യുക്മ ഈസ്റ്റ് ആംഗ്ലിയ കലാമേള ഒക്ടോബർ 18 ന് റെയ്‌ലിയിൽ; ആയിരത്തിലധികം കലാപ്രതിഭകൾ മാറ്റുരക്കും

ബെഡ്ഫോർഡ്: യു.കെ. മലയാളി അസോസിയേഷനുകളുടെ കൂട്ടായ്മയായ, 'യുക്മ'യുടെ ഈസ്റ്റ് ആംഗ്ലിയ റീജണൽ കലാമേളയ്ക്കുള്ള ഒരുക്കങ്ങൾ പൂർത്തിയായി. 23 അംഗ അസോസിയേഷനുകളിൽ നിന്ന് ആയിരത്തിലധികം കലാപ്രതിഭകൾ പങ്കെടുക്കുന്ന ഈ മഹോത്സവം ഒക്ടോബർ 18-ന് ശനിയാഴ്ച്ച റെയ്‌ലിയിൽ വിപുലമായ രീതിയിൽ അരങ്ങേറും. മത്സരാർത്ഥികൾക്കുള്ള രജിസ്ട്രേഷൻ നടപടികൾ തിങ്കളാഴ്ച്ച മുതൽ ആരംഭിക്കും. 

കലാകാരെ മത്സരവേദിയിലേക്ക് നയിക്കുവാനും, പ്രോത്സാഹിപ്പിക്കാനുമായി അംഗ അസോസിയേഷനുകൾ  സജീവമാണ്. ഒപ്പം വിജയ കിരീട പ്രതീക്ഷയും. അത്യാവേശകരമായ മത്സരങ്ങളും, കലാവൈവിധ്യത്തിന്റെ വിസ്മയവും നിറഞ്ഞ സുവർണവേളയായി റെയ്‌ലിയിലെ വേദി മാറുമ്പോൾ എല്ലാ കലാസ്നേഹികളെയും കലാമേളയിലേക്കു സ്വാഗതം ചെയ്യുന്നു.