പുതുതലമുറ നേതാക്കളെ സൃഷ്ടിക്കുന്നതില്‍ ബിജെപിയുടെ വിജയമാണ് രാജസ്ഥാനിലും മധ്യപ്രദേശിലും ഛത്തിസ്‌ഗഢിലും സംഭവിച്ചത്. കോണ്‍ഗ്രസിന് സാധിക്കാത്തത് ബിജെപിക്ക് സാധിച്ചിരിക്കുന്നു. രാഹുലിന് ഇനിയും ജനങ്ങളിലേയ്ക്കിറങ്ങാന്‍ സമയമുണ്ട്

ഇന്ത്യൻ രാഷ്ട്രീയത്തിൽ കോൺഗ്രസിനെപോലുള്ള പാർട്ടികൾക്ക് ഒരിക്കലും സാധിക്കാത്ത ചില പുതിയ മാതൃകകൾ സൃഷ്ടിക്കുകയാണ് ബിജെപി. 

മുതിർന്ന നേതാക്കൾ യുവാക്കൾക്കും കഴിവുള്ള രാഷ്ട്രീയക്കാർക്കുമായി എല്ലായ്പ്പോഴും മതിൽ സൃഷ്ടിക്കുന്ന പഴയ പാർട്ടിയിൽ നിന്ന് വ്യത്യസ്തമായി, സമകാലിക രാഷ്ട്രീയത്തിന്റെ പുതിയ മാതൃകകളാണ് ബിജെപി കാണിക്കുന്നത്. 

അവർ മധ്യപ്രദേശിൽ മോഹൻ യാദവിനും രാജസ്ഥാനിൽ തിരഞ്ഞെടുപ്പ് രാഷ്ട്രീയത്തിൽ പുതിയതും സംഘടനാ രാഷ്ട്രീയത്തിൽ ശക്തനുമായ ഭജൻലാൽ ശർമ്മയ്ക്കും മുഖ്യമന്ത്രിപദം നൽകിയപ്പോൾ അത് പാർട്ടിയിലെ വരുന്ന തലമുറയ്ക്കുള്ള വ്യക്തമായ സന്ദേശം കൂടിയായി മാറുകയാണ്. 

കൂടുതൽ യുവാക്കളെ രാഷ്ട്രീയ രംഗത്തേക്ക് ആകർഷിക്കാനാണ് ബിജെപി ശ്രമിക്കുന്നത്. ഇത് പാർട്ടിയെ സംഘടനാപരമായി വളരാൻ സഹായിക്കുകയും അതോടൊപ്പം ജനങ്ങൾക്ക് പാർട്ടി കൂടുതൽ ജനാധിപത്യപരമാണെന്ന സന്ദേശം നൽകുകയും ചെയ്യുന്നു. 

തങ്ങളുടെ ശക്തമായ കേന്ദ്ര നേതൃത്വത്തിലൂടെയാണ് അവർക്ക് ഇത് സാധ്യമാകുന്നത്. ഇതിനെ മറികടക്കാൻ കോൺഗ്രസ് പാർട്ടി ഒരുപാട് വിയർക്കേണ്ടി വരും. 

സംഘടനാ കേഡർ ഉയർത്താൻ ഭാരത് ജോഡോ യാത്ര കോൺഗ്രസ് പാർട്ടിയെ സഹായിച്ചു എന്നത് ഒരു സത്യമാണ്. കർണാടകയിലെയും തെലങ്കാനയിലെയും ഫലങ്ങൾ അവർക്ക് ഒരു യഥാർത്ഥ പഠനമാണ്. 

ലോക്‌സഭാ തിരഞ്ഞെടുപ്പ് വരെ കേഡർ സജീവമായി നിലനിർത്താൻ ഹിന്ദി ഹൃദയഭൂമിയിൽ എത്രയും വേഗം രാഹുൽ ഗാന്ധിയുടെ നേതൃത്വത്തിൽ പദയാത്ര നടത്തി അവർക്ക് ഉത്തരേന്ത്യയിൽ ഒരു പരീക്ഷണം നടത്താം. അതുമാത്രമാണ് ജനങ്ങളിലേക്ക് പാർട്ടിയെ എത്തിക്കാനുള്ള ഏക മാർഗം. 

തെരഞ്ഞെടുപ്പു ഫലത്തിനു ശേഷമുള്ള വോട്ടുവിഹിതം കോൺഗ്രസിന് ഇപ്പോഴും പിടിവിട്ടിട്ടില്ലെന്ന് തെളിയിക്കുന്നതിനാൽ കോൺഗ്രസിന് ഇപ്പോഴും പ്രതീക്ഷയുണ്ട്. 

അവർ ഉടനടി തിരുത്തൽ നടപടികൾ കൈക്കൊള്ളുകയും നല്ല സഖ്യങ്ങൾ സൃഷ്ടിക്കുകയും ചെയ്യുന്നില്ലെങ്കിൽ 2024 ലെ തിരഞ്ഞെടുപ്പിൽ അവരുടെ വിജയപ്രതീക്ഷ ബുദ്ധിമുട്ടാകും എന്നത് ഒരു വസ്തുതയാണ്.