ഡിസംബർ 28 രാത്രി 9 മണിമുതൽ സീ കേരളത്തിൽ ആരംഭിക്കുന്ന പുതിയ സീരിയലിന്റെ വിശേഷങ്ങളുമായി നടി സ്വാസികയുമായുള്ള അഭിമുഖം

സത്യം ഡെസ്ക്
Friday, December 25, 2020

മനം പോലെ മംഗല്യത്തിലേത് ഏറെ വ്യത്യസ്തമായ കഥാപാത്രം, ഡിസംബർ 28 രാത്രി 9 മണിമുതൽ സീ കേരളത്തിൽ ആരംഭിക്കുന്ന പുതിയ സീരിയലിന്റെ വിശേഷങ്ങളുമായി നടി സ്വാസികയുമായുള്ള അഭിമുഖം

• മനം പോലെ മംഗല്യം എന്ന സീരിയലിനെപ്പറ്റി സ്വാസികക്ക് എന്താണ് പറയാനുള്ളത്?

നമ്മൾ വർഷങ്ങളായി മലയാള സീരിയലുകളിൽ കണ്ടു വരുന്നതിൽ നിന്നും തികച്ചും വ്യത്യസ്തമായ ഒരു കഥാതന്തുവാണ് മനംപോലെ മംഗല്യത്തിന്റേത്. സാധാരണമായി കണ്ടുവരുന്ന സീരിയലുകളിലെപ്പോലെ അമ്മായിമ്മ-മരുമകൾ,ഭാര്യ-ഭർത്താവ് കഥകളിൽ നിന്നും തികച്ചും വ്യത്യസ്തമായി ഈ കാലഘട്ടത്തിനു യോജിക്കുന്ന രീതിയിൽ പുരോഗമനപരമായ ആശയം പങ്കു വെക്കുന്ന ഒരു കഥയാണ് മനംപോലെ മംഗല്യത്തിന്റേത്.

• ഒരു നീണ്ട ഇടവേളയ്ക്കു ശേഷം മിനിസ്ക്രീനിലേക്ക് തിരിച്ചു വരുമ്പോൾ എന്താണ് തോന്നുന്നത്?

രണ്ട് വർഷത്തിന് ശേഷമാണ് ഞാൻ വീണ്ടും സീരിയൽ ചെയ്യുന്നത്. തീർച്ചയായും നല്ലൊരു കഥയ്ക്ക് വേണ്ടി കാത്തിരിക്കുയായിരുന്നു. സീരിയലുകളുടെ മേന്മ എന്തെന്നാൽ അതിലെ കഥാപാത്രങ്ങൾ എന്നും എപ്പോഴും ആൾക്കാരുടെ മനസ്സിൽ ഉണ്ടായിരിക്കും. അത് കൊണ്ട് തന്നെ ഇടവേള എടുത്തു എന്ന് തോന്നുന്നില്ല. കൂടാതെ എന്റെ ആദ്യ സീരിയലിന്റെ ഡയറക്ടറും ഗുരുവും കൂടിയായ എ എം നസീർ സാറിന്റെ സീരിയലിൽ കൂടെ തന്നെ തിരിച്ചു വരാൻ സാധിച്ചതിൽ വളരെയേറെ സന്തോഷമുണ്ട്.

• ഈ കഥാപാത്രം തിരഞ്ഞെടുക്കാനുള്ള കാരണം എന്താണ് ?

മുൻപ് ഞാൻ ചെയ്ത കഥാപാത്രങ്ങളിൽ കൂടുതലും എൻറെ യാഥാർഥ്യങ്ങളിൽ നിന്നും മാറി ഒരു കണ്ണീർ നായിക ഇമേജുള്ളവയായിരുന്നു.പക്ഷെ ഈ സീരിയലിൽ ഈ കാലഘട്ടത്തിനു യോജിക്കുന്ന ചിന്തകളും തീരുമാനങ്ങളും ഉള്ള രസകരമായ ഒരു കഥാപാത്രമാണുള്ളത്. സീരിയലുകളിൽ അങ്ങനെയൊരു കഥാപാത്രം കിട്ടുക എന്നത് വളരെ അപൂർവ്വമാണ്. അതാണ് എന്നെ ഈ കഥാപാത്രം തിരഞ്ഞെടുക്കാൻ പ്രോത്സാഹിപ്പിച്ചത്.

• ഈ കഥാപാത്രത്തിന്റെ എടുത്തു പറയാനുള്ള പ്രത്യേകത എന്തായിട്ടാണ് സ്വാസികയ്ക്കു തോന്നിയത്?

പുതിയ തലമുറയിലെ പെൺകുട്ടികൾക്ക് പലയിടത്തും അതിപ്പോൾ പല സാഹചര്യങ്ങൾ ആണെങ്കിലും സംസാരശൈലി ആണെങ്കിലും അവിടെയൊക്കെ നമ്മളെ തന്നെ കാണാൻ കഴിയുന്ന തരത്തിലുള്ള ഒരു കഥാപാത്രം ആണിത്. സാധാരണയിൽ നിന്ന് വ്യത്യസ്തമായി തികച്ചും രസകരമായ, പോസിറ്റീവായ ചിന്താരീതികളുള്ള ഒരു നായികാ കഥാപാത്രം.

• സീരിയലിന്റെ കഥാതന്തു സമൂഹത്തെ എങ്ങനെ സ്വാധീനിക്കും എന്നതിനെപ്പറ്റി ?

മലയാള സീരിയൽ ചരിത്രത്തിൽ ഇങ്ങനൊരു കഥ ഇത് വരേയും വന്നിട്ടില്ല. പുരോഗമനപരമായ,പോസിറ്റീവായ ഒരു ചിന്ത ആളുകളിലേക്കെത്തിക്കുക എന്ന ഒരു ശ്രമമാണ് നമ്മൾ ഈ സീരിയലിലൂടെ നടത്തുന്നത്. എങ്ങനെ ജീവിക്കണം എന്ത് തീരുമാനമെടുക്കണം എന്നതിലൊക്കെ സ്ത്രീകളുടെ മേൽ സമൂഹത്തിനെപ്പോഴും അളവുകോലുകൾ ഉണ്ട്. അതിൽ തന്നെ ഒരുപാട് ആളുകൾ മാറി ചിന്തിക്കാൻ ആഗ്രഹിക്കുന്നുണ്ട്. വിധവയായിട്ടുള്ള സ്ത്രീകളുടെ ജീവിതം പലപ്പോഴും സമൂഹത്തിന്റെ നിയന്ത്രണത്തിലാവാറുണ്ട് .

എല്ലാവർക്കും ഒരു ജീവിതം ഉണ്ട് പ്രായത്തിനപ്പുറം സമൂഹത്തിന്റെ പിന്തുണ കൂടിയുണ്ടെങ്കിൽ എല്ലാവരുടെയും ജീവിതം മനോഹരമാകും. യഥാർത്ഥ ജീവിതത്തിലും ഇതേ പോലെയുള്ള കഥകൾ യാഥാർഥ്യമാകും. കാരണം ഒരുപാട് പേരെ എനിക്ക് നേരിട്ടറിയാം. ഈയിടെ സമൂഹമാധ്യമങ്ങളിലും ഇതേ പോലുള്ള നല്ല വാർത്തകൾ നമ്മൾ കണ്ടിരുന്നു . നല്ല മാറ്റങ്ങൾ എന്നും ആവശ്യം തന്നെയാണ്.

• സംസ്ഥാന അവാർഡ് കിട്ടിയപ്പോൾ എന്താണ് തോന്നിയത് ?

ശരിക്കും അപ്രതീക്ഷിതമായി ജീവിതത്തിൽ സംഭവിച്ച ഒരു കാര്യമായിരുന്നു അത്. ഫീച്ചർ ഫിലിം ആയതു കൊണ്ട് ചെയ്തോണ്ടിരിക്കുമ്പോൾ തന്നെ ശ്രദ്ധിക്കപ്പെടണം എന്ന് ആഗ്രഹിച്ചിട്ടുണ്ടായിരുന്നു. ഭാഗ്യവശാൽ ഞങ്ങളുടെ സിനിമയ്ക്കു 3 അവാർഡുകൾ കിട്ടി. നല്ലൊരു കാര്യമാണ് സംഭവിച്ചത്. അവാർഡ് കിട്ടി എന്നത് കൊണ്ട് ജീവിത ശൈലിയിൽ വലിയ മാറ്റങ്ങൾ ഒന്നുമുണ്ടായിട്ടില്ല.

• ഏത് പ്രായത്തിലും പ്രണയം സംഭവിക്കാമെന്നു സ്വാസിക വിശ്വസിക്കുന്നുണ്ടോ?

തീർച്ചയായും. പ്രണയത്തിനു അതിർവരമ്പുകളില്ല. പ്രായത്തിനും സൗന്ദര്യത്തിനുമൊക്കെ അതീതമായി പ്രണയത്തിനുള്ള സ്വാഭാവികത മനസ്സിലാക്കേണ്ടതാണ്. കുറച്ച പ്രായമായിക്കഴിഞ്ഞതിനു ശേഷം രണ്ടു പേർ പ്രണയിക്കുന്നു എന്നത് വളരെ മനോഹരമായാണ് ഈ സീരിയലിൽ ചിത്രീകരിച്ചിരിക്കുന്നത്.

• ഈ കഥ കേട്ട് കഴിഞ്ഞപ്പോൾ എന്താണ് മനസ്സിൽ ആദ്യം വന്നത്?

മരുമകൾ പിന്തുണക്കുന്ന അമ്മായിയമ്മ അല്ലെങ്കിൽ വെറുപ്പ് കലരാത്ത അമ്മായിയമ്മ- മരുമകൾ ബന്ധം എന്ന ഒരു ആശയമാണ് എന്നെ ഈ സീരിയലിലേക്ക് ആകർഷിച്ചത്. പോസിറ്റീവ് ആയ രീതിയിൽ ആളുകളെ സ്വാധീനിക്കാൻ കഴിയും എന്നതും ഈ സീരിയലിന്റെ ഒരു പ്രത്യേകതയാണ്.

• കൂടെ അഭിനയിച്ച ആർട്ടിസ്റ്റുകളെപ്പറ്റി എന്താണ് പറയാനുള്ളത്?

മീര ചേച്ചി , ശ്രീകാന്ത്, നിയാസ് ഇക്ക എന്നിവരാണ് മറ്റു പ്രധാന കഥാപാത്രങ്ങളായി എത്തുന്നത്. പരിചയപ്പെട്ടിട്ട് കുറച്ചു നാളെ ആയുള്ളെങ്കിലും എല്ലാവരുമായും ഞാൻ നല്ല സൗഹൃദമായിരുന്നു. ലൊക്കേഷനിലും എല്ലാവരുമായി രസകരമായ അനുഭവങ്ങളാണുണ്ടായിരുന്നത്.

• 2020 എന്ന വർഷം സ്വാസികയ്ക്കു എങ്ങനെ ഉണ്ടായിരുന്നു?

2020 എനിക്ക് വളരെ നല്ല വർഷമായി തോന്നി. എന്തെന്നാൽ 2020ൽ ആണ് സ്റ്റേറ്റ് അവാർഡ് എന്ന കാര്യം എന്റെ ജീവിതത്തിൽ സംഭവിച്ചത്. ഒക്ടോബർ 13 രാവിലെ 10:30 നു സംസ്ഥാന അവാർഡ് പുരസ്കാര ജേതാക്കളെ പ്രഖ്യാപിക്കുന്ന ആ നിമിഷം എന്നും പ്രിയപ്പെട്ടതായിരിക്കും. കൂടുതൽ ആളുകളേയും കോറോണയുടെ ബുദ്ധിമുട്ടുകൾ ബാധിച്ചിരുന്നെങ്കിലും ദൈവാനുഗ്രഹത്താൽ നല്ല സന്തോഷങ്ങളാണ് 2020 ൽ എന്റെ ജീവിതത്തിൽ സംഭവിച്ചത്.

• സംസ്ഥാന അവാർഡ് കിട്ടിയപ്പോൾ സ്വാസികയുടെ പ്രതികരണം എന്തായിരുന്നു?

വാക്കുകളിൽ പ്രകടിപ്പിക്കാവുന്നതിനപ്പുറമുള്ള ഒരു അനുഭവമായിരുന്നു എനിക്കത്. ഒട്ടും പ്രതീക്ഷിക്കാതെ ഇങ്ങനൊരു അംഗീകാരം ലഭിച്ചപ്പോൾ ഒരുപാട് സന്തോഷമായി. ഒരുപാട് പേര് വിളിക്കുന്നു, അഭിനന്ദിക്കുന്നു ശരിക്കും ഒരു സ്വപ്നലോകത്തിൽ നിൽക്കുന്ന പോലെയുള്ള അനുഭവമായിരുന്നു അത്.

• മിനിസ്ക്രീനിലേക്ക് തിരികെ എത്തുമ്പോൾ പ്രേക്ഷകരുടെ പ്രതികരണം എന്താണ് ?

സാധാരണയായി ഞാൻ ചെയ്തു വരുന്ന കഥാപാത്രങ്ങളിൽ നിന്നും തികച്ചും വ്യത്യസ്തമായ ഒന്നാണ് മനം പോലെ മംഗല്യത്തിലേത്. അത് കൊണ്ട് തന്നെ പ്രേക്ഷകർ ഈ കഥാപാത്രത്തെ എങ്ങനെ സ്വീകരിക്കും എന്ന ആകാംക്ഷയുണ്ട്. കൂടുതൽ പേർക്കും നാടൻ കഥാപാത്രമായി എന്നെക്കാണാനാണ് ഇഷ്ടം. പക്ഷെ അതിൽ നിന്നൊക്കെ വ്യത്യസ്തമായാണ് എന്റെ കഥാപാത്രത്തെ ഈ സീരിയലിൽ അവതരിപ്പിച്ചിരിക്കുന്നത്.

മനംപോലെ മംഗല്യം ഈ ഡിസംബർ 28 മുതൽ തിങ്കൾ മുതൽ ശനി വരെ രാത്രി 9 മണിക്ക് സീ കേരളത്തിൽ

×