അഭിമാനമെന്ന് രാഷ്ട്രപതി, ചരിത്രമെന്ന് പ്രധാനമന്ത്രി; ടി20 ലോകകപ്പ് നേടിയ ഇന്ത്യന്‍ ടീമിന് അഭിനന്ദനപ്രവാഹം

ന്യൂഡല്‍ഹി: ടി20 ലോകകപ്പ് നേടിയ ഇന്ത്യന്‍ ടീമിനെ പ്രശംസിച്ച് രാഷ്ട്രപതി ദ്രൗപദി മുര്‍മുവും, പ്രധാനമന്ത്രി നരേന്ദ്ര മോദിയും. ടീമിനെ അഭിനന്ദിക്കുന്നുവെന്ന് രാഷ്ട്രപതി പറഞ്ഞു. വിഷമകരമായ സാഹചര്യങ്ങളിലും വിട്ടുകൊടുക്കില്ലെന്ന മനോഭാവത്തോടെ ടൂര്‍ണമെന്റിലുടനീളം മികച്ച പ്രകടനം കാഴ്ചവച്ചു. അസാധാരണ നേട്ടമാണിതെന്നും രാഷ്ട്രപതി പറഞ്ഞു.

"ചാമ്പ്യൻസ്! നമ്മുടെ ടീം ടി20 ലോകകപ്പ് 'സ്റ്റൈലി'ൽ കൊണ്ടുവരുന്നു! ഇന്ത്യൻ ക്രിക്കറ്റ് ടീമിനെക്കുറിച്ച് അഭിമാനിക്കുന്നു. ഈ മത്സരം ചരിത്രമായിരുന്നു", പ്രധാനമന്ത്രി എക്‌സിലെ ഒരു പോസ്റ്റിൽ പറഞ്ഞു.

ടീം ഇന്ത്യയ്ക്ക് ഹാർദ്ദമായ അഭിനന്ദനങ്ങൾ നേരുന്നുവെന്ന് മുഖ്യമന്ത്രി പിണറായി വിജയന്‍ പറഞ്ഞു.ഇന്ത്യ രണ്ടാമത്തെ പുരുഷ ട്വന്റി20 ലോകകപ്പ് കിരീടം സ്വന്തമാക്കിയിരിക്കുന്നു. ടൂർണമെന്റിൽ ഉടനീളം പുലർത്തിയ ആത്മവിശ്വാസവും മികവും കടുത്ത മത്സരം നേരിട്ട ഫൈനലിലും കൈവിടാതെ വിജയം കരസ്ഥാമാക്കാൻ ടീം ഇന്ത്യയ്ക്ക് സാധിച്ചു.

രാജ്യത്തിന് എന്തെന്നില്ലാത്ത ആനന്ദവും അഭിമാനവും പകരുന്ന ഈ വിജയം കായികമേഖലയിൽ കൂടുതൽ ഉയരങ്ങൾ കീഴടക്കാൻ പ്രചോദനമാകും. ഈ സന്തോഷത്തിൽ ഹൃദയപൂർവ്വം പങ്കു ചേരുന്നുവെന്നും മുഖ്യമന്ത്രി പറഞ്ഞു. കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ, രാഹുല്‍ ഗാന്ധി തുടങ്ങിയവരും ടീമിനെ പ്രശംസിച്ചു.