ഞാന്‍ വിവാഹം കഴിക്കാത്തതിന് കാരണം ഇയാളാണ്; തബു പറയുന്നു

അടുത്തിടെ മുംബൈ മിററിന് നല്‍കിയ അഭിമുഖത്തില്‍ തബു തന്റെ സുഹൃത്തും ബോളിവുഡ് താരവുമായ അജയ് ദേവ്ഗണിനെ കുറിച്ചു പറഞ്ഞ കാര്യങ്ങളാണ് ശ്രദ്ധ നേടുന്നത്. കുട്ടിക്കാലത്ത് തന്റെ അടുത്ത സുഹൃത്തുക്കളില്‍ ഒരാളായിരുന്നു അജയ് ദേവ്ഗണ്‍ എന്നും തബു വെളിപ്പെടുത്തുന്നു.

"അജയ് എന്റെ കസിന്‍ സമീര്‍ ആര്യയുടെ അയല്‍ക്കാരനും അടുത്ത സുഹൃത്തുമായിരുന്നു, എന്റെ ചെറുപ്പത്തിന്റെ ഭാഗമായിരുന്നു അവനും, അത് ഞങ്ങളുടെ ബന്ധത്തിന് ശക്തമായ അടിത്തറയിട്ടു. എന്റെ ചെറുപ്പത്തില്‍ സമീറും അജയും ചാരപ്പണി ചെയ്യുമായിരുന്നു, അവരെന്നെ ചുറ്റിപ്പറ്റി നടക്കുകയും എന്നോട് സംസാരിക്കുന്ന ആണ്‍കുട്ടികളെ തല്ലുമെന്ന് ഭീഷണിപ്പെടുത്തുകയും ചെയ്യുമായിരുന്നു. അവര്‍ വലിയ ശല്യക്കാരായിരുന്നു, ഇന്ന് ഞാന്‍ അവിവാഹിതയാണെങ്കില്‍ അതിന് കാരണം അജയ് ആണ്. അവന്‍ ചെയ്തതില്‍ പശ്ചാത്തപിക്കുമെന്ന് ഞാന്‍ പ്രതീക്ഷിക്കുന്നു," എന്നാണ് തമാശ കലര്‍ത്തി അജയുമായുള്ള സൗഹൃദത്തെ കുറിച്ച്‌ തബു പറഞ്ഞത്.

തനിക്കൊരു പയ്യനെ കണ്ടുപിടിക്കാന്‍ താന്‍ അജയിനോട് ആവശ്യപ്പെട്ടിരുന്നതായും തബു പറയുന്നു. "എനിക്ക് വിശ്വസിക്കാന്‍ കഴിയുന്ന ആരെങ്കിലും ഉണ്ടെങ്കില്‍ അത് അജയ് ആണ്. അവന്‍ ഒരു കുട്ടിയെപ്പോലെയാണ്, അതേ സമയം ഒരു സംരക്ഷനും. അവനുള്ളപ്പോള്‍ സെറ്റില്‍ ടെന്‍ഷനില്ല. ഞങ്ങള്‍ അതുല്യമായൊരു ബന്ധവും നിരുപാധികമായ സ്നേഹവും പങ്കിടുന്നു."

തബുവും അജയ് ദേവ്ഗണും തൊണ്ണൂറുകളിലെ ഐകോണിക് ഓണ്‍-സ്‌ക്രീന്‍ ജോഡികളാണ്. ഇരുവരുമൊന്നിച്ച്‌ നിരവധി ബ്ലോക്ക്ബസ്റ്ററുകളില്‍ അഭിനയിക്കുകയും അടുത്ത സൗഹൃദം പങ്കിടുകയും ചെയ്തിട്ടുണ്ട്. അജയ് ദേവ്ഗണിനൊപ്പം വിജയപഥ് (1994), ഹഖീഖത്ത് (1995), തക്ഷക് (1999), ദൃശ്യം (2015), ഗോള്‍മാല്‍ എഗെയ്ന്‍ (2017), ദേ ദേ പ്യാര്‍ ദേ (2019) തുടങ്ങിയ ചിത്രങ്ങളില്‍ തബു അഭിനയിച്ചിട്ടുണ്ട്. ദൃശ്യം 2, തമിഴ് ചിത്രം കൈതിയുടെ റീമേക്ക് ആയ ആക്ഷന്‍ ഡ്രാമ ചിത്രം ഭോല എന്നിവയിലും തബുവും അജയും ഒന്നിച്ച്‌ സ്ക്രീന്‍ പങ്കിടുന്നുണ്ട്.

പിന്നീട്, ആര്‍ജെ സിദ്ധാര്‍ത്ഥ് കണ്ണനുമായി സംസാരിക്കവെ ഒരിക്കലും അജയ് ദേവ്ഗണ്‍ തന്നോട് വിവാഹം കഴിച്ച്‌ സ്ഥിരതാമസമാക്കാന്‍ ആവശ്യപ്പെടില്ലെന്നും തബു പറഞ്ഞു. "അവര്‍ക്ക് എന്നെ നന്നായി അറിയാം. എനിക്ക് എന്താണ് നല്ലതെന്നും അവര്‍ക്കറിയാം."

തബുവിന് എന്താണ് നല്ലത്? എന്ന് സിദ്ധാര്‍ത്ഥ് ചോദിച്ചപ്പോള്‍, "ഞങ്ങള്‍ അവള്‍ക്ക് നല്ലതാണ്" എന്നായിരുന്നു അജയിന്റെ മറുപടി. കുട്ടിക്കാലം മുതല്‍ ഞങ്ങളിങ്ങനെയാണെന്നും അജയ് പറഞ്ഞു. എന്തുകൊണ്ടാണ് തബു ഇപ്പോഴും സെറ്റില്‍ഡ് ആവാത്തത് എന്ന ചോദ്യത്തിന്, ഞാനവന്റെ കുടുംബത്തില്‍ സ്ഥിരതാമസമാക്കി എന്നായിരുന്നു തബുവിന്റെ രസകരമായ മറുപടി