ജമ്മുവിലെ അന്താരാഷ്ട്ര അതിര്ത്തിയിലൂടെ നുഴഞ്ഞുകയറാന് ശ്രമിച്ച ഭീകരനെ സൈന്യം വധിച്ചു. അഖ്നൂരിലെ ഖൂര് സെക്ടറിലേക്ക് ഇന്ത്യന് ഭാഗത്തേക്ക് അതിക്രമിച്ച് കടക്കാന് ആയുധധാരികളായ നാല് ഭീകരരുടെ സംഘം ശ്രമിച്ചതോടെ സുരക്ഷാ ഉദ്യോഗസ്ഥര് വെടിയുതിര്ക്കുകയായിരുന്നു. നിരീക്ഷണ ഉപകരണങ്ങളുടെ സഹായത്തോടെയാണ് സൈന്യം ഭീകരരുടെ നീക്കം മനസിലാക്കിയത്. ശനിയാഴ്ച പുലര്ച്ചെയാണ് സംഭവം.
വെള്ളിയാഴ്ച പൂഞ്ചില് സൈനിക വാഹനത്തിന് നേരെ നടന്ന ഭീകരാക്രമണത്തില് അഞ്ച് സൈനികര് കൊല്ലപ്പെട്ടിരുന്നു. മൂന്ന് പേര്ക്ക് പരിക്കേല്ക്കുകയും ചെയ്തു. ആക്രമണം നടത്തിയ ഭീകരര്ക്കായുള്ള തിരച്ചില് സുരക്ഷാ സേന ശക്തമാക്കുന്നതിനിടയിലാണ് നുഴഞ്ഞുകയറ്റ ശ്രമം പരാജയപ്പെടുത്തിയത്. പൂഞ്ച് ഭീകരാക്രമണത്തിന്റെ ഉത്തരവാദിത്തം നിരോധിത ഭീകര സംഘടനയായ ലഷ്കര്-ഇ-തൊയ്ബയുടെ (എല്ഇടി) പീപ്പിള്സ് ആന്റി ഫാസിസ്റ്റ് ഫ്രണ്ട് ഏറ്റെടുത്തിരുന്നു. യുഎസ് നിര്മിത എം4 കാര്ബൈന് റൈഫിളുകള് ഉപയോഗിച്ച് ആക്രമണം നടത്തുന്ന ചിത്രം ഭീകരര് സോഷ്യല് മീഡിയയില് പങ്കുവെച്ചു. 1980-കളില് യുണൈറ്റഡ് സ്റ്റേറ്റ്സില് വികസിപ്പിച്ചെടുത്തിരുന്ന ഭാരം കുറഞ്ഞ കാര്ബൈനാണ് M4 കാര്ബൈന്.
യുഎസ് സായുധ സേനയുടെ പ്രാഥമിക കാലാള്പ്പടയുടെ ആയുധമാണിത്. ഇത് പിന്നീട് മറ്റ് എണ്പതിലധികം രാജ്യങ്ങളില് പ്രചാരത്തില് വന്നു. ക്ലോസ്-ക്വാര്ട്ടേഴ്സ് പോരാട്ടത്തിനായി രൂപകല്പ്പന ചെയ്തിരിക്കുന്ന ഈ റൈഫിള് കൃത്യവും വിശ്വസനീയവും വൈവിധ്യമാര്ന്ന യുദ്ധസാഹചര്യങ്ങള്ക്ക് നന്നായി യോജിച്ചതുമാണ്. ഇത് പൊതുവെ സൈനിക, നിയമ നിര്വ്വഹണ ഉദ്യോഗസ്ഥര്ക്കിടയിലെ ഒരു ജനപ്രിയ റൈഫിളാണ്