കഥയല്ലിത്, സത്യം, കഥയെഴുത്തുകാർ ഇനി ഓൺലൈനിൽ!   "ഇ" ഇടം "കഥയിടം" വാട്സപ്പ് കൂട്ടായ്മ രൂപീകരിച്ചു

 മലയാള നാട്ടിലെ ചെറുകഥാകൃത്തുക്കൾ ഒത്തു ചേർന്ന് കഥയുടെ "ഇ" ഇടം "കഥയിടം" വാട്സപ്പ് കൂട്ടായ്മ രൂപീകരിച്ചു. ചെറുകഥയെ ഇഷ്ടപ്പെടുന്നവർക്ക് കഥ എഴുതി അവതരിപ്പിക്കുന്നതിനും കേൾക്കുന്നതിനുമായി കഥകളുടെ ഇ വേദി ആയാണ് മലയാള കഥയിടം വാട്ട്സാപ്പ് ഗ്രൂപ്പ് പ്രവർത്തനമാരംഭിച്ചിട്ടുള്ളതെന്ന് പ്രമുഖ സാഹിത്യകാരനും എം.ജി. യൂണിവേഴ്സിറ്റി റിട്ട. രജിസ്ട്രാറുമായ പുതുവേലി മാർ കുര്യാക്കോസ് കോളേജ് മലയാളം പ്രൊഫസറുമായ എലിക്കുളം ജയകുമാർ പറഞ്ഞു. ഇദ്ദേഹമാണ് മലയാള കഥയിടം ഗ്രൂപ്പിൻ്റെ പ്രധാന അഡ്മിൻ.

എലിക്കുളം ജയകുമാർ ചെയർമാനും, ജോബിൻ പൈക കൺവീനറുമായാണ് കഥയിടം പ്രവർത്തിക്കുന്നത്. മലയാള കഥയിടത്തിൻ്റെ ഉദ്ഘാടനം കഴിഞ്ഞ ദിവസം സാഹിത്യകാരൻ ബാബു കുഴിമറ്റം ഉദ്ഘാടനം ചെയ്തു. കേരളത്തിലെ ഒമ്പതു ജില്ലകളിൽ നിന്നായി 130 കഥാകൃത്തുക്കൾ ഇപ്പോൾ കൂട്ടായ്മയിലുണ്ട്.

കഥ എഴുതുന്നവരെയും ആസ്വദിക്കുന്നവരെയും കഥയെ പ്രോത്സാഹിപ്പിക്കുന്നവരെയുമാണ് നിലവിൽ ഗ്രൂപ്പിൽ അംഗങ്ങളാക്കിയിട്ടുള്ളത്.

എഴുതി തുടങ്ങുന്നവർക്ക് കഥയിടത്തിൽ പ്രത്യേക പരിഗണന നൽകും. മലയാള ചെറുകഥ നേരിടുന അവഗണന മറികടക്കാനും കഥാ സ്നേഹികളുടെ സാംസ്കാരിക കൂട്ടായ്മ വളർത്തിയെടുക്കാനും കൂടി ഉദ്ദേശിച്ചാണ് കഥയിടത്തിൻ്റെ പ്രവർത്തനമെന്നും സംഘാടകർ പറയുന്നു.

ദിവസേനയുള്ള കഥയ വതരണമാണ് ഗ്രൂപ്പിൻ്റെ ആകർഷണീയത. ഓരോരുത്തരും സ്വന്തം കഥകൾ വായിച്ച് ഓഡിയോ ആയും എഴുതിയും ഗ്രൂപ്പിലിടുന്നു. കൂടാതെ മാസത്തിൽ രണ്ടു തവണ കഥയരങ്ങും സംഘടിപ്പിക്കാൻ തീരുമാനിച്ചിട്ടുണ്ട്.

ഓഡിയോ ആയതിനാൽ വിശ്രമവേളകളിൽപ്പോലും കഥ കേട്ടു രസിക്കാമെന്നതാണ് സവിശേഷത. കഥയിടത്തിൻ്റെ ഉദ്ഘാടനത്തിനു ശേഷം ഇന്നലെ പ്രഥമ കഥയരങ്ങ് നടന്നു.

എലിക്കുളം ജയകുമാർ അധ്യക്ഷത വഹിച്ചു. ഡോ.ഹരികുമാർ ചങ്ങമ്പുഴ ഉദ്ഘാടനം ചെയ്തു. ഡോ.ആൻസി ജോസഫ് സ്വാതന്ത്ര്യ ദിന സന്ദേശം നൽകി. ഡോ.എൻ രേഖ, രവി പുലിയന്നൂർ, ഡി. ശ്രീദേവി എന്നിവരും കഥയിടത്തിലെ അംഗങ്ങളും കഥകൾ അവതരിപ്പിച്ചു. ആഗസ്റ്റ് 27 ന് "കഥയോണം" എന്ന പേരിൽ ഓണക്കഥകളുടെ അവതരണത്തിനായി ഒരുക്കങ്ങൾ നടന്നുവരുന്നു.

കഥയിടത്തിൽ ഏതൊരു കഥാകൃത്തിനും ചേരാം. അംഗമാകാൻ ആഗ്രഹിക്കുന്നവർ 9496116245-ൽ വിളിച്ച് വാട്സാപ്പ് നമ്പർ കൊടുത്താൽ മതി. കഥാകൃത്തുക്കളായ ചന്തിരൂർ താഹ, സലിം മുല്ലശ്ശേരി, ഉല്ലലബാബു. രാധാകൃഷ്ണൻ കാര്യാകുളം, എരമല്ലുർ സനൽകുമാർ, പി.ആർ.രാമചന്ദ്രൻ ,സുരേന്ദ്രൻ എഴുപുന്ന, ഗീതാകൃഷ്ണൻ തിരുവനന്തപുരം, പ്രൊഫ: രഘുദേവ്', മുരുകൻ തുടങ്ങിയവരുടെ നേതൃത്വത്തിൽ നിത്യ കഥാവതരണവും ആരംഭിച്ചിട്ടുണ്ട്.

ജീവിതത്തിൻ്റെ വിവിധ തുറകളിലുള്ള കഥാ സ്നേഹികൾ ഇപ്പോൾ കഥയിടത്തിലംഗമായിട്ടുണ്ട്. അതേ കഥയ്ക്ക മാത്രമൊരിടം, അതാണ് മലയാള കഥയിടം.