/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/FBAILPn2NwsdPbKTQudL.jpg)
ആറ് സംസ്ഥാനങ്ങളിലെ ഏഴ് സീറ്റുകളിലേക്ക് നടന്ന ഉപതിരഞ്ഞെടുപ്പില് മൂന്ന് സീറ്റ് വീതം സ്വന്തമാക്കി ബിജെപിയും പ്രതിപക്ഷ സഖ്യം ഇന്ത്യയിലെ അംഗങ്ങളും. ഉത്തര്പ്രദേശിലെ ഘോസിയില് ഇന്ത്യ സഖ്യത്തിന്റെ പിന്തുണയുള്ള അഖിലേഷ് യാദവിന്റെ സമാജ്വാദി പാര്ട്ടി എതിരാളികളായ ബിജെപിയെക്കാള് മുന്നിലാണ്. ത്രിപുരയിലെ ബോക്സാനഗര്, ധന്പൂര് സീറ്റുകളില് ബിജെപി വിജയിച്ചു. സ്ഥാനാര്ത്ഥികളായ തഫജ്ജല് ഹൊസൈനും ബിന്ദു ദേബ്നാഥും യഥാക്രമം 30,237, 18,871 വോട്ടുകള്ക്കാണ് വിജയിച്ചത്.
പുതുപ്പള്ളി മണ്ഡലത്തില് കോണ്ഗ്രസിന്റെ ചാണ്ടി ഉമ്മന് വിജയിച്ചു. സി.പി.ഐ എമ്മിന്റെ സ്ഥാനാര്ത്ഥിയായ ജെയ്ക് സി തോമസിനെ 37000 ഓളം വോട്ടുകള്ക്ക് പരാജയപ്പെടുത്തിയാണ് ചാണ്ടി ഉമ്മന് മണ്ഡലം നിലനിര്ത്തിയത്. ഉമ്മന്ചാണ്ടിയുടെ മരണത്തെ തുടര്ന്നാണ് പുതുപ്പള്ളിയില് ഉപതിരഞ്ഞെടുപ്പ് നടന്നത്. അതേസമയം ഇന്ത്യ സഖ്യത്തില് കോണ്ഗ്രസും സിപിഎമ്മും സഖ്യകക്ഷികളാണ്.
ഉത്തരാഖണ്ഡിലെ ബാഗേശ്വര് സീറ്റ് ബിജെപി നിലനിര്ത്തി. കോണ്ഗ്രസിന്റെ ബസന്ത് കുമാറിനെ 2,400 വോട്ടുകള്ക്കാണ് പാര്വതി ദാസ് പരാജയപ്പെടുത്തിയത്. അതുപോലെ ഇന്ത്യ സഖ്യത്തിന്റെ ഘടകകക്ഷിയായ ജാര്ഖണ്ഡ് മുക്തി മോര്ച്ചയുടെ ബേബി ദേവി, 17,000-ത്തിലധികം വോട്ടുകളുടെ ഭൂരിപക്ഷത്തില് ദുമ്രി ഉപതിരഞ്ഞെടുപ്പില് വിജയിച്ചു. എജെഎസ്യുവിന്റെ യശോദാ ദേവിയെയാണ് ഇവര് പരാജയപ്പെടുത്തിയത്.
പശ്ചിമ ബംഗാളില് മമത ബാനര്ജിയുടെ തൃണമൂല് കോണ്ഗ്രസ് 4,300-ലധികം വോട്ടുകള്ക്ക് ബിജെപിയില് നിന്ന് ധൂപ്ഗുരി സീറ്റ് പിടിച്ചെടുത്തു. ഈ വര്ഷം അവസാനം നടക്കാനിരിക്കുന്ന അഞ്ച് സംസ്ഥാന നിയമസഭാ തിരഞ്ഞെടുപ്പുകളിലേക്കും 2024 ലെ നിര്ണായക ലോക്സഭാ തെരഞ്ഞെടുപ്പിനും മുന്നോടിയായി, ബിജെപി നേതൃത്വത്തിലുള്ള എന്ഡിഎയ്ക്കെതിരെ രൂപീകരിച്ച ഇന്ത്യന് നാഷണല് ഡെവലപ്മെന്റ് ഇന്ക്ലൂസീവ് അലയന്സ് (ഇന്ത്യ) സഖ്യത്തിന്റെ ചവിട്ടുപടിയായാണ് ഈ ഉപതിരഞ്ഞെടുപ്പ് ഫലങ്ങളെ കാണക്കാക്കുന്നത്.
ഉത്തരാഖണ്ഡിലെ ബാഗേശ്വര്, ഉത്തര്പ്രദേശിലെ ഘോസി, പുതുപ്പള്ളി, പശ്ചിമ ബംഗാളിലെ ധുപ്ഗുരി, ജാര്ഖണ്ഡിലെ ദുമ്രി, ത്രിപുരയിലെ ബോക്സാനഗര്, ധന്പൂര് എന്നിവയാണ് ഉപതിരഞ്ഞെടുപ്പ് നടന്ന ഏഴ് സീറ്റുകള്.