"ലണ്ടൻ ഡ്രീംസ്" ഫ്ലവേഴ്സ് ചാനൽ യുക്മയുമായി ചേർന്ന് സംഘടിപ്പിക്കുന്ന വിവിധ ഷോകൾക്കായുള്ള ഓഡിഷൻ ഏപ്രിൽ 7ന് നോർവിച്ചിലും 12ന് നോട്ടിംങ്ങ്ഹാമിലും നടക്കും

യുകെ: കേരളത്തിലെ ഏറ്റവും പ്രമുഖമായതും മലയാളി കുടുംബ പ്രേക്ഷകരുടെ ഏറ്റവും ഇഷ്ടപ്പെട്ട വിനോദ ടി വി ചാനലുമായ ഫ്ലവേഴ്സ് ചാനലിൽ നടന്നുവരുന്ന "ഇതു ഐറ്റം വേറെ", സ്മാർട്ട് ഷോ", ടോപ് സിംഗർ - 5 എന്നീ കുടുംബ ഷോകളിൽ പങ്കെടുക്കുവാൻ താല്പര്യമുള്ളവർക്കായി വിവിധ പ്രായപരിധിയിലുള്ള മത്സരാർത്ഥികളെ തിരഞ്ഞെടുക്കുവാനുള്ള ഓഡിഷൻ യുകെയിലെ രണ്ട് പ്രമുഖ നഗരങ്ങളിൽ വച്ച് നടക്കുന്നു. ഏപ്രിൽ 7-ാം തീയതി നോർവിച്ചിലും ഏപ്രിൽ 12-ാം തീയതി നോട്ടിംങ്ങ്ഹാമിൽ വച്ച് നടക്കുന്നു. 

പ്രസ്തുത ഓഡിഷൻ പരിപാടി യുക്മയുമായി ചേർന്നാണ് ഫ്ലവേഴ്സ് ടിവി സംഘടിപ്പിച്ചിരിക്കുന്നത്. ഇതു സംബന്ധിച്ച പ്രാരംഭ ചർച്ചകൾ യുക്മ ജനറൽ സെക്രട്ടറി ജയകുമാർ നായർ ഫ്ലവേഴ്സ് ടിവി മനേജിംഗ് ഡയറക്ടർ ശ്രീകണ്ഠൻ നായരുമായി നാട്ടിൽ വച്ച് നടത്തിയിരുന്നു. ഇതിൻ്റെയടിസ്ഥാനത്തിൽ കഴിഞ്ഞ ദിവസം കൂടിയ യുക്മ ദേശീയ സമിതി യോഗം ഇക്കാര്യം  ചർച്ച ചെയ്ത് നോർവിച്ചിൽ വച്ച് ഏപ്രിൽ 7നും നോട്ടിംങ്ങ്ഹാമിൽ വച്ച് ഏപ്രിൽ 12 നും ഓഡിഷൻ നടത്തുവാൻ തീരുമാനമെടുത്തുവെന്ന് യുക്മ പ്രസിഡൻ്റ് അഡ്വ. എബി സെബാസ്റ്റ്യൻ അറിയിച്ചു.

മലയാളത്തിലെ പ്രമുഖ വിനോദ ടി വി ചാനലായ ഫ്ലവേഴ്സ് ചാനലിൽ നടന്നു വരുന്ന കോമഡി പ്രോഗ്രാമായ "ഫ്ലവേഴ്സ് ഇതു ഐറ്റം വേറെ", വിനോദവും വിജ്ഞാനനവും കോർത്തിണക്കിയ ഗെയിം ഷോയായ ''ഫ്ലവേഴ്സ് സ്മാർട്ട് ഷോ" എന്നീ പ്രോഗ്രാമുകളിൽ പങ്കെടുക്കുന്നവർക്ക് പ്രായപരിധിയില്ലെങ്കിലും, ''ഫ്ലവേഴ്സ് ടോപ് സിംഗർ - 5" എന്ന മ്യൂസിക് റിയാലിറ്റി ഷോയിലേക്കുള്ള ഓഡിഷൻ അഞ്ച് വയസിനും പന്ത്രണ്ട് വയസിനും ഇടയിലുള്ള കുട്ടികൾക്കായി പരിമിതപ്പെടുത്തിയിരിക്കുന്നു.

യുകെയിലെ മലയാളി കലാകാരൻമാർക്കായി ഫ്ളവേഴ്സ് ടി വി യും യുക്മയും ചേർന്നൊരുക്കുന്ന ഈ അസുലഭാവസരം പരമാവധി പ്രയോജനപ്പെടുത്തണമെന്ന് യുക്മ ദേശീയ സമിതി അഭ്യർത്ഥിച്ചു.