ബലിപെരുന്നാള്‍ ആഘോഷ നിറവിൽ യുഎഇ; സമ്മര്‍ സര്‍പ്രൈസും സം​ഗീത സന്ധ്യയും പെരുന്നാൾ ആഘോഷത്തിന്റെ മാറ്റുകൂട്ടും

ദുബായ്: ബലിപെരുന്നാൾ ആഘോഷങ്ങളുടെ തിരക്കിലാണ് യുഎഇ. ഇത്തവണ ആറ് ദിവസത്തെ പെരുന്നാൾ അവധി കൂടി ലഭിച്ചപ്പോൾ കുട്ടികളും മുതിർന്നവരും ആഘോഷ ലഹരിയിലാണ്.

നീണ്ട അവധി ദിനങ്ങളെ ആഘോഷം കൊണ്ട് നിറയ്ക്കാന്‍ നിരവധി പരിപാടികളാണ് യുഎഇയിലെ ഓരോ എമിറേറ്റും ആസൂത്രണം ചെയ്തിരിക്കുന്നത്. കരിമരുന്ന് പ്രയോഗം, സംഗീത കച്ചേരികള്‍, തത്സമയ പ്രകടനങ്ങള്‍, ഷോപ്പിംഗ് വിസ്മയങ്ങള്‍, വര്‍ക്ക്‌ഷോപ്പുകള്‍, മീറ്റ്- ആന്‍ഡ്- ഗ്രീറ്റുകള്‍, കലാ പരിപാടികള്‍ ഇങ്ങനെ നീണ്ടു പോവുന്നു ദിവസങ്ങളും ആഴ്ചകളും നീളുന്ന ആഘോഷ പരിപാടികള്‍

ദുബായ് ഫെസ്റ്റിവല്‍ സിറ്റി​

ഇത്തവണ ദുബായിലെ ഈദ് അല്‍ അദ്ഹ ആഘോഷ പരിപാടികള്‍ ആരംഭിക്കുന്നത് തന്നെ പ്രശസ്തമായ ദുബായ് സമ്മര്‍ സര്‍പ്രൈസസോടെംയാണ്. ദുബായിലെ വേനല്‍ക്കാലത്ത് ഇതിലും ആവേശകരമായ ഒരു തുടക്കം ഇതിനു മുമ്പ് ഉണ്ടായിട്ടുണ്ടാവില്ല.

ജൂണ്‍ 27 മുതല്‍ ജൂലൈ 1 വരെയുള്ള അഞ്ചു ദിവസങ്ങളില്‍ രാത്രി 9 മണിക്ക് ദുബായ് പാര്‍ക്കുകള്‍ക്കും റിസോര്‍ട്ടുകള്‍ക്കും മുകളിലുള്ള ആകാശം പൈറോ ടെക്‌നിക്കുകളാല്‍ ദൃശ്യവിസ്മയം തീര്‍ക്കുമെന്ന് ദുബായ് ഫെസ്റ്റിവല്‍സ് ആന്‍ഡ് റീട്ടെയില്‍ എസ്റ്റാബ്ലിഷ്മെന്റ് അറിയിച്ചു. ദിവസവും രാത്രി 8 മണിക്ക് ഡിനോ പരേഡും പ്രശസ്ത ദുബായ് തീം പാര്‍ക്കിലെ മറ്റു വിനോദങ്ങളും വേറെ. ഈദ് അല്‍ അദ്ഹയുടെ രണ്ടാം ദിവസം ജൂണ്‍ 29 ന് രാത്രി 9 മണിക്ക് ദുബായ് ഫെസ്റ്റിവല്‍ സിറ്റിയില്‍ മനോഹരമായ കരിമരുന്ന് പ്രദര്‍ശനവും നടക്കും.

​​സംഗീത സന്ധ്യകള്‍​

ഈദ് വാരാന്ത്യവും അവിശ്വസനീയമായ സംഗീത പരിപാടികളാല്‍ നിറയും. അറബ് ലോകത്തെ ഏറ്റവും ജനപ്രിയ ഗായകരായ ഹുസൈന്‍ അല്‍ ജാസ്മിയുടെയും കാദിം അല്‍ സാഹിറിന്റെയും സംഗീത വിരുന്ന് ജൂലൈ 2ന് കൊക്കകോള അരീനയെ ഇളക്കിമറിക്കും. അതിനുമുമ്പ് സൗദി ഗായകന്‍ മുഹമ്മദ് അബ്ദുവിന്റെ ഗംഭീരമായ സംഗീതപരിപാടി ഇവിടെ തന്നെ ജൂലൈ 1-ന് നടക്കുന്ന ഈദ് ഷോയുടെ ഭാഗമായി നടക്കും. ജൂലൈ 3-ന് ദുബായ് ഓപ്പറയില്‍ യുകെയിലെ പ്രധാന ഹാസ്യതാരങ്ങളായ റോബ് ബെക്കറ്റും ജോഷ് വിഡ്ഡികോമ്പും ആസ്വാദകരെ ചിരിപ്പിച്ചുകൊല്ലും.

​ദുബായ് മാളുകളിലും ആഘോഷം

ദുബായിലുടനീളമുള്ള മാളുകളും വ്യാപാര സ്ഥാപനങ്ങളും വസ്ത്രങ്ങള്‍, പാദരക്ഷകള്‍, ആക്‌സസറികള്‍, സുഗന്ധദ്രവ്യങ്ങള്‍, ഗൃഹാലങ്കാരങ്ങള്‍, ഇലക്ട്രോണിക് സാധനങ്ങള്‍ എന്നിവ 75 ശതമാനം വരെ വിലക്കുറവില്‍ ലഭ്യമാകുന്ന മെഗാ ഡീലുകള്‍ ഓഫര്‍ ചെയ്യുന്നുണ്ട്.

മെര്‍ക്കാറ്റോ മാളില്‍ ജൂണ്‍ 28 മുതല്‍ ജൂലൈ 9 വരെയുള്ള ദിവസങ്ങളില്‍ സര്‍ക്കസ് ഫിയസ്റ്റയും ഷോകളും സംഘടിപ്പിക്കും. ജൂണ്‍ 29 മുതല്‍ ജൂലൈ 29 വരെ എല്ലാ ദിവസവും ഉച്ചയ്ക്ക് 2 മുതല്‍ രാത്രി 10 വരെ, ജസ്റ്റീസ് ലീഗില്‍ നിന്നുള്ള സൂപ്പര്‍മാന്‍, ബാറ്റ്മാന്‍, വണ്ടര്‍ വുമണ്‍, ദി ഫ്‌ളാഷ് എന്നിവരെ കാണാനുള്ള അവസരത്തിനായി സൂപ്പര്‍ഹീറോ ആരാധകര്‍ക്ക് നഖീല്‍ മാളിലേക്ക് വരാം.

​പരമ്പരാഗത ഇമാറാത്തി ബാന്‍ഡ്​

ഇബ്ന്‍ ബത്തൂത്ത മാളിലെ ഇന്ത്യാ കോര്‍ട്ടിലും ഈജിപ്ത് കോര്‍ട്ടിലും ബാറ്റ്മാന്‍ ആരാധകര്‍ക്കായി പ്രത്യേക വിരുന്ന് ഒരുക്കിയിട്ടുണ്ട്. ബാറ്റ്മാന്‍: ലെജന്‍ഡ്‌സ് ഓഫ് ദ ഡാര്‍ക്ക് നൈറ്റ് എന്ന പേരില്‍ സംവേദനാത്മക വെര്‍ച്വല്‍ റിയാലിറ്റി അനുഭവങ്ങളും വര്‍ക്ക്‌ഷോപ്പുകളും മീറ്റ് ആന്‍ഡ് ഗ്രീറ്റ് പരിപാടിയും ആസ്വദിക്കാം. ജൂണ്‍ 29 മുതല്‍ ജൂലൈ 29 വരെ, എല്ലാ ദിവസവും ഉച്ചയ്ക്ക് 2 മുതല്‍ രാത്രി 10 വരെയാണ് പരിപാടി. ഇതിനു പുറമെ, ബലി പെരുന്നാളിന്റെ ഒന്നും രണ്ടും ദിവസങ്ങളില്‍ സിറ്റി സെന്റര്‍ മിര്‍ദിഫ്, സിറ്റി വാക്ക്, ദുബായ് ഫെസ്റ്റിവല്‍ സിറ്റി, ഇബ്ന്‍ ബത്തൂത്ത മാള്‍ എന്നിവിടങ്ങളിലും പെരുന്നാളിന്റെ രണ്ടും മൂന്നും ദിവസങ്ങളില്‍ ഫെസ്റ്റിവല്‍ പ്ലാസ മാള്‍, ദേര സിറ്റി സെന്റര്‍, നഖീല്‍ മാള്‍, സര്‍ക്കിള്‍ മാള്‍, ഔട്ട്‌ലെറ്റ് വില്ലേജ് എന്നിവിടങ്ങളിലും വൈകുന്നേരം 4 മണി മുതല്‍ പരമ്പരാഗത ഇമാറാത്തി ബാന്‍ഡിന്റെ അവതരണമുണ്ടാകും.

​അബുദാബിയിലെ ആഘോഷം

അബുദാബിയില്‍ ഈദുല്‍ അദ്ഹയ്ക്കായി വ്യത്യസ്തമായ പരിപാടികളാണ് ആസൂത്രണം ചെയ്തിരിക്കുന്നത്. ജൂണ്‍ 28 ബുധനാഴ്ച അബുദാബി കോര്‍ണിഷില്‍ ഈദ് വെടിക്കെട്ട് നടക്കും. അബുദാബിയിലെ യാസ് മാള്‍ ലൈവ് വിനോദ പരിപാടികളുമായി ഇതിനകം തന്നെ ആഘോഷപരിപാടികള്‍ക്ക് തുടക്കമിട്ടു കഴിഞ്ഞു. ടൗണ്‍ സ്‌ക്വയറിലാവട്ടെ, കുട്ടികള്‍ക്കായുള്ള വിവിധ പരിപാടികള്‍, കലകളുടെയും കരകൗശലങ്ങളുടെയും പ്രദര്‍ശനം, ഗഹ്വ കാരിക്കേച്ചര്‍, മൈലാഞ്ചി ആര്‍ട്ട് എന്നിവയുള്‍പ്പെടെ വിവിധ പരിപാടികളും നടക്കും.

ഷോപ്പര്‍മാരെ രസിപ്പിക്കുന്നതിനായി സംഗീതപരിപാടികളും മാളില്‍ ഒരുക്കിയിട്ടുണ്ട്. ജൂലൈ 1 വരെയുള്ള ദിവസങ്ങളില്‍ മൂന്ന് തവണയായി പരമ്പരാഗത ഹര്‍ബിയ്യ നൃത്തവവും അരങ്ങേറും. മനാറത്ത് അല്‍ സാദിയാത്തിലാവട്ടെ, ഈദുല്‍ അദ്ഹയില്‍ 3 മുതല്‍ 11 വയസ്സുവരെയുള്ള കുട്ടികള്‍ക്കായി ആര്‍ട്ട് വര്‍ക്ക്‌ഷോപ്പുകള്‍ പോലുള്ള വിവിധ ഇവന്റുകള്‍ സംഘടിപ്പിക്കുന്നുണ്ട്. സൗജന്യമായി നടത്തുന്ന ഈ പരിപാടിയുടെ സമയം വ്യാഴാഴ്ച മുതല്‍ ഞായര്‍ വരെയുള്ള ദിവസങ്ങളില്‍ രാവിലെ 10 മുതല്‍ വൈകുന്നേരം 6 വരെയായിരിക്കും.

​കുട്ടികള്‍ക്കായി സൗജന്യ വിനോദ പരിപാടികള്‍​

യാസ് തീം പാര്‍ക്കിസിലും കുട്ടികള്‍ക്കായി വിവിധ സൗജന്യ ഓഫര്‍ പ്രഖ്യാപിച്ചിട്ടുണ്ട്. 12 വയസ്സിന് താഴെയുള്ള കുട്ടികള്‍ക്ക് ഫെരാരി വേള്‍ഡ്, യാസ് വാട്ടര്‍വേള്‍ഡ്, വാര്‍ണര്‍ ബ്രദേഴ്സ് വേള്‍ഡ് അബുദാബി എന്നിവയുള്‍പ്പെടെ മൂന്ന് ലോകോത്തര തീം പാര്‍ക്കുകളിലേക്ക് സൗജന്യ പ്രവേശനം ലഭിക്കും. മുതിര്‍ന്നവരുടെ പ്രവേശന ടിക്കറ്റിനൊപ്പമാണ് കുട്ടികള്‍ക്ക് കോംപ്ലിമെന്ററി ടിക്കറ്റ് ലഭിക്കുക.

ഡീര്‍ഫീല്‍ഡ്‌സ് മാള്‍ ആവട്ടെ കുട്ടികള്‍ക്കായി ഒരു പാവ ഷോ സംഘടിപ്പിക്കും. അതേസമയം ഷോപ്പര്‍മാര്‍ക്ക് വിവിധ സ്റ്റോറുകളില്‍ 90 ശതമാനം വരെ കിഴിവോടെ അസാധാരണമായ ഷോപ്പിംഗ് മാമാങ്കം ആസ്വദിക്കാം. കായിക പ്രവര്‍ത്തനങ്ങളില്‍ താല്‍പര്യമുള്ളവര്‍ക്കായി അബുദാബി സമ്മര്‍ സ്പോര്‍ട്സ് ബാഡ്മിന്റണ്‍ മുതല്‍ ഫുട്ബോള്‍ വരെയുള്ള വിവിധ കായിക ഇനങ്ങള്‍ക്കായി 25 ഇന്‍ഡോര്‍ കോര്‍ട്ടുകളും ഫീല്‍ഡുകളും സജ്ജമാണ്.

​ഷാര്‍ജയിലെ വിനോദ പരിപാടികൾ

ഷാര്‍ജയിലെ വിവിധ സ്ഥലങ്ങളിലും ബലി പെരുന്നാളിലനോട് അനുബന്ധിച്ച് പൈതൃകവും വിനോദവും സമ്മേളിക്കുന്ന വ്യത്യസ്ത പരിപാടികളും ആസൂത്രണം ചെയ്തിട്ടുണ്ട്. അല്‍ മജാസ് വാട്ടര്‍ഫ്രണ്ടിലെ ഷാര്‍ജ മ്യൂസിക്കല്‍ ഫൗണ്ടന്‍ വീണ്ടും തുറക്കുന്നതോടെ താമസക്കാര്‍ക്കും വിനോദസഞ്ചാരികള്‍ക്കും വിനോദത്തിന്റെ നിരവധി വാതിലുകളാണ് തുറക്കപ്പെടുന്നത്.

അല്‍ ഖസ്ബയിലേക്കും അല്‍ മജാസ് വാട്ടര്‍ഫ്രണ്ടിലേക്കും ഇതോടെ പ്രവേശനം ലഭിക്കും. ഇവിടെ ജൂണ്‍ 28ന് അല്‍ ഹര്‍ബിയ, ജൂണ്‍ 29ന് അല്‍ മദ്‌യമ, ജൂണ്‍ 30ന് ലിവ എന്നീ പരമ്പരാഗത ബാന്‍ഡുകളുടെ പരിപാടികള്‍ നടക്കും. ജനപ്രിയ ഗാനങ്ങളാല്‍ സമ്പന്നമായിരിക്കും ഈ പരിപാടികള്‍. അല്‍ ഖസ്ബയില്‍ വൈകുന്നേരം 6 മണിക്കും 7 മണിക്കും, അല്‍ മജാസ് വാട്ടര്‍ഫ്രണ്ടില്‍ രാത്രി 8.30 നും 9.30 നുമായിരിക്കും പരിപാടികള്‍ നടക്കുക.

അല്‍ ഹീറ ബീച്ചില്‍ സന്ദര്‍ശകര്‍ക്ക് ജൂണ്‍ 28 മുതല്‍ 30 വരെയുള്ള ദിവസങ്ങള്‍ വ്യത്യസ്ത വിനോദ പരിപാടികള്‍ അരങ്ങേറും. ജൂണ്‍ 28 ന്, ലിവ ബാന്‍ഡ് വൈകുന്നേരം 6 മുതല്‍ 9.30 വരെ നാല് പ്രകടനങ്ങള്‍ അവതരിപ്പിക്കും. ജൂണ്‍ 29 ന് അല്‍ മദ്‌യമ ബാന്‍ഡ് നാല് പ്രകടനങ്ങള്‍ കാഴ്ചവയ്ക്കും. കൂടെ മൊബൈല്‍ റോബോട്ടോ ഷോയും അവതരിപ്പിക്കും. ജൂണ്‍ 30 ന് അല്‍ ഹര്‍ബിയയുടെ നാല് ഷോകളും ഉണ്ടാകും.

​ഖോര്‍ഫുഖാനിലും റാസല്‍ഖൈമയിലും പരിപാടികള്‍​

മനോഹരമായ കിഴക്കന്‍ പട്ടണമായ ഖോര്‍ഫക്കാനില്‍ ഈദ് അല്‍ അദ്ഹ ആഘോഷിക്കുന്നവര്‍ക്ക് ജൂണ്‍ 28 മുതല്‍ 30 വരെ അല്‍ ഹര്‍ബിയ ബാന്‍ഡിന്റെ പ്രകടനം ഉണ്ടാവും. ബീച്ച് പ്രദേശത്ത് വൈകുന്നേരം 6 മുതല്‍ രാത്രി 9.30 വരെയുള്ള സമയങ്ങളിലായി മൂന്ന് ഷോകളാണ് അവതരിപ്പിക്കുക. ഇതിനു പുറമെ ജൂണ്‍ 28-ന് ബീച്ച് മാന്‍, ജൂണ്‍ 29-ന് മിറേഴ്‌സ്, ജൂണ്‍ 30-ന് കോമഡി ഡുവോ തുടങ്ങിയ പ്രത്യേക ഷോകളും ഉണ്ടായിരിക്കും.

അതേസമയം, ഡെസേര്‍ട്ട് റിട്രീറ്റ് അനുഭവം ആഗ്രഹിക്കുന്നവര്‍ക്ക് കല്‍ബയില്‍ സ്ഥിതി ചെയ്യുന്ന മിസ്‌ക് അല്‍ ബദായര്‍ റിട്രീറ്റിലും മിസ്‌ക് കിംഗ്ഫിഷര്‍ റിട്രീറ്റിലും 25 ശതമാനം വരെ ടിക്കറ്റി തുകയില്‍ കിഴിവ് ആസ്വദിക്കാം.

റാസല്‍ഖൈമയിലെ താമസക്കാര്‍ക്കും വിനോദസഞ്ചാരികള്‍ക്കും അല്‍ നയീം മാളില്‍ ഷോപ്പിംഗിലും രസകരമായ ഈദ് പ്രവര്‍ത്തനങ്ങളിലും ഏര്‍പ്പെടാം. പരമ്പരാഗത മൈലാഞ്ചി ഇടല്‍, ബലൂണ്‍ വളയ്ക്കല്‍, ഫേസ് പെയിന്റിംഗ്, മാസ്‌കറ്റ് പരേഡ് തുടങ്ങിയ സൗജന്യ പ്രവര്‍ത്തനങ്ങളും അരങ്ങേറും.