2080 മുതല്‍ ലോക ജനസംഖ്യ കുറയും; യു.എന്‍ വേള്‍ഡ് പോപ്പുലേഷന്‍ പ്രോസ്പെക്റ്റ്സ് റിപ്പോര്‍ട്ട്

വരുന്ന 50~60 വര്‍ഷങ്ങളില്‍ ലോകജനസംഖ്യ വര്‍ധിക്കുന്നത് തുടരുമെന്ന് യു.എന്‍ വേള്‍ഡ് പോപ്പുലേഷന്‍ പ്രോസ്പെക്റ്റ്സ് റിപ്പോര്‍ട്ട്. 2080 പകുതി ആകുന്നതോടെ ലോകജനസംഖ്യ 1030 കോടിയാകുമെന്നാണ് റിപ്പോര്‍ട്ടില്‍ പറയുന്നത്.

ഈ വര്‍ഷത്തെ കണക്കനുസരിച്ച്, 820 കോടിയാണ് ലോകജനസംഖ്യ. 2080 ല്‍ ഏറ്റവും ഉയര്‍ന്ന നിലയില്‍ എത്തിയ ശേഷം പിന്നീട് ജനസംഖ്യ ഗണ്യമായി കുറയും. നൂറ്റാണ്ട് അവസാനിക്കുന്നതോടെ ലോകജനസംഖ്യ 1020 കോടിയായി കുറയുമെന്നാണ് കണക്കാക്കുന്നത്. 2100 വരെ ഇന്ത്യ ലോകജനസംഖ്യയില്‍ ഒന്നാംസ്ഥാനത്ത് തുടരുമെന്നും ഇതില്‍ വ്യക്തമാക്കുന്നു.

2060 കളിലായിരിക്കും ഇന്ത്യയിലെ ജനസംഖ്യനിരക്ക് ഏറ്റവും ഉയര്‍ന്ന നിലയിലെത്തുന്നത്. പിന്നീടത് ഗണ്യമായി കുറയും. 2060കളുടെ തുടക്കത്തില്‍ ഇന്ത്യയിലെ ജനസംഖ്യ 170 കോടി ആകുമെന്നാണ് കരുതുന്നത്. പിന്നീട് 12 ശതമാനം കുറവ് പ്രതീക്ഷിക്കുന്നു. ഈ നൂറ്റാണ്ടിലുടനീളം ലോകത്തിലെ ഏറ്റവും കൂടുതല്‍ ജനസംഖ്യയുള്ള രാജ്യമായി ഇന്ത്യ തുടരും. 2023ലാണ് ഇന്ത്യ ജനസംഖ്യാ നിരക്കില്‍ ചൈനയെ മറികടന്ന് ഒന്നാമതെത്തിയത്.

2024ല്‍ ഇന്ത്യയിലെ ജനസംഖ്യ 145 കോടിയായി ഉയരും. 2054 ആകുന്നതോടെ 169 കോടിയാകും. ഇതാണ് 2100 ആകുന്നതോടെ 150 കോടിയായി കുറയുമെന്നു കണക്കാക്കുന്നത്. 2024ല്‍ ചൈനയിലെ ജനസംഖ്യ 141 കോടിയാകുമെന്നാണ് കണക്കുകൂട്ടുന്നത്. അത് 2054 ആകുന്നതോടെ 121 കോടിയായി കുറയും. 2100 ആകുന്നതോടെ ജനസംഖ്യ കുത്തനെ ഇടിഞ്ഞ് 63.3 കോടിയിലെത്തും.