മോൻസൻ മാവുങ്കൽ കള്ളപ്പണം വെളുപ്പിക്കൽ കേസിൽ സുധാകരൻ ഇഡിക്ക് മുന്നിൽ ഹാജരാകില്ല; സെപ്തംബര്‍ അഞ്ചിന് ശേഷം എപ്പോള്‍ വേണമെങ്കിലും ഹാജരാകാം; ഇഡിയ്ക്ക് സുധാകരന്റെ കത്ത്

മോൻസൻ മാവുങ്കൽ വ്യാജപുരാവസ്തു തട്ടിപ്പുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ കെപിസിസി പ്രസിഡന്റ് കെ.സുധാകരൻ എൻഫോഴ്സ്മെന്റ് ഡയറക്ടറേറ്റിനു (ഇഡി) മുന്നിൽ ഹാജരാകില്ല. ഹാജരാകില്ലെന്നു വ്യക്തമാക്കി സുധാകരൻ ഇഡിക്കു കത്തു നൽകി.

പുതുപ്പള്ളി ഉപതിരഞ്ഞെടുപ്പ് തിരക്കും ബാങ്ക് രേഖകള്‍ ഹാജരാക്കുന്ന കാര്യത്തില്‍ വന്ന ബുദ്ധിമുട്ടും ചൂണ്ടിക്കാട്ടിയാണ്   ചോദ്യം ചെയ്യലിന് മറ്റൊരു ദിവസം ഹാജരാകാമെന്ന് സുധാകരൻ അറിയിച്ചത്. പുതുപ്പള്ളി ഉപതിരഞ്ഞെടുപ്പ് നടക്കുന്ന സെപ്റ്റംബർ 5നു ശേഷമുള്ള ഏതെങ്കിലും ദിവസം ഹാജരാകാമെന്ന് ഇഡിക്കു നൽകിയ കത്തിൽ സുധാകരൻ വ്യക്തമാക്കി.

ഈ മാസം 22നു സുധാകരനെ ഇ‍ഡി ഒൻ‌പതു മണിക്കൂർ ചോദ്യം ചെയ്തിരുന്നു. രാവിലെ 11 നു തുടങ്ങിയ ചോദ്യം ചെയ്യൽ രാത്രി 8.15നാണ് അവസാനിച്ചത്. ചോദ്യം ചെയ്യൽ പൂർത്തിയാക്കാൻ 30നു വീണ്ടും ഹാജരാവാൻ നിർദേശം നൽകുകയായിരുന്നു.

മോൻസനുമായുള്ള സാമ്പത്തിക ഇടപാടുകൾ എന്തെല്ലാം, മോൻസന്റെ ബിസിനസ് ഇടപാടുകളെക്കുറിച്ച് എന്തെല്ലാം അറിയാം, കൂട്ടുകച്ചവടക്കാ‍ർ ആരെല്ലാമാണ് തുടങ്ങിയ ചോദ്യങ്ങളാണ് ഇഡി സുധാകരനോടു ചോദിച്ചത്. സുധാകരന്റെ സ്വത്ത് വിവരങ്ങൾ സംബന്ധിച്ച രേഖകൾ ഹാജരാക്കാനും ആവശ്യപ്പെട്ടിരുന്നു