യുഎസ് ഓപ്പണിൽ അട്ടിമറി; സ്റ്റെഫാനോസ് സിറ്റ്സിപാസ് പുറത്ത് നാല് മണിക്കൂർ നീണ്ട പോരാട്ടത്തിലാണ് ഡൊമിനിക് സ്‌ട്രൈക്കർ മത്സരം ജയിച്ചത്

ന്യൂയോർക്ക് : യുഎസ് ഓപ്പൺ ടെന്നിസിൽ ​ലോക ഏഴാം നമ്പർ താരം സ്റ്റെഫാനോസ് സിറ്റ്സിപാസ് രണ്ടാം റൗണ്ടിൽ പുറത്ത്. നാല് മണിക്കൂറും അഞ്ച് സെറ്റും നീണ്ട പോരാട്ടത്തിനൊടുവിലാണ് സിറ്റ്സിപാസിന്റെ തോൽവി. ലോക 128-ാം റാങ്ങിലുള്ള സ്വിറ്റ്സർലാൻഡ് താരം ഡൊമിനിക് സ്‌ട്രൈക്കറാണ് സിറ്റ്സിപാസിനെ അട്ടിമറിച്ചത്. ഡൊമിനിക് യുഎസ് ഓപ്പൺ മൂന്നാം റൗണ്ടിലേക്ക് കടന്നു.

ശക്തമായ ഫോർഹാൻഡ് ഷോട്ടുകളും നെറ്റ് പ്ലേയുമാണ് സ്ട്രൈക്കറിനെ ജയത്തിലേക്ക് എത്തിച്ചത്. ആദ്യ സെറ്റിൽ ശക്തമായ പോരാട്ടത്തിനൊടുവിൽ സ്ട്രൈക്കർ ജയിച്ചു. പിന്നീടുള്ള മൂന്ന് സെറ്റുകൾ ടൈബ്രേക്കർ വരെ നീണ്ടു. രണ്ടും മൂന്നും സെറ്റ് ജയിച്ച സിറ്റ്സിപാസ് മത്സരത്തിൽ മുന്നിലെത്തി. നാലാം സെറ്റ് ജയിച്ച സ്ട്രൈക്കർ ഒപ്പമെത്തി.

അഞ്ചാം സെറ്റിലും സ്ട്രൈക്കർ ശക്തമായ പോരാട്ടം പുറത്തെടുത്തതോടെ സിറ്റ്സിപാസ് തോൽവി സമ്മതിച്ചു. സ്കോർ 5-7, 7-6 (7-2), 7-6 (7-5), ​6-7 (6-8), 3-6. മത്സരം കടുത്തതായിരുന്നുവെന്ന് വിജയശേഷം സ്ട്രൈക്കർ പ്രതികരിച്ചു. ആദ്യ സെറ്റ് വിജയിച്ചത് ആത്മവിശ്വാസം നൽകി. മൂന്നാം റൗണ്ടിൽ മികച്ച പ്രകടനം പുറത്തെടുക്കാൻ കഴിയുമെന്നാണ് വിശ്വാസമെന്നും സ്ട്രൈക്കർ വ്യക്തമാക്തി.