'പണവും പ്രതാപവും നമ്മുക്കെന്തിനാ, പൂട്ടുണ്ടല്ലോ..' എന്ന പാട്ടെഴുതിച്ചത് കൊറോണയുടെ അച്ഛനാണോ ? പക്ഷേ, ഫോർബ്‌സ് ലിസ്റ്റിലെ ഒരു പ്രമുഖ മുതലാളി വിദേശ രാജ്യത്തെ 20000 കോടി പറ്റിച്ച് മുന്‍കൂട്ടി ലോക്ഡൌണിലായത് കൊറോണയറിയാതെ ! നിത അംബാനിക്കും ഇഷ അംബാനിക്കും ഒക്കെ സ്വന്തം വീട് മുഴുവൻ ചുറ്റിക്കാണുവാൻ ദൈവം സമ്മാനിച്ച സമയവും. കൊറോണ രക്ഷിച്ചവരുടെ കഥയാണ്‌ രസമുള്ളത്. ദാസനും വിജയനും ചുമ്മാതെ.. കുറെ പറയാനുണ്ട് !!

ദി കംപ്ലീറ്റ് ആക്ടർ എന്ന് സമൂഹം പറയപ്പെടുന്ന ലാലേട്ടന്റെ ഓർക്കാപ്പുറത്ത് എന്ന സിനിമയിലെ ഒരു ഡയലോഗാണ് ഇന്നിപ്പോൾ എല്ലാവരിലും സംജാതമായിട്ടുള്ളത് : '' ഒരു ജോലി കിട്ടിയിട്ട് വേണം ലീവെടുത്ത് വീട്ടിലിരിക്കാൻ '' !

ആ വീട്ടിലിരിക്കൽ ഇത്ര അർത്ഥവത്തായി നടപ്പാക്കുമ്പോൾ കുറേയാളുകൾ പാട്ടു പാടി കളിക്കുന്നു , അടുക്കളയിൽ കയറി തീറ്റയുണ്ടാക്കി നേരം കളയുന്നു , ടിക് ടോക്കിൽ വീഡിയോ ഉണ്ടാക്കി ബോറടിപ്പിക്കുന്നു , പത്രത്തിലെ ഈ മ യൗ വരെ വായിച്ചു തീർക്കുന്നു, ചാനലിലെ വളിച്ച സിനിമകളെ മൂന്നോ നാലോ തവണയായി കണ്ടു തീർക്കുന്നു...,

തീര്‍ന്നില്ല ... സോഷ്യൽ മീഡിയയിലെ പരിചയമില്ലാത്തവരുമായി സൗഹൃദം ആരംഭിക്കുന്നു , ഫേസ്‌ബുക്കിലെ പഴയ ചങ്ങാതിമാർ സംസാരിക്കുവാൻ സമയം കണ്ടെത്തുന്നു, കെട്ടിയവളുമായും കുട്ടികളുമായും അടുത്തിടപഴകുന്നു, എഴുതാനുള്ളവർ എഴുതി തീർക്കുന്നു, ലോക്കൽ ഫോണുകളും ഇന്റർനെറ്റ് കോളുകളും നിറഞ്ഞു കവിയുന്നു, പോൺ ക്ലിപ്പുകൾ മൂന്നും നാലും തവണ കാണുന്നവരും ഉണ്ടുട്ടോ !!!

ഈയിടെ ഒരു സുഹൃത്തിനെ ( ചാലക്കുടിയിലെ ഒരു പ്രമുഖ സ്ഥാപനത്തിന്റെ ഉടമ) കണ്ടപ്പോൾ വീട്ടുകാര്യങ്ങൾ ചോദിക്കുന്നതിനിടയിൽ മക്കളെ കുറിച്ച് ചോദിച്ചു , അപ്പോൾ അദ്ദേഹം പറഞ്ഞു '' ഒരാൾക്ക് ഒരു മീറ്റർ , രണ്ടാമത്തെയാൾ ഒന്നേകാൽ മീറ്റർ , ആദ്യത്തെയാൾ ഒന്നര മീറ്റർ ഉണ്ടെന്ന് '' .

എന്താണിങ്ങനെ ഒരു കണക്ക് എന്ന് ചോദിച്ചപ്പോൾ അദ്ദേഹം പറഞ്ഞത് ഇങ്ങനെ . '' ഞാൻ അതിരാവിലെ എഴുന്നേറ്റ് കമ്പനിയിലേക്ക് പോകുമ്പോൾ കുട്ടികൾ ഉറങ്ങുകയായിരിക്കും , തിരിച്ചു രാത്രിയിൽ വീട്ടിലെത്തുമ്പോഴും കുട്ടികൾ നല്ല ഉറക്കത്തിലായിരിക്കും , അപ്പോൾ ബെഡിൽ കിടക്കുമ്പോൾ അങ്ങനെയാ എനിക്ക് അവരുടെ പ്രായം അറിയുന്നത് '' . ഇതാണ് ഈ ലോക്ക് ഡൌൺ വരെയുള്ള കേരളത്തിലെ അവസ്ഥകൾ .

ഹർത്താലുകൾ ഉണ്ടായിരുന്നുവെങ്കിലും അപ്പോഴൊക്കെ സാമൂഹിക അകലം വേണ്ടായിരുന്നു . അതിനാൽ ഹർത്താലുകൾ പെരുന്നാളുകൾ ആയിരുന്നു .

ഈയിടെ ഫിലിപ്പൈൻസിലെയും ചില മിഡിൽ ഈസ്റ്റ് രാജ്യങ്ങളിലെയും സർവേകൾ പ്രകാരം കുറെയധികം വിവാഹ മോചനങ്ങൾ സംഭവിക്കുവാൻ ഇടയുണ്ടത്രേ ! നേരെ മറിച്ചും സംഭവിക്കുവാൻ സാദ്ധ്യതകൾ ഏറെ . കുറെയധികം അകന്നു കഴിഞ്ഞിരുന്ന ദമ്പതികളിൽ

മഞ്ഞുമലകൾ ഉരുകിത്തുടങ്ങി എന്നും സർവേകൾ പറയുന്നു .

ഈ ലോക്ക് ഡൌൺ ഏറ്റവമധികം ബാധിച്ചത് കള്ള വെട്ടുകാരെയാണ് , പല വീടുകളിലും രാത്രിയും ഭർത്താവില്ലാത്തപ്പോഴും അച്ഛനമ്മമാർ ഇല്ലാത്തപ്പോഴും\കയറി വിലസിയിരുന്ന വിരുന്തന്മാർക്ക് ഇപ്പോൾ കറുത്ത ദിവസങ്ങളാണ് ഈ കോവിഡ് അണ്ണൻ സമ്മാനിച്ചത് .

അതുപോലെ ജോലിസ്ഥലങ്ങളിൽ നിന്നും മുങ്ങുന്നവരും വിദേശരാജ്യങ്ങളിലേക്കുള്ള യാത്രകളിൽ സെക്രട്ടറിയായും ഭാഷ പരിഭാഷ എന്നപേരിലും പോയിരുന്ന കാമുകീ കാമുകന്മാർക്കും ഇതൊരു വല്ലാത്ത കുടുക്കായി പോയി . അവരൊക്കെ ആ ഒരു ദിവസത്തിനായുള്ള കാത്തിരിപ്പിലാണ് , അവർക്കെന്ത് കൊറോണ ? അവർക്കെന്ത് കോവിഡ് , അവർക്കെന്ത് ലോക്ക് ഡൌൺ , അവർക്കെന്ത് മരണങ്ങൾ ?.

പണവും പ്രതാപവും നമ്മുക്കെന്തിനാ , പൂട്ടുണ്ടല്ലോ ( പുട്ടല്ല ) എന്ന് പറഞ്ഞതുപോലെയായി നിത അംബാനിക്കും ഇഷ അംബാനിക്കും ഒക്കെ . അവരെപ്പറ്റി സോഷ്യൽ മീഡിയയിലെ ട്രോളണ്ണന്മാർ പറഞ്ഞത് .  സ്വന്തം വീട് മുഴുവൻ ചുറ്റിക്കാണുവാൻ ദൈവം സമ്മാനിച്ച സമയമാണിതെന്ന് !

അതുപോലെ ഈ കൊറോണ എന്ന മാരണക്കാലം ഏറ്റവും ഗുണം ചെയ്തത് ചില ഭരണകർത്താക്കളെയാണ് , ഇറ്റലിയും സ്പെയിനും അമേരിക്കയും പോലെ പല രാജ്യങ്ങളുടെയും സ്റ്റേറ്റുകളുടെയും ഭരണാധികാരികൾ ജിഡിപി കൊണ്ടും അഴിമതികൊണ്ടും കെടുകാര്യസ്ഥതകൾ കൊണ്ടും അനാവശ്യ ഉപദേശകന്മാരെക്കൊണ്ടും ന്യായീകരണമില്ലാത്ത നിയമനിർമ്മാണങ്ങളെക്കൊണ്ടും ജനങ്ങളിൽ നിന്നും അവളരെയധികം അകന്നുപോയിക്കൊണ്ടിരുന്ന സമയത്താണ് ഈ മാരണം ലോകത്തിന്റെ മടിത്തട്ടിലേക്ക് പറന്നിറങ്ങിയത് .

ഇനിയിപ്പോൾ അവർക്കൊക്കെ ആശ്വസിക്കാം , എല്ലാം കൊറോണയിൽ പഴിചാരാം . അടുത്ത തിരഞ്ഞെടുപ്പുകളിൽ കൊറാണയുമായി അങ്കം വെട്ടിയവർ എന്നും കൊറോണക്കെതിരെ എന്നും പത്രസമ്മേളനം വിളിച്ചവരെന്നും പറഞ്ഞുകൊണ്ട് വോട്ടുകൾ കീശയിലാക്കാം .

ഫോർബ്‌സ് ലിസ്റ്റിലെ ഒരു പ്രമുഖനായ മുതലാളി ( പ്രമുഖൻ എന്ന് പറയുന്നുള്ളൂ , കാരണം അദ്ദേഹം എല്ലാവർക്കും വാരിക്കോരി പരസ്യം കൊടുത്തിരുന്ന ആളായതുകൊണ്ട് പേരെഴുതാൻ വിഷമം ) അദ്ദേഹത്തെ വളർത്തിവലുതാക്കിയ നാടിനെ വഞ്ചിച്ചുകൊണ്ട് അവിടത്തെ പാർട്ണർമാരെ കള്ളക്കണക്ക് കാണിച്ചു പറ്റിച്ചുകൊണ്ടും സ്റ്റോക്ക് മാർക്കറ്റിൽ ഇല്ലാത്ത കണക്കുകൾ കാണിച്ചുകൊണ്ടും ബാങ്കുകളിൽ നിന്നും ഏകദേശം 20000 കോടി രൂപ തട്ടിയെടുത്ത് ഇപ്പോൾ വളരെ ഭക്തിയുള്ളവനായി ചമഞ്ഞുകൊണ്ട് ആ നാട് വിട്ടു .

ഇന്നിപ്പോൾ ആ നാട്ടിലെ ആളുകൾക്കും ട്രോളന്മാർക്കും ഈ വലിയ മുതലാളിയുടെ വീഡിയോകൾ പരസ്പരം അയച്ചുകൊണ്ടും അദ്ദേഹം പ്രതിനിധാനം ചെയ്യുന്ന നാടിനെ കുറിച്ച് മോശമായി ചിത്രീകരിക്കുവാനും സമയം കണ്ടെത്തുന്നു .

അതെ സമയം മറ്റൊരു ഫോർബ്‌സ് മുതലാളി ഈ കാലത്തെ ജനങ്ങളുടെ പരിഭ്രമം വിറ്റു കാശുണ്ടാക്കുന്നതോടൊപ്പം ഗുണമേന്മയില്ലാത്ത സാനിറ്റയ്‌സറുകൾ ഉണ്ടാക്കി വിറ്റ് പിടിക്കപ്പെടുകയും ചെയ്തു . സ്വന്തം സ്ഥാപനത്തിലെ ജീവനക്കാരുടെ ക്ഷേമം നോക്കാതെ കേവലം പബ്ലിസിറ്റിക്കായി പലതും ചെയ്തുകൂട്ടുന്നു . ഇടത്തെ കൈ കൊണ്ട് കൊടുക്കുന്നത് വലത്തേ കൈ അറിയുവാൻ പാടില്ലെന്ന്‌ ഉപദേശിച്ച പ്രവാചകന്റെ അനുയായികളാണ് ഇക്കളികൾ കളിക്കുന്നത് എന്ന് ഓർക്കുമ്പോൾ വിഷമം ഇല്ലാതെയില്ല .

ഈയിടെ ഒരു സ്നേഹിതൻ പറയുന്നു , ''ടിവിയിലും സിനിമയിലും ഒക്കെയുള്ള പെണ്ണുങ്ങളെ കാണുമ്പോൾ താൻ കണ്ട ക്ലിപ്പിലെ നായികയായി തോന്നുന്നുവെന്ന് ''. ഇനിയിപ്പോൾ ലോക്ക് ഡൌൺ കഴിഞ്ഞു നാട്ടിലിറങ്ങിയാൽ കാണുന്നവരെയൊക്കെ ആ കണ്ണിലൂടെ കണ്ടാൽ അടിയും അഴിയും ഉറപ്പാക്കേണ്ടിവരും .

ഗൂഗിൾ സേർച്ച് പ്രകാരം നാൽപ്പതു വയസ്സിന് മുകളിൽ ഉള്ളവരാണ് കൂടുതലും പോൺസൈറ്റുകളിൽ സമയം കളയുന്നത് . അവരെല്ലാം 'ടീൻ' എന്നവാക്ക് കൂടുതൽ സെർച്ചിൽ ഉപയോഗിക്കുമ്പോൾ 15 വയസിന് മേലെയുള്ള ആൺപിള്ളേരുകൾ 'ആന്റി ' എന്ന വാക്കിനാണ് കൂടുതൽ പ്രിയം കാണിക്കുന്നത് .

മറ്റൊരു തമാശ പെൺകുട്ടികളും വീട്ടമ്മമാരും ഇക്കാര്യത്തിൽ ഒട്ടും മോശമല്ലത്രേ !! അവരുടെ സെർച്ചിങ്ങിൽ 'ക്ലാസ്സിക് , കാമസൂത്ര , 69 , ഹണിമൂൺ ' എന്നീ വാക്കുകളിൽ ആണ് പ്രാമുഖ്യം നൽകിയിരിക്കുന്നത് . ഉച്ചയൂണിന് ശേഷം രണ്ടര മുതൽ അഞ്ച് മണി വരെയും രാത്രി പതിനൊന്ന് മണി മുതലുമാണ് സെർച്ചുകാരുടെ നുഴഞ്ഞുകയറ്റം .

മലബാറിലെ ചില ഭാഗങ്ങളിൽ പുലർച്ചെ അഞ്ചിന് ശേഷം ഏഴുമണിവരെയും സെർച്ചുകൾ കാണപ്പെടുന്നു . രാത്രികാല കാമുകി കാമുക ഫോണുകൾ അധികരിച്ചപ്പോൾ ലാഭം കൊയ്യുന്നത് ടെലഫോൺ കമ്പനികളാണ് . ഇതൊന്നും അനുഭവിക്കുവാനുള്ള ഭാഗ്യം നമ്മുടെ ബിഎസ്എൻഎലിന് ഇല്ലാതെപ്പോയല്ലോ എന്നതാണ് ഏറെ ദുഖകരം .

ഏറെ രസകരമായി തോന്നിയത് , പലരും വീട്ടിലിരുന്ന് ബോറടിച്ചപ്പോൾ , ഭാര്യയുമായുള്ള വഴക്കുകൾ മൂർച്ഛിച്ചപ്പോൾ ഹോട്ടലിലേക്കും റിസോർട്ടുകളിലേക്കും താമസം മാറ്റുവാനായി യാത്രക്കുള്ള അപേക്ഷ സമർപ്പിക്കുന്നു . കാശുള്ളവന് അങ്ങനെയെങ്കിലും രക്ഷപെടാം , പക്ഷെ കോരന്റെ കഞ്ഞി കുമ്പിളിൽ തന്നെ !!!

കേരള രാഷ്ട്രീയത്തിൽ ഇപ്പോൾ ഒരു കൊറോണക്കാലമാണ് . എന്ന് വെച്ചാൽ ഒരു മാതിരി അവിഞ്ഞ കളികളാണ് എല്ലാവരും കളിക്കുന്നത് . എല്ലാറ്റിലും വോട്ടുബാങ്ക് മാത്രം മുന്നിൽ കണ്ടുള്ള കളികൾ. പട്ടി തിന്നുന്നത് പൂച്ചക്ക് കണ്ടുകൂടാ പൂച്ച തിന്നുന്നത് പട്ടിക്ക് കണ്ടുകൂടാ .

നമ്മുടെ മെഡിക്കൽ കോളേജുകളും വാർഡുകളും പരിസരങ്ങളും ഒരു തരത്തിലും വൃത്തിയില്ലെങ്കിലും നമ്മുടെ ആരോഗ്യരംഗം പണ്ടേ കാര്യപ്രാപ്തിയുള്ളവരാൽ നടത്തപ്പെടുന്നതാണ് .

കനത്ത മഴയും വെള്ളപ്പൊക്കവും പലതരം പനികളും മഞ്ഞപിത്തങ്ങളും ഒക്കെ കൊണ്ട് കലുഷിതമായ സമയത്തൊക്കെ നമ്മൾ ജാഗരൂകരായി അതിനെ നേരിട്ട പാരമ്പര്യമാണ് ബ്രിട്ടീഷുകാരുടെ സമയം മുതൽക്കേ ഇവിടെ കൈക്കൊണ്ടുകൊണ്ടിരിക്കുന്നത് . അതിപ്പോൾ ഭരണാധികാരികൾ അവരുടെ കടമകൾ നിർവഹിക്കുമ്പോൾ സമൂഹം ഭംഗിയായി അതേറ്റെടുക്കുന്നു . അത്ര മാത്രം !!!

'പണത്തിന്റെ മേലെ പരുന്തും പറക്കില്ല' എന്നുള്ള പഴഞ്ചൊല്ലുകൾ മലയാളത്തിന്റെ ഏടുകളിൽ നിന്നും നീക്കം ചെയ്യണം എന്നാവശ്യപ്പെട്ടുകൊണ്ട് ,

വീടിന്റെ മട്ടുപ്പാവിൽ പഴയ മാഗസിനുകൾ തപ്പിയെടുത്ത് ഡോക്ടറോട് ചോദിക്കാം പംക്തികൾ മാത്രം വായിച്ചുകൊണ്ട് ദാസനും കിന്നാരത്തുമ്പികൾ പതിനഞ്ചാം തവണയും വീക്ഷിച്ചുകൊണ്ട് വിജയനും