യുക്മ - ഫസ്റ്റ് കോൾ കേരളപൂരം വള്ളംകളി 2025 ൽ മത്സരിക്കുന്നത് 31 ജലരാജാക്കൻമാർ..... അഞ്ച്, ആറ് ഹീറ്റ്സുകളിലെ ടീമുകളെ പരിചയപ്പെടാം

യുകെ: ഏഴാമത് യുക്മ - ഫസ്റ്റ് കോൾ കേരളപൂരം വള്ളംകളിയുടെ മുന്നൊരുക്കങ്ങൾ അവസാനഘട്ടത്തിലേക്ക് പ്രവേശിക്കുകയാണ്. ഷെഫീൽഡിനടുത്ത് റോഥർഹാം മാൻവേഴ്സ് തടാകത്തിൽ വെച്ച് ആഗസ്റ്റ് 30 ശനിയാഴ്ച നടക്കുന്ന മത്സരത്തിൽ 31 ടീമുകൾ പൊതു വിഭാഗത്തിൽ മത്സരിക്കുന്നു. 

വനിതകളുടെ വിഭാഗത്തിൽ 11 ടീമുകൾ കൂടി മത്സരിക്കുവാൻ എത്തുന്നതോടെ ഇരു വിഭാഗങ്ങളിലും ഇക്കുറി കടുത്ത മത്സരം നടക്കുമെന്ന് ഉറപ്പിക്കാം.

മത്സരത്തിൽ പങ്കെടുക്കുന്ന ടീമുകളെ 8 ഹീറ്റ്സുകളായി തിരിച്ചിരിക്കുകയാണ്. ബോട്ട് ക്ളബ്ബുകളുടെ പേരിൽ രജിസ്റ്റർ ചെയ്തിരിക്കുന്ന ടീമുകൾ കേരളത്തിലെ വള്ളംകളി പാരമ്പര്യമനുസരിച്ച് കുട്ടനാടൻ ഗ്രാമങ്ങളുടെ പേരിലുള്ള വള്ളങ്ങളിലാണ് മത്സരിക്കുവാൻ ഇറങ്ങുന്നത്.

പ്രാഥമിക ഹീറ്റ്സുകളിൽ മത്സരിക്കുന്ന ടീമുകൾ സംബന്ധിച്ച തീരുമാനമെടുത്തത് മാൻവേഴ്സ് ലെയ്ക്ക് ട്രസ്റ്റ് ഓഫീസിൽ ആഗസ്റ്റ് 9 ശനിയാഴ്ച ചേർന്ന ക്യാപ്റ്റൻമാരുടെ യോഗത്തിലാണ്. 

മുൻ പതിവ് പോലെ നറുക്കെടുപ്പിലൂടെയാണ് ഇത്തവണയും ഹീറ്റ്സുകളിലെ ടീമുകളെ തീരുമാനിച്ചത്. 5, 6 ഹീറ്റ്സുകളിൽ പങ്കെടുക്കുന്ന ടീമുകൾ, ക്യാപ്റ്റൻമാർ, ബോട്ട് ക്ളബ്ബ്, വള്ളം എന്നിവ താഴെ നൽകുന്നു.

ഹീറ്റ്സ് - 5

• വള്ളംകുളങ്ങര - തോമസ്കുട്ടി ഫ്രാൻസിസ്, ജവഹർ ബോട്ട് ക്ളബ്ബ് ലിവർപൂൾ.

വള്ളംകളിയിൽ ഏറെ പരിചയ സമ്പന്നനായ തോമസ്കുട്ടി ഫ്രാൻസിസ് ക്യാപ്റ്റനായുള്ള ജവഹർ ബോട്ട് ക്ളബ്ബ് ലിവർപൂൾ മത്സരിക്കുന്നത് വള്ളംകുളങ്ങര വള്ളത്തിലാണ്. 

തുടർച്ചയായി മൂന്ന് തവണ യുക്മ ട്രോഫി കരസ്ഥമാക്കി ചരിത്രം സൃഷ്ടിച്ച ടീം ലിവർപൂൾ വിജയ ചരിത്രം തുടരുവാനുള്ള ലക്ഷ്യത്തിലാണ് രണ്ട് വർഷത്തെ ഇടവേള കഴിഞ്ഞ് വീണ്ടും മത്സരത്തിനെത്തുന്നത്. മയിൽ ടെയ്സ്റ്റ് ഓഫ് ക്വാളിറ്റിയാണ് ടീമിൻ്റെ സ്പോൺസേഴ്സ്.

• കരുവാറ്റ - തുഷാർ പിള്ള, ശ്രീ വിനായക ബോട്ട് ക്ളബ്ബ്, യുകെ.

യുക്മ വള്ളംകളിയിലെ സ്ഥിര സാന്നിദ്ധ്യമായ ശ്രീ വിനായക ബോട്ട് ക്ളബ്ബ് യുകെയെ നയിക്കുന്നത് തുഷാർ പിള്ളയാണ്. യുവത്വത്തിന് മുൻതൂക്കം നൽകി ചിട്ടയായ പരിശീലനത്തിലൂടെ മത്സരത്തിനൊരുങ്ങുന്ന ടീം ശ്രീ വിനായക മത്സരിക്കുന്നത് കരുവാറ്റ വള്ളത്തിലാണ്. ലൈഫ് ലൈൻ പ്രൊട്ടക്ടാണ് ടീമിൻ്റെ സ്പോൺസേഴ്സ്.

• കൈനടി - സുജോ ഡാനിയൽ, സെൻ്റ് മേരീസ് ബോട്ട് ക്ളബ്ബ് കവൻട്രി.

കൈനടി വള്ളത്തിൽ മത്സരത്തിനെത്തുന്ന സെൻ്റ് മേരീസ് ബോട്ട് ക്ളബ്ബ് കവൻട്രിയെ നയിക്കുന്നത് സുജോ ഡാനിയലാണ്. കൃത്യതയാർന്ന പരിശീലനം വഴി ലഭിച്ച ആത്മവിശ്വാസമാണ് ടീം സെൻ്റ് മേരീസിൻ്റെ കരുത്ത്. ലൈഫ് ലൈൻ പ്രൊട്ടക്ടാണ് ടീമിൻ്റെ സ്പോൺസേഴ്സ്.

ഹീറ്റ്സ് - 6

• പുളിങ്കുന്ന് - മാത്യു ചാക്കോ, SMA ബോട്ട് ക്ളബ്ബ് സാൽഫോർഡ്.

2023 ലെ യുക്മ ട്രോഫി ചാമ്പ്യൻമാരും കഴിഞ്ഞ വർഷം റണ്ണേഴ്സ് അപ്പുമായിരുന്ന SMA ബോട്ട് ക്ളബ്ബ് സാൽഫോർഡിനെ നയിക്കുന്നത് വള്ളംകളിയിൽ ഏറെ പരിചയ സമ്പത്തിനുടമയായ മാത്യു ചാക്കോയാണ്. 

കഠിനമായ പരിശീലനം നൽകുന്ന കരുത്തുമായി എത്തുന്ന ടീം SMA പുളിങ്കുന്ന് വള്ളത്തിലാണ് മത്സരത്തിന് ഒരുങ്ങുന്നത്. ഏലൂർ കൺസൽട്ടൻസി യുകെ ലിമിറ്റഡാണ് ടീമിൻ്റെ സ്പോൺസേഴ്സ്.

• വേമ്പനാട് - നിജു ചെറിയാൻ, കെയർവെൽ ഫൌണ്ടേഷൻ ബോട്ട് ക്ളബ്ബ് ബർമിംഗ്ഹാം.

നിജു ചെറിയാൻ ക്യാപ്റ്റനായി എത്തുന്ന കെയർവെൽ ഫൌണ്ടേഷൻ ബോട്ട് ക്ളബ്ബ് ബർമിംഗ്ഹാം മത്സരിക്കുന്നത് വേമ്പനാട് വള്ളത്തിലാണ്. 

ചിട്ടയായ പരിശീലനം വഴി നേടിയ ആത്മവിശ്വാസം കരുത്താക്കിയെത്തുന്ന ടീം കെയർവെൽ ഫൌണ്ടേഷൻ വലിയ പ്രതീക്ഷയിലാണ് ഇത്തവണ മത്സരത്തിനെത്തുന്നത്. പോൾ ജോൺ & കമ്പനി സോളിസിറ്റേഴ്‌സാണ് ടീമിൻ്റെ സ്പോൺസേഴ്സ്.

• കുമരകം - ജോർജ്ജ് വർഗ്ഗീസ്, SKCA ബോട്ട് ക്ളബ്ബ് ഷെഫീൽഡ്.

ജോർജ്ജ് വർഗ്ഗീസ് ക്യാപ്റ്റനായി എത്തുന്ന SKCA ബോട്ട് ക്ളബ്ബ് ഷെഫീൽഡ് മത്സരത്തിനെത്തുന്നത് കുമരകം വള്ളത്തിലാണ്. യുക്മ ട്രോഫിയിൽ കരുത്തിൻ്റെയും പരിചയ സമ്പത്തിൻ്റെയും പര്യായമാറി മാറുവാനാണ് ടീം SKCA ബോട്ട് ക്ളബ്ബിൻ്റെ ഒരുക്കം. എൻ്റെ പീടികയാണ് ടീമിൻ്റെ സ്പോൺസേഴ്സ്.

• തകഴി - ദീപക് അബ്രാഹം, HIMA ബോട്ട് ക്ളബ്ബ് ഹൾ.

ദീപക് അബ്രാഹം ക്യാപ്റ്റനായി എത്തുന്ന HIMA ബോട്ട് ക്ളബ്ബ് ഹൾ മത്സരിക്കുവാൻ എത്തുന്നത് തകഴി വള്ളത്തിലാണ്. എതിരാളികൾക്ക് ശക്തമായ മത്സരം കാഴ്ച വെക്കുവാനുള്ള ഒരുക്കത്തിലാണ് ടീം HIMA ബോട്ട് ക്ളബ്ബ്. ജിയ ട്രാവൽസ് & ഹോളിഡെയ്സാണ് ടീമിൻ്റെ സ്പോൺസേഴ്‌സ്.

യുക്മ ദേശീയ പ്രസിഡൻ്റ് അഡ്വ. എബി സെബാസ്റ്റ്യൻ്റെ നേതൃത്വത്തിൽ ദേശീയ ഭാരവാഹികളായ ജയകുമാർ നായർ, ഷീജോ വർഗ്ഗീസ്, വർഗ്ഗീസ് ഡാനിയൽ, സ്മിത തോട്ടം, സണ്ണിമോൻ മത്തായി, റെയ്മോൾ നിധീരി, പീറ്റർ താണോലിൽ, ഡോ. ബിജു പെരിങ്ങത്തറ, വള്ളംകളി ജനറൽ കൺവീനർ ഡിക്സ് ജോർജജ്, യുക്മ ദേശീയ സമിതി അംഗങ്ങൾ, റീജിയണൽ ഭാരവാഹികൾ, പോഷക സംഘടന ഭാരവാഹികൾ തുടങ്ങിയവർ വള്ളംകളിയുടെ തയ്യാറെടുപ്പുകൾ നടത്തി വരുന്നു. 

കായികപ്രേമികളുടെ ആവേശമായ വള്ളംകളിയും മലയാളികളുടെ പ്രിയപ്പെട്ട കലാരൂപങ്ങളായ തിരുവാതിരയും തെയ്യവും പുലികളിയും നാടൻപാട്ടും നൃത്ത നൃത്യങ്ങളും സംഗീതവും ആസ്വദിക്കുവാൻ മുഴുവൻ യുകെ മലയാളികളെയും യുക്മ ദേശീയ സമിതി, ആഗസ്റ്റ് 30 ന് റോഥർഹാം മാൻവേഴ്സ് തടാകക്കരയിലേക്ക് സ്വാഗതം ചെയ്യുന്നു.

റിപ്പോര്‍ട്ട്: കുര്യൻ ജോർജ്ജ്(നാഷണൽ പി.ആർ.ഒ & മീഡിയ കോർഡിനേറ്റർ)