77-ാമത് റിപ്പബ്ലിക് ദിനത്തിൽ രാഷ്ട്രപതിയുടെ ‘അറ്റ് ഹോം’ ക്ഷണക്കത്ത് ശ്രദ്ധയമാകുന്നു; സ്പർശിക്കാനും ധരിക്കാനും സൂക്ഷിച്ചുവയ്ക്കാനും കഴിയുന്ന ഒരു കലാസൃഷ്ടി

ഡൽഹി: 77-ാമത് റിപ്പബ്ലിക് ദിനാഘോഷത്തോടനുബന്ധിച്ച് രാഷ്ട്രപതി ഭവൻ പുറത്തിറക്കിയ ‘അറ്റ് ഹോം’ ക്ഷണക്കത്ത് ഈ വർഷം ശ്രദ്ധേയമായ ഒരു മാറ്റമാണ് കൊണ്ടുവന്നിരിക്കുന്നത്. ഇത് വെറും വായിച്ച് മാറ്റിവയ്ക്കുന്ന ഒരു ക്ഷണക്കത്ത് മാത്രമല്ല.

സ്പർശിക്കാനും ധരിക്കാനും സൂക്ഷിച്ചുവയ്ക്കാനും കഴിയുന്ന ഒരു കലാസൃഷ്ടിയാണ്. ഇന്ത്യയുടെ വടക്കുകിഴക്കൻ സംസ്ഥാനങ്ങളുടെ പാരമ്പര്യവും പരിസ്ഥിതി സൗഹൃദ ആശയങ്ങളും കൈത്തറി കഴിവുകളും മുൻനിറുത്തിയാണ് ഈ പ്രത്യേക ക്ഷണം രൂപകൽപ്പന ചെയ്തിരിക്കുന്നത്.

അസം, അരുണാചൽ പ്രദേശ്, മേഘാലയ, മണിപ്പൂർ, നാഗാലാൻഡ്, മിസോറാം, ത്രിപുര, സിക്കിം എന്നീ എട്ട് സംസ്ഥാനങ്ങളെ ‘അഷ്ടലക്ഷ്മി’ എന്ന പേരിൽ അറിയപ്പെടുന്നു. സമൃദ്ധി, ഐശ്വര്യം, ശുദ്ധി, സമ്പത്ത്, ജ്ഞാനം, കര്‍ത്തവ്യം, കൃഷി, മൃഗസംരക്ഷണം എന്നീ ലക്ഷ്മിദേവിയുടെ എട്ട് രൂപങ്ങളെയാണ് ഇവ പ്രതിനിധീകരിക്കുന്നത്. ഈ ആശയമാണ് ക്ഷണക്കത്തിന്റെ ആത്മാവായി മാറിയിരിക്കുന്നത്.

ഇന്ത്യയുടെ വടക്കുകിഴക്കൻ സംസ്ഥാനങ്ങളുടെ പാരമ്പര്യവും പരിസ്ഥിതി സൗഹൃദ ആശയങ്ങളും കൈത്തറി കഴിവുകളും മുൻനിറുത്തിയാണ് പ്രത്യേക ക്ഷണകത്ത് രൂപകൽപ്പന ചെയ്തിരിക്കുന്നത്. അഹമ്മദാബാദിലെ നാഷണൽ ഇൻസ്റ്റിറ്റ്യൂട്ട് ഓഫ് ഡിസൈൻ (NID) ആണ് ഇതിന്റെ പിന്നിൽ പ്രവർത്തിച്ചത്. ഒരിക്കൽ ഉപയോഗിച്ച് കളയുന്നതിന് പകരം ഭിത്തിയിൽ അലങ്കരിച്ച് സൂക്ഷിക്കാവുന്ന ഒരു സ്മരണികയാണ് ഇത്.