കോമൺ‌വെൽത്ത് ഗെയിംസിന് ആതിഥേയത്വം വഹിക്കാൻ തയ്യാറാണെന്നറിയിച്ച് ഇന്ത്യ. കായിക മന്ത്രാലയം അപേക്ഷ സമർപ്പിച്ചു

ന്യൂഡൽഹി: 2030 ലെ കോമൺ‌വെൽത്ത് ഗെയിംസിന് അഹമ്മദാബാദിൽ ആതിഥേയത്വം വഹിക്കാനുള്ള താൽപര്യം വ്യക്തമാക്കി ഇന്ത്യ രം​ഗത്ത്. 

മാർച്ച് 20ന് തന്നെ ഇതിനുള്ള അപേക്ഷ  ഇന്ത്യ സമർപ്പിച്ചതായി കായിക മന്ത്രാലയ വൃത്തങ്ങൾ അറിയിച്ചു. 

2036 ലെ സമ്മർ ഒളിമ്പിക് ഗെയിംസിന് ഇന്ത്യയിൽ ആതിഥേയത്വം വഹിക്കാൻ പ്രധാനമന്ത്രി നരേന്ദ്ര മോദി ലക്ഷ്യമിടുന്നുണ്ട്. 

ഇന്ത്യയുടെ ഒളിമ്പിക് സ്വപ്നം സാക്ഷാത്കരിക്കുന്നതിനുള്ള ഒരു പ്രധാന ചുവടുവയ്പ്പായാണ് കോമൺ‌വെൽത്ത് ഗെയിംസിന് ഇന്ത്യ ആതിഥേയത്വം വഹിക്കുക എന്ന നീക്കത്തിലൂടെ കേന്ദ്ര സർക്കാർ ലക്ഷ്യം വയ്ക്കുന്നത്.

ഇന്ത്യൻ ഒളിമ്പിക് അസോസിയേഷൻ (ഐഒഎ) ഗെയിംസിന് ആതിഥേയത്വം വഹിക്കാൻ താൽപര്യം പ്രകടിപ്പിച്ച് കുറച്ച് ദിവസങ്ങൾക്ക് മുമ്പ് അപേക്ഷ സമർപ്പിച്ചിരുന്നു. 

ഇന്ത്യ അവസാനമായി ഒരു പ്രധാന കായിക പരിപാടിക്ക് ആതിഥേയത്വം വഹിച്ചത് 2010 ലാണ്. ഡൽഹിയിൽ വച്ചായിരുന്നു ആ കോമൺ‌വെൽത്ത് ഗെയിംസ് നടന്നത്.