത്സരത്തിനൊരുങ്ങുന്ന PCBC ബോട്ട് ക്ളബ്ബ് യുകെ യെ നയിക്കുന്നത് വള്ളംകളിയിൽ ഏറെ പരിചയ സമ്പന്നനായ ബിനോജി അന്തോണിയാണ്. കുട്ടനാട്ടിലെ വള്ളംകളികളിൽ നിന്ന് ആർജ്ജിച്ച പരിചയ സമ്പത്താണ് ടീമിൻ്റെ കരുത്ത്. ഫസ്റ്റ് കോൾ ക്വാളിറ്റി ഹെൽത്ത് കെയർ സ്റ്റാഫിങ്ങാണ് ടീമിൻ്റെ സ്പോൺസേഴ്സ്.

യുക്മ ദേശീയ പ്രസിഡൻ്റ് അഡ്വ. എബി സെബാസ്റ്റ്യൻ്റെ നേതൃത്വത്തിൽ ദേശീയ ഭാരവാഹികളായ ജയകുമാർ നായർ, ഷീജോ വർഗ്ഗീസ്, വർഗ്ഗീസ് ഡാനിയൽ, സ്മിത തോട്ടം, സണ്ണിമോൻ മത്തായി, റെയ്മോൾ നിധീരി, പീറ്റർ താണോലിൽ, ഡോ. ബിജു പെരിങ്ങത്തറ, വള്ളംകളി ജനറൽ കൺവീനർ ഡിക്സ് ജോർജജ്, യുക്മ ദേശീയ സമിതി അംഗങ്ങൾ, റീജിയണൽ ഭാരവാഹികൾ, പോഷക സംഘടന ഭാരവാഹികൾ തുടങ്ങിയവർ വള്ളംകളിയുടെ തയ്യാറെടുപ്പുകൾ നടത്തി വരുന്നു. 

കായികപ്രേമികളുടെ ആവേശമായ വള്ളംകളിയും മലയാളികളുടെ പ്രിയപ്പെട്ട കലാരൂപങ്ങളായ തിരുവാതിരയും തെയ്യവും പുലികളിയും നൃത്ത നൃത്യങ്ങളും സംഗീതവും ആസ്വദിക്കുവാൻ മുഴുവൻ യുകെ മലയാളികളെയും യുക്മ ദേശീയ സമിതി, ആഗസ്റ്റ് 30 ന് റോഥർഹാം മാൻവേഴ്സ് തടാകക്കരയിലേക്ക് സ്വാഗതം ചെയ്യുന്നു.