യുക്മ നേഴ്സസ് ഫോറവും, യുക്മ യോർക്ഷയർ & ഹംബർ റീജിയനും സംയുക്തമായി വേക്ഫീൽഡിൽ നടത്തിയ ‘നഴ്സസ് ഡേ സെലിബ്രേഷൻ’ വിജ്ഞാനദായകവും, വിനോദകരവും, സ്നേഹാദരവുമായി ആഘോഷിച്ചു

വേക്ക്ഫീൽഡ്: വേക്ക്ഫീൽഡിലെ ഹോർബറി വർക്കിംഗ് മെംബേർസ് ക്ലബ്ബിൽ വെച്ച് നടത്തപ്പെട്ട റീജിയന്റെ ആദ്യത്തെ നഴ്സസ് ഡേ ആഘോഷങ്ങൾ നഴ്‌സുമാരുടെ സമർപ്പണത്തെയും സംഭാവനകളെയും ആദരിക്കുന്ന വർണ്ണാഭമായതും ഊർജ്ജസ്വലവുമായ ഒരു സമ്മേളനമായിരുന്നു. 

യുക്മ യോർക്ഷയർ  & ഹംബർ റീജണൽ കമ്മിറ്റിയുടെ നേതൃത്വത്തിലും വെസ്റ്റ് യോർക്ഷയർ  മലയാളി അസ്സോസിയേഷന്റെ ആതിഥേയത്വത്തിലും നടത്തപ്പെട്ട പരിപാടിയിൽ റീജിയണിലെ വിവിധ അസ്സോസിയേഷനുകളിൽ  നിന്നും നിരവധിയാളുകൾ പങ്കെടുത്തു. 

റീജിയണൽ പ്രഡിഡന്റ് അമ്പിളി എസ് മാത്യുസിന്റെ അധ്യക്ഷതയിൽ കൂടിയ യോഗത്തിൽ യുക്മ  നാഷണൽ പ്രസിഡന്റ് അഡ്വ. എബി സെബാസ്റ്റ്യൻ നഴ്സസ് ഡേ ആഘോഷം ഉദ്ഘാടനം ചെയ്തു. 

യു.കെ യുടെ എല്ലാ  ഭാഗങ്ങളിലുള്ള നഴ്‌സുമാർക്ക് തൊഴിൽ മേഖലയിലെ വിവിധങ്ങളായ സഹായങ്ങൾ നൽകാൻ വിസ്തൃത ശ്രിഘലയുള്ള യു എൻ എഫ് സംഘടനയ്ക്ക് മാത്രമേ കഴിയൂവെന്ന് എബി സെബാസ്റ്റ്യൻ തന്റെ ഉദ്ഘാടനപ്രഭാഷണത്തിൽ പറഞ്ഞു.

ആധുനിക വൈദ്യ ശാസ്ത്രം ഒട്ടേറെ മുന്നേറുന്ന ഈ കാലഘട്ടത്തിൽ വ്യക്തികളെ മാത്രമല്ല സമൂഹത്തെയും ശാക്തീകരിക്കുവാൻ  ആതുര സേവന രംഗത്തെ നമ്മുടെ സഹോദരങ്ങൾക്ക് തങ്ങളുടെ സേവനം കൊണ്ട് സാധിക്കുമെന്ന് റീജണൽ പ്രസിഡണ്ട് അമ്പിളി എസ്‌ മാത്യൂസ് അധ്യക്ഷത പ്രസംഗത്തിൽ ഉദ്‌ബോധിപ്പിച്ചു.

നാഷണൽ വൈസ് പ്രസിഡന്റ് വര്ഗീസ് ഡാനിയേൽ, നാഷണൽ നഴ്സസ് ഫോറം കോ ഓർഡിനേറ്റർ സോണിയ ലുബി, ഈസ്റ്റ് ആംഗ്ലിയ റീജിയണൽ പ്രസിഡന്റ് ജോബിൻ ജോർജ്, റീജിയണൽ ട്രെഷറർ ഡോക്ടർ ശീതൾ മാർക്ക്, തുടങ്ങിയവർ സന്നിഹിതരായിരുന്നു. 

യോർക്ഷയർ  & ഹംബർ റീജണൽ സെക്രട്ടറി അജു തോമസ് സ്വാഗതം ആശംസിച്ചു. നേഴ്സുമാർക്കായി ബിജി മോൾ രാജു ഫ്ലോറൻസ് നൈറ്റിംഗേൽ പ്രതിജ്ഞ ചൊല്ലിക്കൊടുത്തു. വൈസ് പ്രസിഡന്റ് ജിജോ ചുമ്മാർ നന്ദി പ്രകാശിപ്പിച്ചു.

പരിചയസമ്പന്നരായ വിദഗ്ദർ നയിച്ച വിജ്ഞാനപ്രദമായ സെഷനുകളുടെ ഒരു പരമ്പരതന്നെ പരിപാടിയിൽ ഉൾപ്പെടുത്തിയിരുന്നു. നഴ്സസ് കോർഡിനേറ്റർമാരായ ഹരി കൃഷ്ണൻ, അലീന എം അലക്സ് എന്നിവർ ക്ലാസ്സുകൾ കോർഡിനേറ്റ് ചെയ്തു. 

വിനീത എബി (അഡ്വാൻസ്ഡ് ക്ലിനിക്കൽ പ്രക്റ്റിഷനർ ) എംപവറിങ് ദി ഫ്യൂച്ചർ ഓഫ് നഴ്സിംഗ്, അഷിത സേവ്യർ (ലീഡ് പ്രൊഫഷണൽ ഫോർ പോസ്റ്റ് രെജിസ്ട്രേഷൻ എഡ്യൂക്കേഷൻ & ഡെവലപ്‌മന്റ്‌) ഇന്റർവ്യൂ & ക്യാരീർ പത്വയ്സ്‌, പാൻസി ജോസ് (ക്ലിനിക്കൽ ഓപ്പറേഷൻ സൈറ്റ് മാനേജർ ) ത്രിവിങ് ഇൻ നഴ്സിംഗ്, അജി ഭായ് (ബി എം ഇ ചാമ്പ്യൻ ലീഡ്), ഗ്ലോബൽ ഹെൽത്ത് ചലഞ്ചേസ്, ഡോക്ടർ ദീപ ജേക്കബ് - സെല്ഫ് കെയർ & റേസിലിൻസ്  എന്നിവർ ക്ലാസുകൾ നടത്തി. തുടർന്ന് പാനൽ ഡിസ്ക്കഷനും നടന്നു . 

ആഘോഷത്തെ ആകർഷകമാക്കുവാൻ കലാപരിപാടികളും ഉൾപ്പെടുത്തിയിരുന്നു. യോർക്ഷയർ ആൻഡ്  ഹംബർ  റീജനൽ കമ്മിറ്റി അംഗങ്ങളായ വിമൽ ജോയ്, ആതിര മജനു, സുജേഷ് പിള്ള, എൽദോ എബ്രഹാം, എന്നിവർ നേതൃത്വം വഹിച്ചു. 

ബ്രാഡ്ഫോർഡ്  മലയാളി അസ്സോസ്സിയേഷൻ പ്രസിഡന്റ് ടോം സെബാസ്റ്റിയൻ, വേക്ഫീൽഡ് മലയാളി അസ്സോസ്സിയേഷൻ സെക്രട്ടറി സജീഷ്, ബാൻസലി മലയാളി അസ്സോസ്സിയേഷൻ സെക്രട്ടറി രഘു റാം എന്നിവർ പരിപാടിയിൽ ഉടനീളം പങ്കെടുത്തു. 

വിവിധ ക്ലാസ്സുകളും പരിശീലനവും പൂർത്തിയാക്കിയവർക്ക് സി പി ഡി പോയിന്റ്‌ അടങ്ങുന്ന  സർട്ടിഫിക്കറ്റുകൾ വിതരണം ചെയ്തു. ഏവർക്കും രുചികരമായ ലഞ്ചും ചായയും സ്നാക്ക്സും സംഘാടകർ ഒരുക്കിയിരുന്നു.

നഴ്‌സുമാരെ ആദരിക്കുന്നതിനും അവരിലൊരു ഐക്യബോധം സൃഷ്ടിക്കുന്നതിനുമായി യുക്മ  നടത്തിയ ഈ മേഖലാതല ആഘോഷങ്ങൾ ഏറെ വിജയകരവും മാതൃകാപരവുമായി.

റിപ്പോര്‍ട്ട്: ജേക്കബ് കളപ്പുരയ്ക്കൽ (പി ആർ ഒ യോർക് ഷെയർ & ഹംമ്പർ റീജിയൻ)