ജി.സി.സി രാജ്യങ്ങളില്‍നിന്ന്​ വാക്​സിന്‍ സ്വീകരിച്ചവര്‍ക്ക്​ ബഹ്​റൈനില്‍ ക്വാറന്‍റീന്‍ ഒഴിവാക്കി

ജി.സി.സി രാജ്യങ്ങളില്‍നിന്ന്​ വാക്​സിന്‍ സ്വീകരിച്ചവര്‍ക്ക്​ ബഹ്​റൈനില്‍ ക്വാറന്‍റീന്‍ ഒഴിവാക്കി. ഇന്ത്യയെ റെഡ്​ലിസ്​റ്റില്‍ നിന്ന്​ മാറ്റിയ സാഹചര്യത്തില്‍ ബഹ്​റൈനിലേക്ക്​ വരുന്ന യാത്രക്കാര്‍ക്കുള്ള പുതുക്കിയ നിദേശങ്ങള്‍ എയര്‍ഇന്ത്യ എസ്​ക്​പ്രസ്​ പുറപ്പെടുവിച്ചു.

സെപ്​റ്റംബര്‍ മൂന്നുമുതലാണ്​ ഇന്ത്യയെ നിയന്ത്രണങ്ങളില്‍നിന്ന്​ ഒഴിവാക്കാന്‍ ബഹ്​റൈന്‍ തീരുമാനിച്ചത്​.ബഹ്​റൈനി പൗരന്‍മാര്‍, ബഹ്​റൈനില്‍ റസിഡന്‍സ്​ പെര്‍മിറ്റുള്ളവര്‍, ബോര്‍ഡിങ്ങിന്​ മുമ്പ് ​ വിസ ലഭിച്ച ഇന്ത്യക്കാര്‍ (വര്‍ക്ക്​ വിസ, വിസിറ്റ്​ വിസ, ഇ വിസ തുടങ്ങിയവ) എന്നിവര്‍ക്ക്​ ബഹ്​റൈനിലേക്ക്​ വരാം.ജി.സി.സി രാജ്യങ്ങളില്‍നിന്ന്​ പൂര്‍ണ്ണമായി വാക്​സിന്‍ സ്വീകരിച്ചവര്‍ക്ക്​ യാത്ര ​പുറപ്പെടുന്നതിന്​ മുമ്പുള്ള നെഗറ്റീവ്​ ആര്‍.ടി.പി.സി.ആര്‍ ടെസ്​റ്റ്​ ആവശ്യമില്ല.

ഇത്തരം യാത്രക്കാര്‍ വാക്​സിന്‍ സ്വീകരിച്ചതി​ന്റെ സര്‍ട്ടിഫിക്കറ്റ്​ അല്ലെങ്കില്‍ ജി.സി.സി രാജ്യങ്ങളിലെ ഔദ്യോഗിക മൊബൈല്‍ ആപ്പിലെ ഗ്രീന്‍ ഷീല്‍ഡ്​​ കാണിക്കണം.ബഹ്​റൈനില്‍ രണ്ടാം ഡോസ്​ സ്വീകരിച്ച്‌​ 14 ദിവസം കഴിഞ്ഞവരെയാണ്​ പൂര്‍ണ്ണമായി വാക്​സിന്‍ സ്വീകരിച്ചവരായി കണക്കാക്കുന്നത്​.വാക്​സിന്‍ സ്വീകരിക്കാത്തവരും ഇന്ത്യയില്‍നിന്ന്​ വാക്​സിന്‍ സ്വീകരിച്ചവരുമായ യാത്രക്കാര്‍ യാത്ര പുറപ്പെടുന്നതിന്​ 72 മണിക്കൂറിനുള്ളില്‍ നടത്തിയ ആര്‍.ടി.പി.സി.ആര്‍ നെഗറ്റീവ്​ സര്‍ട്ടിഫിക്കറ്റ്​ ഹാജരാക്കണം.

സര്‍ട്ടിഫിക്കറ്റില്‍ സ്​കാന്‍ ചെയ്യാന്‍ കഴിയുന്ന ക്യൂ.ആര്‍ കോഡ്​ നിര്‍ബന്ധമായും ഉണ്ടായിരിക്കണം. ഓണ്‍ലൈന്‍ റിപ്പോര്‍ട്ടും കൗണ്ടറില്‍ കാണിക്കുന്ന പി.ഡി.എഫ്​ റിപ്പോര്‍ട്ടും ഒരേപോലെയായിരിക്കണം.ബഹ്​റൈനില്‍ എത്തിയാല്‍ വിമാനത്താവളത്തില്‍വെച്ചും തുടര്‍ന്ന്​ അഞ്ച്​, 10 ദിവസങ്ങളിലും കോവിഡ്​ പരിശോധന നടത്തണം.

വാക്​സിന്‍ സ്വീകരിച്ചവര്‍ക്കും സ്വീകരിക്കാത്തവര്‍ക്കും ഇത്​ ബാധകമാണ്​. അതേസമയം, ആറ്​ വയസില്‍ താഴെയുള്ള കുട്ടികള്‍ക്ക്​ ടെസ്​റ്റ്​ ആവശ്യമില്ല. മൂന്ന്​ പരിശോധനക്കുമായി 36 ദിനാറാണ്​ ഫീസ്​ അടക്കേണ്ടത്​. ഇത്​ മുന്‍കൂട്ടി അടക്കുകയോ വിമാനത്താവളത്തിലെ കിയോസ്​കില്‍ അടക്കുകയോ വേണം.​ ഇതിനാവശ്യമായ തുക യാത്രക്കാര്‍ കരുതണം.വാക്​സിന്‍ സ്വീകരിക്കാത്തവരും ഇന്ത്യയില്‍നിന്ന്​ വാക്​സിന്‍ സ്വീകരിച്ചവരും 10 ദിവസത്തെ നിര്‍ബന്ധിത ക്വാറന്‍റീനില്‍ കഴിയണം.

സ്വന്തം പേരിലോ അടുത്ത ബന്ധുവി​ന്റെ പേരിലോ ഉള്ള താമസ സ്​ഥലത്തോ നാഷണല്‍ ഹെല്‍ത്​ റഗുലേറ്ററി അതോറിറ്റി (എന്‍.എച്ച്‌​.ആര്‍.എ) അംഗീകൃത ഹോട്ടലിലോ ആയിരിക്കണം ക്വാറന്‍റീന്‍. താമസ​സ്​ഥലത്തിന്‍റെ രേഖ യാത്ര പുറപ്പെടുന്നതിന്​ മുമ്പ്​ ഹാജരാക്കണം.