ഗോവയില്‍ ആകെയുള്ളത് 11 കോണ്‍ഗ്രസ് എംഎല്‍എമാര്‍, അതില്‍ പത്ത് പേരും രാഷ്ട്രപതി തിരഞ്ഞെടുപ്പില്‍ ക്രോസ് വോട്ട് ചെയ്യുമെന്ന് റിപ്പോര്‍ട്ട്; ലക്ഷ്യം ബിജെപി പ്രവേശനം! ഗോവയില്‍ കോണ്‍ഗ്രസിനെ കാത്തിരിക്കുന്നത് കനത്ത പ്രഹരം? റിപ്പോര്‍ട്ട് ഇങ്ങനെ

പനാജി: ഗോവയിലെ പത്ത് കോണ്‍ഗ്രസ് എംഎല്‍എമാര്‍ ബിജെപിയിലേക്ക് ചേക്കേറാന്‍ നീക്കമിടുന്നതായി റിപ്പോര്‍ട്ട്. 40 അംഗ നിയമസഭയിൽ ബിജെപിക്ക് 20 എംഎൽഎമാരും കോൺഗ്രസിന് 11 എംഎൽഎമാരും എഎപിയുടെയും എംജിപിയുടെയും രണ്ട് വീതം എംഎൽഎമാരും അഞ്ച് സ്വതന്ത്ര എംഎൽഎമാരുമുണ്ട്.

അതൃപ്തിയുള്ള കോൺഗ്രസ് എം.എൽ.എമാർ ബി.ജെ.പി നേതൃത്വവുമായി ബന്ധപ്പെട്ടിട്ടുണ്ടെന്ന്‌ ബന്ധപ്പെട്ട വൃത്തങ്ങളെ ഉദ്ധരിച്ച് ദേശീയ മാധ്യമം റിപ്പോര്‍ട്ട് ചെയ്തു. അതൃപ്തിയുള്ള കോണ്‍ഗ്രസ് എംഎല്‍എമാര്‍ ബിജെപിയില്‍ ചേരാന്‍ തയ്യാറാണെന്നും, എന്നാല്‍ അവരെ ഉള്‍പ്പെടുത്താന്‍ തിടുക്കം വേണ്ടെന്നാണ് നേതൃത്വം തീരുമാനിച്ചിരിക്കുന്നതെന്നും ഒരു ബിജെപി നേതാവ് പറഞ്ഞു.

രാഷ്ട്രപതി തിരഞ്ഞെടുപ്പിൽ ക്രോസ് വോട്ട് ചെയ്യാൻ കോൺഗ്രസ് എംഎൽഎമാരോട് ആവശ്യപ്പെടുകയും പിന്നീട് അവരെ പാർട്ടിയിൽ എടുക്കുകയുമാണ് ബിജെപിയുടെ പദ്ധതി. മുൻ മുഖ്യമന്ത്രിയും കോൺഗ്രസ് നേതാവുമായ ദിഗംബർ കാമത്ത് ബിജെപി നേതൃത്വവുമായി സംസാരിച്ചു. ഇതുവരെ അന്തിമ തീരുമാനമെടുത്തിട്ടില്ലെന്ന് ബിജെപി ഗോവ അധ്യക്ഷൻ സദാനന്ദ തബവാഡെ പറഞ്ഞു.

എന്നാല്‍ ബിജെപി സര്‍ക്കാര്‍ കോണ്‍ഗ്രസ് എംഎല്‍എമാരെ ഉപദ്രവിക്കുകയാണെന്ന് ഒരു കോണ്‍ഗ്രസ് നേതാവ് ആരോപിച്ചു. മിക്ക എംഎൽഎമാർക്കും ഹോട്ടലുകൾ ഉണ്ട്. കെട്ടിടങ്ങൾ പൊളിച്ചുമാറ്റണമെന്ന് ആവശ്യപ്പെട്ട് ബിജെപി അവർക്ക് നോട്ടീസ് നൽകിയിട്ടുണ്ട്. എംഎല്‍എമാരുടെ മറ്റ് ബിസിനസുകളും ബിജെപി ലക്ഷ്യമിടുന്നതായും അദ്ദേഹം പറഞ്ഞു.

എന്നാല്‍ പത്ത് എംഎല്‍എമാരും ഒരുമിച്ച് പാര്‍ട്ടി വിടാന്‍ സാധ്യത കുറവാണെന്ന് ഗോവ കേന്ദ്രീകരിച്ച് പ്രവര്‍ത്തിക്കുന്ന പ്രമുഖ മാധ്യമപ്രവര്‍ത്തകന്‍ കിഷോര്‍ നായിക് ഗാവോങ്കര്‍ പറയുന്നു. അവരിൽ കുറച്ചുപേർ ഇപ്പോൾ ചേർന്നേക്കാം. 2024ഓടെ ഭൂരിഭാഗം കോൺഗ്രസ് എംഎൽഎമാരും ബിജെപിക്കൊപ്പമാകുമെന്നും അദ്ദേഹം പറഞ്ഞു.