വനിതാ ടി20 ലോകകപ്പ് പോരാട്ടത്തിന് മത്സര ക്രമമായി; ഇന്ത്യയും പാകിസ്ഥാനും ഓസ്‌ട്രേലിയയും ഒരു ഗ്രൂപ്പിൽ; ആവേശകരമായ ഇന്ത്യ - പാകിസ്ഥാന്‍ മത്സരം ഒക്ടോബര്‍ ആറിന്

മുംബൈ: വനിതാ ടി20 ലോകകപ്പിന്റെ മത്സര ക്രമം പുറത്തുവിട്ട് ഐസിസി. ഇന്ത്യ, പാകിസ്ഥാന്‍, ഓസ്‌ട്രേലിയ, ന്യൂസിലന്‍ഡ് എന്നിവര്‍ അടങ്ങിയതാണ് ഗ്രൂപ്പ്. യോഗ്യതാ പോരാട്ടം കളിച്ചെത്തുന്ന മറ്റൊരു ടീമും ഈ ഗ്രൂപ്പിലുണ്ടാകും.

ഗ്രൂപ്പ് ബിയില്‍ ഇംഗ്ലണ്ട്, ദക്ഷിണാഫ്രിക്ക, വെസ്റ്റ് ഇന്‍ഡീസ്, ബംഗ്ലാദേശ് ടീമുകളും യോഗ്യതാ പോരാട്ടം കളിച്ചെത്തുന്ന മറ്റൊരു ടീമും മാറ്റുരയ്ക്കും.

ബംഗ്ലാദേശാണ് ഇത്തവണ വനിതാ ലോകകപ്പ് പോരാട്ടത്തിനു വേദിയാകുന്നത്. ഒക്ടോബര്‍ മൂന്ന് മുതലാണ് പോരാട്ടം. മൂന്നിന് ധാക്കയിലാണ് ഉദ്ഘാടന മത്സരം. ഒക്ടോബര്‍ ആറിനാണ് ഇന്ത്യ- പാകിസ്ഥാന്‍ പോരാട്ടം.

ഇരു ഗ്രൂപ്പില്‍ നിന്നും ആദ്യ രണ്ട് സ്ഥാനത്തെത്തുന്ന ടീമുകള്‍ നേരിട്ട് സെമിയിലേക്ക് കടക്കും. ഒക്ടോബര്‍ 17, 18 തീയതികളിലാണ് സെമി. 20നു ധാക്കയില്‍ തന്നെ ഫൈനലും നടക്കും. 19 ദിവസം നടക്കുന്ന ടൂര്‍ണമെന്റില്‍ ആകെ 23 മത്സരങ്ങളാണുള്ളത്.