ചേനയാണെന്ന് കരുതി വാക്കത്തികൊണ്ട് വെട്ടിപ്പൊളിച്ചു; വീട്ടുമുറ്റത്ത് കിടന്ന പന്നിപ്പടക്കം പൊട്ടിത്തെറിച്ച് യുവതിക്ക് ഗുരുതര പരിക്ക്, ഇടതു കൈപ്പത്തി ചിതറിത്തെറിച്ചു, കാഴ്ച നഷ്ടമായി, മുടി കത്തിക്കരിഞ്ഞ നിലയിൽ

കൊല്ലം: കടയ്ക്കലിൽ പന്നിപ്പടക്കം പൊട്ടിത്തെറിച്ച്  യുവതിയ്ക്ക് ഗുരുതര പരിക്ക്. ടിടിസി വിദ്യാർഥിനിയും വീട്ടമ്മയുമായ രാജി(35)ക്കാണ്  പരിക്കേറ്റത്. ഇടത് കൈപ്പത്തി ചിതറിത്തെറിച്ചു. ഒരു കണ്ണിന്‍റെ കാഴ്ച നഷ്ടമായി. കാൽപ്പത്തിയ്ക്കും പരിക്കേറ്റിട്ടുണ്ട്. മുടി കത്തിക്കരിഞ്ഞ നിലയിലാണ്.

ഇന്ന് രാവിലെ എട്ടേകാലോടെയാണ് സംഭവം.  വീട്ടുമുറ്റത്ത് നിന്നാണ് രാജിക്ക് പന്നിപ്പടക്കം കിട്ടിയത്. ചേനയോ മറ്റോ ആണെന്ന് കരുതി വാക്കത്തികൊണ്ട് വെട്ടിപ്പൊളിച്ചപ്പോഴാണ് ഉഗ്രസ്ഫോടനത്തോടെ പന്നിപ്പടക്കം പൊട്ടിത്തെറിച്ചത്. ഉടൻതന്നെ രാജിയെ താലൂക്ക് ആശുപത്രിയിലേക്കും പിന്നീട് തിരുവനന്തപുരം മെഡിക്കൽ കോളജിലേക്കും മാറ്റി.