തൊടുപുഴ കെഎസ്ആർടിസി എന്നാ സുമ്മാവാ; ടൂർ പോയി നേടിയത് 30 ലക്ഷം രൂപ; ബജറ്റ് ടൂറിസത്തിൽ റിവേഴ്‌സ് ഗിയറില്ല

തൊടുപുഴ: തൊടുപുഴ കെഎസ്ആർടിസിയുടെ ബജറ്റ് ടൂറിസം പാക്കേജുകൾ ജനപ്രിയമാകുന്നു. 2021ൽ ആരംഭിച്ച ബജറ്റ് ടൂറിസം യാത്രപാക്കേജുകളിലൂടെ ഇതുവരെ 30,17,105 രൂപയുടെ വരുമാനം ഡിപ്പോയ്ക്ക് നേടാനായി. 2021 ജൂലൈ 10ന് തൊടുപുഴയിൽനിന്ന് ഇടുക്കി ഡാം, അഞ്ചുരുളി, വാഗമൺ എന്നിവിടങ്ങളിലേക്കായിരുന്നു ആദ്യ സർവീസ്. അതിനുശേഷം ബജറ്റ് ടൂറിസത്തിൽനിന്ന് ഡിപ്പോയ്ക്ക് റിവേഴ്‌സ് ഗിയർ ഇടേണ്ടി വന്നിട്ടില്ലെന്ന് കെഎസ്ആർടിസി അധികൃതർ ചൂണ്ടിക്കാട്ടുന്നു.

ഡിപ്പോയിലെ ആദ്യ ട്രിപ്പിൻ്റെ ആദ്യ ദിനത്തിൽ 37 യാത്രക്കാരെയും കൂട്ടിയാണ് ആനവണ്ടി പുറപ്പെട്ടത്. തുടർന്ന് നിരവധി സാധാരണക്കാരുടെ യാത്രാ സ്വപ്നങ്ങൾക്ക് ചിറകുനൽകാനായി. ഇതുവരെ 75 യാത്രകളാണ് ഡിപ്പോയിൽനിന്ന് നടത്തിയിട്ടുള്ളത്.

മലയിടുക്കുകളിലൂടെയും കൊടും വനങ്ങളിലൂടെയും പ്രകൃതിഭംഗി ആസ്വദിച്ച് മൃഗങ്ങളെയും പക്ഷികളെയുമൊക്കെ വഴിയിൽ സന്ദർശിച്ചു കോടമഞ്ഞിന്റെ തണുപ്പിലൂടെ ഒരു യാത്ര ഏതൊരു സഞ്ചാരിയെയും ആകർഷിക്കുന്നതാണ്. അതിനാൽതന്നെ മലക്കപ്പാറ, ചതുരംഗപ്പാറ, ഗവി, വയനാട് എന്നിവിടങ്ങളിലേക്കാണ് കൂടുതൽ യാത്രകൾ നടത്തിയിട്ടുള്ളത്.

നെഫർട്ടിറ്റി എന്ന ആഡംബര കപ്പൽ യാത്രയും കെഎസ്ആർടിസിയുടെ ബജറ്റ് ടൂറിസം സെൽ നടത്തിവരുന്നുണ്ട്. നിലവിൽ വാഗമൺ, മൂന്നാർ ജംഗിൾ സഫാരി, മൺറോ തുരുത്ത്, ആലപ്പുഴ, പഞ്ചപാണ്ഡവ ക്ഷേത്രം തുടങ്ങി ആകെ പത്തോളം സ്ഥലങ്ങളിലേക്ക് തൊടുപുഴയിൽനിന്ന് യാത്രകൾ പോകാനാകും.

പുതിയ മൂന്ന് യാത്രകൾക്കുള്ള അനുമതിക്കായി ബിടിസിയിലേക്ക് കത്ത് അയച്ചിട്ടുണ്ടെന്ന് ബിടിസി ജില്ലാ കോർഡിനേറ്റർ എൻആർ രാജീവ്, യൂണിറ്റ് ഓഫീസർ കെപി രാധാകൃഷ്ണൻ, യൂണിറ്റ് കോഓർഡിനേറ്റർ, എംഎസ് വിനുരാജ് എന്നിവർ അറിയിച്ചു.