കൊവിഡ് 19 തലച്ചോറിലുണ്ടാക്കുന്ന മാറ്റങ്ങളെ കുറിച്ച് പഠന റിപ്പോര്ട്ട് പുറത്ത്.
കോവിഡ് തീവ്രതയാർജിച്ചാൽ തലച്ചോറിനെ ബാധിക്കുമെന്നാണ് പുതിയ റിപ്പോര്ട്ട് വ്യക്തമാക്കുന്നത് . ചില രോഗികളിൽ കോവിഡ് മൂർച്ഛിച്ച് പക്ഷാഘാതം, വീക്കം, സൈക്കോസിസ്, ഡിമെൻഷ്യ തുടങ്ങിയവ ഉണ്ടാകുന്നുണ്ടെന്നാണ് കണ്ടെത്തൽ.
ചിലരിൽ പെരുമാറ്റവ്യതിയാനത്തിന്റെ ലക്ഷണങ്ങൾ കാണിക്കുന്നുണ്ട്. ഡോക്ടർമാരുടെ നിരീക്ഷണത്തിൽ നിന്ന് തയാറാക്കിയ റിപ്പോർട്ട് ലാൻസെറ്റ് ജേണലാണ് പ്രസിദ്ധീകരിച്ചിരിക്കുന്നത്.
കോവിഡ് മൂർച്ഛിക്കുന്നവരിലാണ് ന്യൂറോളജിക്കൽ, സൈക്യാട്രിക് പ്രശ്നങ്ങളുണ്ടാകുന്നത്. യുകെ ആശുപത്രിയിലെ രോഗികളിൽ നിന്നുള്ള വിവരം ഉപയോഗിച്ചാണ് പഠനം നടത്തിയിരിക്കുന്നത്. 125 രോഗികളിൽ കൂടുതൽ പേർക്കുമുണ്ടായത് പക്ഷാഘാതമാണ്. 77 രോഗികൾക്കാണ് പക്ഷാഘാതമുണ്ടായത്.
ഇതിൽ 57 പേർക്ക് തലച്ചോറിൽ രക്തം കട്ടപിടിച്ചാണ് സ്ട്രോക്കുണ്ടായിരിക്കുന്നത്. 39 പേരിൽ പെരുമാറ്റത്തിൽ മാറ്റങ്ങളുണ്ടായി. ബാക്കിയുള്ള 23 രോഗികളിലാണ് സൈക്കോസിസ്, ഡിമെൻഷ്യ ഉൾപ്പടെയുള്ള സൈക്യാട്രിക് പ്രശ്നങ്ങൾ കണ്ടത്. പുതിയ കണ്ടെത്തലിലൂടെ കോവിഡി 19 തലച്ചോറിലുണ്ടാക്കുന്ന മാറ്റങ്ങളെക്കുറിച്ച് വ്യക്തമായ പഠനം ആവശ്യമാണ് എന്നാണ് വിദഗ്ധർ പറയുന്നത്.