രാഷ്ട്രീയക്കാരുടെ അകമ്പടി ഇല്ല; തീർത്തും സ്വകാര്യമായി നിര്‍മല സീതാരാമന്‍റെ മകള്‍ക്ക് മാംഗല്യം

രാഷ്ട്രീയക്കാരുടെ അകമ്പടികളോ ആരോവങ്ങളോ ഇല്ലാതെ തീർത്തും സ്വകാര്യമായി ധനമന്ത്രി നിർമലാ സീതാരാമൻെറ മകളുടെ വിവാഹം. വ്യാഴാഴ്ച ബെംഗളൂരുവിൽ വെച്ചാണ് ലളിതമായ ചടങ്ങുകളോടെ വിവാഹം നടന്നത്. നിർമല സീതാരാമൻെറ മകൾ പരകല വംഗമയി‌ പ്രധാനമന്ത്രിയുടെ പ്രധാന സഹായികളിലൊരാൾ പ്രതീക് ദോഷിയെയാണ് വിവാഹം ചെയ്തത്.

ചടങ്ങിൽ അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്തു. രാഷ്ട്രീയ നേതാക്കളെ ക്ഷണിച്ചിരുന്നില്ലെന്നാണ് റിപ്പോർട്ടുകൾ. ചടങ്ങിൻെറ വീഡിയോ സോഷ്യൽ മീഡിയയിൽ വൈറലായി. ഹിന്ദു പുരോഹിതന്മാർ വിവാഹത്തിന് നേതൃത്വം നൽകിയപ്പോൾ സീതാരാമൻ മകൾക്ക് പിന്നിൽ നിന്ന് ചടങ്ങുകൾക്ക് സാക്ഷിയായി. ഉഡുപ്പി അടമാരു മഠത്തിലെ വൈദികരാണ് ചടങ്ങുകൾക്ക് നേതൃത്വം നൽകിയത്.

പരകാല വംഗമായി മിൻറ് ലോഞ്ചിലെ ഫീച്ചർ റൈറ്ററാണ്. മുമ്പ് ദി ഹിന്ദു ദിനപ്പത്രക്കിൽ ജോലി ചെയ്തിരുന്നു. ഗുജറാത്തിൽ നിന്നുള്ള വരൻ പ്രധാനമന്ത്രി നരേന്ദ്ര മോദിയുടെ പ്രധാന സഹായിയാണ്. 2023 ലെ പാർലമെൻറിൽ ബജറ്റ് അവതരണ വേളയിൽ സന്ദർശക ഗാലറിയിൽ പരകാലയും എത്തിയിരുന്നു.

പ്രതീക് ദോഷി പ്രധാനമന്ത്രിയുടെ ഓഫീസിലെ സ്പെഷ്യൽ ഡ്യൂട്ടിയിലുള്ള ഓഫീസറാണ്. റിസർച്ച് ആൻഡ് സ്ട്രാറ്റജി വിഭാഗത്തിൽ പ്രധാന പങ്ക് വഹിക്കുന്നു. സിംഗപ്പുർ മാനേജ്‌മെന്റ് സ്‌കൂളിലെ ബിരുദധാരിയായ ദോഷി, നരേന്ദ്ര മോദി മുഖ്യമന്ത്രിയായിരുന്ന കാലത്ത് ഗുജറാത്ത് മുഖ്യമന്ത്രിയുടെ ഓഫീസിൽ (സിഎംഒ) റിസർച്ച് അസിസ്റ്റൻറായി സേവനമനുഷ്ഠിച്ചിട്ടുണ്ട്.

2014-ൽ നരേന്ദ്രമോദി പ്രധാനമന്ത്രിയായി സ്ഥാനമേറ്റപ്പോൾ ഡൽഹിയിലേക്ക് സ്ഥലം മാറിയശേഷം, 2019 ജൂണിൽ ജോയിൻറ് സെക്രട്ടറിയായി സ്ഥാനക്കയറ്റം ലഭിച്ചിരുന്നു. മുൻ ആന്ധ്രാപ്രദേശ് മുഖ്യമന്ത്രി എൻ ചന്ദ്രബാബു നായിഡുവിൻെറ കമ്മ്യൂണിക്കേഷൻസ് അഡ്വൈസറായി സേവനമനുഷ്ഠിച്ച പരകാല പ്രഭാകറിനെയാണ് ധനമന്ത്രി നിർമ്മല സീതാരാമൻ വിവാഹം കഴിച്ചത് എന്നതും ശ്രദ്ധേയമാണ്.