യുക്മ ഈസ്റ്റ് ആംഗ്ലിയ കലാമേള ജനറൽ സെക്രട്ടറി ജയകുമാർ നായർ ഉദ്ഘാടനം നിർവ്വഹിക്കും; റെയ്‌ലിയിൽ ഒരുങ്ങുക കലയുടെ 'മഴവിൽ കേളികൊട്ട്'

ബെഡ്ഫോർഡ്: ഈസ്റ്റ് ആംഗ്ലിയ മേഖലയിലെ മലയാളി സമൂഹത്തിന്റെ പ്രതിഭാപാടവത്തിന് വേദിയൊരുക്കുന്നതും, കലാലോകം ആകാംക്ഷയോടെ കാത്തിരിക്കുന്നതുമായ യുക്മ ഈസ്റ്റ് ആംഗ്ലിയ റീജണൽ കലാമേള ഇന്ന്  ശനിയാഴ്ച്ച (18/10/ 25) റെയ്‌ലിയിൽ അരങ്ങേറും. യുക്മയുടെ ദേശീയ ജനറൽ സെക്രട്ടറി ജയകുമാർ നായർ മുഖ്യാതിഥിയാകുന്ന യുക്മ ഈസ്റ്റ് ആംഗ്ലിയ റീജണൽ കലാമേള റെയ്‌നിയിലെ ദി സ്വയനെ പാർക്ക് സ്‌കൂൾ ഓഡിറ്റോറിയത്തിലാവും അരങ്ങേറുക.

ഏറെ ആവേശകരമായ പ്രതികരണം കണ്ട മത്സരാർത്ഥികളുടെ റജിസ്‌ട്രേഷൻ നടപടികൾ പൂർത്തിയായപ്പോൾ യുക്മ ഈസ്റ്റ് ആംഗ്ലിയ മേഖലയിലെ  23 അംഗ അസോസിയേഷനുകളിൽ നിന്നുമായി മുൻ വർഷത്തേക്കാൾ വർധിച്ച മത്സരാർത്ഥി  പ്രവാഹമാണ്  കാണുവാൻ കഴിഞ്ഞതെന്നും, കലാമേളക്കുള്ള ഒരുക്കങ്ങൾ പൂര്‍ത്തിയായതായും  സംഘാടക സമിതി അറിയിച്ചു.  

എൽ ഇ ഡി സ്‌ക്രീനിന്റെ പശ്ചാത്തലത്തിൽ നാലു സ്റ്റേജുകളിലായി ഒരുക്കുന്ന കലാമേളയിൽ വിവിധങ്ങളായ മത്സരങ്ങളാവും  അരങ്ങേറുക. സംഗീതം, നൃത്തം, അഭിനയം, പ്രസംഗം, പ്രശ്ചന്ന വേഷം അടക്കം നിരവധി ശാഖകളിലായി നടത്തുന്ന മത്സരങ്ങൾ അത്യന്തം ആസ്വാദ്യവും,  ആവേശകരമാവുമായ അവതരണ പോരാട്ടങ്ങൾക്കാവും റെയ്‌നിയിലെ  ദി സ്വയനെ പാർക്ക് സ്‌കൂൾ ഓഡിറ്റോറിയം സാക്ഷ്യം വഹിക്കുക.  

 

കലാസൗഹൃദ സദസ്സിനുമുന്നിൽ, കലയുടെ മഴവിൽ വിസ്മയവും,  അവതരണപ്രതിഭയും, അനുഭവവേദ്യമേകുന്ന  യുക്മ ഈസ്റ്റ് ആംഗ്ലിയാ കലാമേളയിലേക്ക്‌  എല്ലാ കലാസ്നേഹികളെയും, കലാകാരെയും  സസ്നേഹം സ്വാഗതം ചെയ്യുന്നു.