മദ്യനയക്കേസ്: എഎപി എംപി സഞ്ജയ് സിംഗിന്റെ വസതിയിൽ ഇഡി പരിശോധന നടത്തി

ഡൽഹി മദ്യനയക്കേസുമായി ബന്ധപ്പെട്ട് ആം ആദ്മി പാർട്ടി (എഎപി) രാജ്യസഭാ എംപി സഞ്ജയ് സിംഗിന്റെ വസതിയിൽ എൻഫോഴ്‌സ്‌മെന്റ് ഡയറക്ടറേറ്റിന്റെ സംഘം പരിശോധന നടത്തി. കേസിൽ എംപിയുമായി അടുപ്പമുള്ള പലരുടെയും സ്ഥലങ്ങളിൽ നേരത്തെ ഇഡി പരിശോധന നടത്തിയിരുന്നു. പരിശോധനയുമായി ബന്ധപ്പെട്ട വീഡിയോ വാർത്താ ഏജൻസിയായ എഎൻഐ പുറത്തുവിട്ടു. 

മദ്യനയ കുംഭകോണക്കേസിൽ പ്രതിയായ വ്യവസായി ദിനേഷ് അറോറ ഡൽഹി മുഖ്യമന്ത്രി അരവിന്ദ് കെജ്രിവാളിനെ അദ്ദേഹത്തിന്റെ വസതിയിൽ സഞ്ജയ് സിംഗിന്റെ സാന്നിധ്യത്തിൽ കണ്ടിരുന്നതായി ഇഡി സമർപ്പിച്ച കുറ്റപത്രത്തിൽ പറയുന്നു. ഒരു പരിപാടിക്കിടെ താൻ സഞ്ജയ് സിംഗിനെ കണ്ടിരുന്നുവെന്നും തുടർന്ന് മുൻ ഉപമുഖ്യമന്ത്രി മനീഷ് സിസോദിയയുമായി ബന്ധപ്പെട്ടതായും അറോറ ഇഡിയോട് പറഞ്ഞു. 

ഡൽഹി തിരഞ്ഞെടുപ്പിന് മുന്നോടിയായി ധനസമാഹരണത്തിനാണ് കൂടിക്കാഴ്ചകൾ സംഘടിപ്പിച്ചതെന്ന് വൃത്തങ്ങൾ അറിയിച്ചു. അറോറയെ ഇഡിയും സിബിഐയും അറസ്റ്റ് ചെയ്തിട്ടുണ്ട്. വൈഎസ്ആർ കോൺഗ്രസ് പാർട്ടി ലോക്‌സഭാ എംപി മഗുന്ത ശ്രീനിവാസുലു റെഡ്ഡിയുടെ മകൻ രാഘവ് മഗുണ്ടയ്ക്കും ദിനേശ് അറോറയ്ക്കും ഡൽഹി മദ്യനയ അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ അപ്രൂവറായി മാറാൻ ചൊവ്വാഴ്ച ഡൽഹി കോടതി അനുമതി നൽകിയിരുന്നു. ഡൽഹി ലഫ്റ്റനന്റ് ഗവർണർ വികെ സക്‌സേന അഴിമതി ആരോപണത്തിൽ സിബിഐ അന്വേഷണത്തിന് ശുപാർശ ചെയ്തതോടെയാണ് മദ്യനയം റദ്ദാക്കിയത്.

മദ്യക്കച്ചവടക്കാര്‍ക്ക് ലൈസന്‍സ് നല്‍കാനുള്ള ഡല്‍ഹി സര്‍ക്കാരിന്റെ 2021-22 ലെ എക്‌സൈസ് നയത്തില്‍, കൈക്കൂലി വാങ്ങി ചില ഡീലര്‍മാര്‍ക്ക് അനുകൂലമായി നല്‍കി എന്നാണ് ആരോപണം. അതേസമയം എഎപി ഇതിനെ ശക്തമായി നിഷേധിക്കുകയും പിന്നീട് നയം റദ്ദാക്കുകയും ചെയ്തു. എഎപിയുടെ നടപടിയെത്തുടർന്ന് ഡൽഹി ലെഫ്റ്റനന്റ് ഗവർണർ വികെ സക്‌സേന, എക്‌സൈസ് നയം നടപ്പാക്കിയതിലെ ചട്ടലംഘനങ്ങളും നടപടിക്രമങ്ങളിലെ പിഴവുകളും സംബന്ധിച്ച് സിബിഐ അന്വേഷണത്തിന് ശുപാർശ ചെയ്തു.

ഉപമുഖ്യമന്ത്രിയുടെ വീടുൾപ്പെടെ രാജ്യത്തെ വിവിധ സ്ഥലങ്ങളിൽ കേന്ദ്ര അന്വേഷണ ഏജൻസികൾ ഒന്നിലധികം തവണ പരിശോധന നടത്തിയിരുന്നു. അഴിമതി ആരോപണത്തെച്ചൊല്ലി എഎപിയും ബിജെപിയും തമ്മിൽ തർക്കമുണ്ട്.