തിരുവനന്തപുരം: സ്വര്ണക്കടത്ത് കേസില് മുഖ്യമന്ത്രിയുടെ ഓഫീസിന് പങ്കുണ്ടെന്ന ആരോപണങ്ങള് തള്ളി മുഖ്യമന്ത്രി പിണറായി വിജയന്. പ്രതിക്കുവേണ്ടി മുഖ്യമന്ത്രിയുെട ഓഫിസില് നിന്ന് വിളിച്ചുവെന്ന ആരോപണം അസംബന്ധമാണ്.
ഒരു കേസിലേയും തെറ്റുകാരെ സംരക്ഷിക്കുന്ന ലാവണമല്ല മുഖ്യമന്ത്രിയുടെ ഓഫീസെന്ന് നാല് വര്ഷക്കാലത്തെ പ്രവര്ത്തനത്തിലൂടെ ജനങ്ങള്ക്ക് ബോധ്യമുണ്ട്. അത് കളങ്കപ്പെടുത്താന് സുരേന്ദ്രന്റെ നാവ് കൊണ്ട് സാധിക്കില്ലെന്നും സ്വര്ണക്കടത്ത് കേസില് മുഖ്യമന്ത്രിയുടെ ഓഫീസിന് പങ്കുണ്ടെന്ന ബിജെപി സംസ്ഥാന അധ്യക്ഷന് കെ.സുരേന്ദ്രന്റെ ആരോപണം സംബന്ധിച്ച് മാധ്യമപ്രവര്ത്തകരുടെ ചോദ്യത്തിന് മറുപടിയായി മുഖ്യമന്ത്രി പറഞ്ഞു.
ഏതെങ്കിലും സംഭവമുണ്ടായാല് മുഖ്യമന്ത്രിയെയും മുഖ്യമന്ത്രിയുടെ ഓഫീസിനേയും എങ്ങനെയെങ്കിലും പെടുത്താമെന്നാണ് ചിലര് ആലോചിച്ച് നടക്കുന്നത്. അതിന്റെ ഭാഗമായാണ് ബിജെപി സംസ്ഥാന പ്രസിഡന്റിന്റെ ആരോപണം. ഈ കേസ് അന്വേഷിക്കുന്നത് കസ്റ്റംസാണെന്ന് അദ്ദേഹം മനസിലാക്കണം. അവരത് കൃത്യമായി അന്വേഷിക്കുമെന്ന് തന്നെയാണ് കരുതുന്നതെന്നും മുഖ്യമന്ത്രി പറഞ്ഞു.
സംസ്ഥാന സര്ക്കാര് അന്വേഷണത്തിനു മുഴുവന് പിന്തുണയും നല്കും. ഈ ഘട്ടത്തില് അവരെ അഭിനന്ദിക്കുന്നു. തെറ്റു ചെയ്യുന്നവര്ക്കു മറ്റു ദുരാരോപണങ്ങള് ഉന്നയിച്ചു പരിരക്ഷ നല്കുന്ന സമീപനം പാടില്ല– അദ്ദേഹം പറഞ്ഞു. എങ്ങനെ ഐടി വകുപ്പില് സ്വപ്ന എത്തി എന്ന ചോദ്യത്തിന് താനറിഞ്ഞല്ല ആ നിയമനം. കൂടുതല് അറിയില്ല എന്നായിരുന്നു മുഖ്യമന്ത്രിയുടെ മറുപടി.