നോട്ടു നിരോധനം പോലെ ലോക് ഡൌണ്‍ പ്രഖ്യാപിച്ചപ്പോള്‍ കരുതല്‍ തള്ളിന് വഴിമാറി ! നാട്ടില്‍ അബദ്ധങ്ങളുടെ ആഗോള സമ്മേളനം നടക്കുമ്പോള്‍ കാശിക്കുപോയ മാധ്യമ ഭീരുക്കള്‍ ! രാജ്യത്തിന്‍റെ നട്ടെല്ലൊടിച്ച രാത്രികാലത്തെ മണ്ടത്തരങ്ങള്‍ ?

തള്ളിന്റെ ഒരു കാലമാണ് ഇന്ന് . ലോകം മുഴുവനും തള്ളുകളുമായി നീങ്ങുമ്പോൾ അതിനിടയിലേക്കാണ് കൊറോണയെന്ന ഒരു കുരുത്തം കെട്ടവൻ തള്ളിക്കയറിയത് . ആദ്യം ചൈനയിലെ വുഹാനിൽ തള്ളിക്കയറി , ചൈന എന്തൊക്കെയോ തള്ളുകളിലൂടെ അവരുടെ യൂറോപ്പ്യൻ പാർട്ണറായ ഇറ്റലിയിലേക്ക് തള്ളിവിട്ടു . ഇറ്റലി വേഗം സ്പെയിനിലേക്ക് തള്ളിക്കയറ്റി .

പെട്ടെന്നായിരുന്നു മൈ പ്രണ്ട് ട്രമ്പിന്റെ തള്ളുകൾ ലോകത്ത്‌ നിറഞ്ഞത് . അപ്പോൾ ചൈന 5 ജിയിലെ തള്ള് തള്ളി സാധനത്തെ അമേരിക്കയിലെത്തിച്ചു . അമേരിക്കയിൽ ഏറെ കുതിപ്പ് നടത്തി പിന്നീട് ബ്രസീലിലേക്കും റഷ്യയിലേക്കും നീങ്ങിയെങ്കിലും മൈ പ്രണ്ടിന്റെ വിഷമം ഓർത്തപ്പോൾ കുറച്ചു ഇന്ത്യയിലേക്കും തള്ളിക്കയറ്റി .

ഇപ്പോൾ നമ്മൾ കുതിച്ചുകൊണ്ടിരിക്കുകയാണ് . അപ്പോഴാണ് ചൈനയുടെ ലഡാക്ക് തള്ള് . അവിടെ ഇപ്പോൾ പട്ടാളക്കാർ തമ്മിൽ തള്ളി കളിക്കുകയാണ് .

ഭരണാധികാരികൾക്ക് തള്ളുകൾ പാളുമ്പോൾ അതിർത്തികളിൽ തള്ളുകൾ അനുഭവപ്പെടുമെന്ന് ഓ വി വിജയനും തള്ളിയിട്ടുണ്ട് .

തള്ളിന്‍റെ ദേശഭക്തി !

ഇന്ത്യയിലെ ഏക ദേശസ്നേഹിയായ അർണാബ് ഗോസാമിയെന്ന ആസാമി ചാനലിലൂടെ വലിയ പാക്കിസ്ഥാൻ വെട്ടുക്കിളി തള്ളുകൾ തള്ളിക്കൊണ്ടിരിക്കുമ്പോൾ അപ്രതീക്ഷിതമായി ചൈനയുടെ അതിർത്തിയിലെ തള്ളുകൾ വന്നു . പെട്ടെന്ന് തന്നെ ഹാഷ്ടാഗുകൾ മാറ്റി ഗെറ്റ് ഔട്ട് ചൈന എന്നാക്കിമാറ്റി .

എന്നിട്ട് ചൈനക്കാരെ മുഴുവൻ തെറി വിളി തുടങ്ങി . പക്ഷെ മലയാളി ട്രോളർമാർ ഉണ്ടോ വിടുന്നു . ചൈനക്കെതിരെ ആശാൻ തള്ളുമ്പോഴും ആ വാർത്ത സ്പോൺസർ ചെയ്തിരിക്കുന്നത് വിവോ എന്ന ചൈനീസ് മൊബൈൽ . വരാൻ പോകുന്ന തള്ളുകൾ സ്പോണ്സർ ചെയ്തിരിക്കുന്നത് ഓപ്പോ എന്ന ചൈനീസ് മൊബൈൽ . തള്ളു സ്വാമി ഉപയോഗിക്കുന്നതോ ചൈനയിൽ നിർമ്മിച്ച ആപ്പിൾ ഫോൺ . ഇതാണ് ദേശസ്നേഹം ഇതാണ് ദേശഭക്തി .

അബദ്ധങ്ങളുടെ ആഗോള സമ്മേളനം 

നമ്മൾ അയൽവക്കത്തെ നമ്മുടെ അഭ്യുദയകാംക്ഷികളായ ശ്രീലങ്കയെയും നേപ്പാളിനെയും ബംഗ്ലാദേശിനെയും ഒക്കെ രണ്ടാനമ്മയുടെ കണ്ണുകളിലൂടെ കാണുമ്പോള്‍ ചൈന അവരുടെ പോറ്റമ്മയായി മാറുന്ന കാഴ്ചകളാണ് ഇന്നിപ്പോൾ നാം കാണുന്നത് . അതിന്റെയൊക്കെ പ്രതിഫലനമാണ് ഈ അതിർത്തി തള്ളുകളും തല്ലുകളും . ട്രംപണ്ണനും ഒരു പ്രശ്നം ലോകത്ത്‌ ആവശ്യമാണ് , കാരണം ഇലക്ഷനൊക്കെയല്ലേ ?

തള്ള് ഇങ്ങനെ കൂടി കൂടി ആകാശത്തോളം ഉയർന്നപ്പോൾ തള്ളിന്റെ ആശാന്മാർക്ക് ലോകം മുഴുവൻ തിരിച്ചടികൾ വരുന്നത് അപ്രതീക്ഷിത വഴികളിലൂടെയാണ് . തിരിച്ചടികളെയും തള്ളുകളാക്കുവാൻ ശ്രമിക്കുന്ന ഈ വേന്ദ്രന്മാർ ശരിക്കും പൊട്ടന്മാരാണോ അതോ പൊട്ടന്മാരായി അഭിനയിക്കുകയാണോ ?

സാധാരണമായി ഓരോ അബദ്ധങ്ങൾ സംഭവിക്കുമ്പോഴും ഇനി അതുപോലെ സംഭവിക്കാതിരിക്കുവാൻ ശ്രമിക്കുക സർവസാധാരണമാണ് . എന്നാൽ ഇവന്മാരൊക്കെ പിന്നെയും പിന്നെയും അബദ്ധങ്ങളുടെ സംസ്ഥാന സമ്മേളനങ്ങളാണ് നടത്തിവരുന്നത് . ആദ്യമായി ലോകപൊലീസ് എന്ന് പറയപ്പെടുന്ന യുണൈറ്റഡ് സ്റ്റേറ്റ്സ് ഓഫ് അമേരിക്കയെന്ന റെഡ് ഇന്ത്യൻസിന്റെ നാട്ടിൽ നിന്ന് തന്നെ തുടങ്ങാം .

ബുദ്ധിയില്ലാത്ത ട്രമ്പും ബുദ്ധിയുള്ള പുടിനും ?

ലോകത്തിലെ സംസ്കാരങ്ങളുടെ കലവറയായിരുന്ന ഏറ്റവും നന്മയുള്ള മനുഷ്യസമൂഹമായിരുന്ന യൂഫ്രട്ടിസ് ടൈഗ്രീസ് നദീതട സംസ്കാരങ്ങളുടെ വക്താക്കളായിരുന്ന ഇറാഖി ജനതയെ പെരുവഴിയിലിറക്കി വിട്ടപ്പോൾ , നൈൽ നദീതട സംസ്കാരഭൂമിയായിരുന്ന ഈജിപ്ത് ജനതയെ തഹ്‌രീർ സ്ക്വയറിലേക്ക് ഇറക്കിവിട്ടതും വിയറ്റ്നാമിലെ പട്ടിണി പാവങ്ങളുടെ മേൽ നാപ്പാം ബോംബ് വർഷിച്ചതും ഹിരോഷിമയിലെയും നാഗസാക്കിയിലെയും ലക്ഷക്കണക്കിന് ജനതയെ ആറ്റംബോംബിനാൽ ചുട്ടെരിച്ചപ്പോഴും ക്യൂബയിലും സിറിയയിലും പലസ്തീനിലും കുരുന്നുകളെ ഇല്ലാതാക്കുമ്പോഴും ഇങ്ങനെയൊക്കെ തിരിച്ചടികൾ പ്രതീക്ഷിച്ചുകാണില്ല . അല്ലെങ്കിൽ ജയിച്ചുജയിച്ചു പോകുന്നതിനിടക്ക് ഇത്രേം വലിയ വിഷമങ്ങളെ നേരിടേണ്ടിവരുമെന്ന് ആരും ഉപദേശിച്ചുകാണില്ല .

ഗ്ലാസ്സ്‌നോസ്റ്റ് പെരിസ്‌ട്രോയ്‌കയിലൂടെ റഷ്യയെന്ന ഭീമനെ ചന്നം ഭിന്നമാക്കിയപ്പോഴും ടിയാനെൻ മെൻ സ്ക്വയറിലൂടെ ചൈനയെന്ന കമ്മ്യുണിസ്റ്റ്

രാജ്യത്തെ കുട്ടിച്ചോറാക്കുവാൻ നോക്കിയപ്പോഴും അമേരിക്കയെന്ന ഭീകരൻ കരുതിക്കാണില്ല ഇങ്ങനെയുള്ള തിരിച്ചടികൾ .

അമേരിക്കയിൽ ബുദ്ധിയുള്ള പ്രസിഡണ്ട് വരാതിരിക്കുവാൻ ബുദ്ധിയില്ലാത്ത ട്രമ്പിനെ അകമഴിഞ്ഞ് സഹായിക്കുമ്പോൾ ബുദ്ധിയുള്ള പുട്ടിൻ മനസ്സിൽ കണക്കാക്കിയത് പോലെ തന്നെ എല്ലാം നടക്കുന്നു .

ഒരു ആറ്റംബോംബ് പൊട്ടിക്കാതെയും ഒരു സൈനികൻ മരിച്ചുവീഴാതെയും ഇന്നിപ്പോൾ അമേരിക്ക ചൈനയാൽ തൊടുത്തുവിട്ട കൊറോണയിൽ തട്ടി എരിഞ്ഞമരുമ്പോൾ കൂനിന്മേൽ കുരു എന്നതുപോലെ ഒരു കറുത്തവർഗക്കാരനെ വെളുത്ത വർഗക്കാരൻ പോലീസ് കഴുത്തുഞെരിച്ചു കൊല്ലുന്ന ഒരൊറ്റ ചിത്രത്തിന്റെ ബലത്താൽ മൻഹാട്ടനും ടെക്സസും കാലിഫോർണിയയും വാഷിംഗ്ടണും കത്തിയെരിയുമ്പോൾ ലോകപോലീസിനും അമേരിക്കയിലെ പോലീസിനും പകച്ചുനിൽക്കാനേ കഴിയുന്നുള്ളൂ .

അതിനിടക്ക് മറ്റൊരു കറുത്തവർഗക്കാരനെ പിന്നെയും പോലീസ് വെടിവെച്ചുകൊന്നു . പോലീസുകാർ കെജിബിയുടെ പണം വാങ്ങിക്കാണുമോ?

അമേരിക്കയുടെ ശനിദശ

പോലീസുകാരൻ ശ്വാസം മുട്ടിച്ചുകൊന്ന ജോർജ്ജ് ഫ്ലോയ്ഡ് ഒരു തെമ്മാടിയായിരുന്നത്രെ !!! ഗർഭിണിയുടെ വയറ്റിലേക്ക് തോക്ക് ചൂണ്ടി അവരെ കൊള്ളയടിച്ച ഒരു മയക്കുയരുന്നു കച്ചവടക്കാരൻ . പക്ഷെ അമേരിക്കക്ക് അതൊരു ശാപമായി മാറുകയായിരുന്നു .

വാളെടുത്തവൻ വാളാൽ എന്ന് പറയുന്നതുപോലെ കേവലം ഒരു തെമ്മാടിയുടെ മരണം വരെ ഒരു രാജ്യത്തിന് താങ്ങാവുന്നതിലും അധികം പ്രശ്നമായി രൂപാന്തരപ്പെട്ടപ്പോൾ അതിപ്പോൾ റഷ്യയുടെ കെജിബിയാണോ ചൈനയുടെ ആരെങ്കിലുമാണോ പിന്നിൽ എന്ന് സംശയിക്കേണ്ടിയിരിക്കുന്നു .

ഹുവാവെയ് എന്ന ചെനീസ് മൊബൈൽ കമ്പനിയുടെ ചെയർമാന്റെ മകളെ 5 ജിയുടെ പേരിലോ അല്ലെങ്കിൽ അതുപോലെയുള്ള നമ്മുക്ക് അറിയാത്ത എന്തെങ്കിലും കേസിലോ അറസ്റ്റ് ചെയ്തപ്പോൾ തുടങ്ങിയതാണ് അമേരിക്കയുടെ ഈ ശനിദശ . അതിപ്പോൾ ലോകത്തിന്റെ മൊത്തം ശനിദശയായി മാറുന്നതിനിടക്ക് ട്രമ്പെന്ന തള്ള് മനുഷ്യൻ ലോകത്തിന്റെ മുന്നിൽ അപഹാസ്യനാവുകയായിരുന്നു .

ഇരട്ടകളുടെ ഒന്നാം സ്ഥാനം ?

ട്രമ്പെന്ന തള്ളും ഇന്ത്യയിലെ തള്ളും ചേർന്നപ്പോൾ ഗുജറാത്തിൽ അരങ്ങേറിയ ആമിനതാതന്റെ പൊന്നുമോൾ പരിപാടിയിൽ നിന്നുമാണ് ഇന്ത്യയിൽ കോവിഡ് ഇത്രേം വ്യാപിച്ചതെന്ന് ആരെങ്കിലും പറഞ്ഞാൽ സമ്മതിക്കുകയെ നിവൃത്തിയുള്ളൂ . അത്രേം വിദേശ പത്രപ്രവർത്തകരും

വിദേശികളും പങ്കെടുത്ത സ്വീകരണത്തിൽ നിന്നും വീണുകിട്ടിയ കോവിഡ് ഇന്നിപ്പോൾ അമേരിക്കക്കൊപ്പം ഇന്ത്യയും ഏറ്റെടുത്തപ്പോൾ നമ്മൾ ഒന്നാം സ്ഥാനത്തേക്ക് കുതിച്ചുകൊണ്ടിരിക്കുകയാണ് .

എല്ലാറ്റിലും ഒന്നാം സ്ഥാനം നേടുവാൻ ത്വരയുള്ള ട്രമ്പിനും മോഡിക്കും ഇന്നിപ്പോൾ അഭിമാനിക്കാം . അവർക്ക് എല്ലാറ്റിലും ഒന്നാം സ്ഥാനത്തുതന്നെ തുടരാം . തള്ളിലും ഈ ഇരട്ടകൾക്ക് സ്വന്തമായി ഒരു സ്ഥാനം ലോകം നൽകുമ്പോൾ ചൈനയുടെയും റഷ്യയുടെയും നേതാക്കന്മാർ ചാരായവും വോഡ്കയും അടിച്ചു ഇവരെ കളിയാക്കി ചിരിക്കുന്നുണ്ടാകാം .

രാത്രികാലത്തെ മണ്ടത്തരങ്ങള്‍ ?

ഇന്ത്യൻ ചരിത്രത്തിലെ ഏറ്റവും വലിയ മണ്ടത്തരമായ നോട്ട് നിരോധനത്തിന് ശേഷം ഒരൊറ്റ രാത്രിയിലെ ലോക്ക് ഡൌൺ ഇന്ത്യക്ക് ഉണ്ടാക്കിയ നഷ്ടം നിസ്സാരമല്ല . ചോദിക്കുവാനും പറയുവാനും ആളില്ലാത്ത ഇന്ത്യയിൽ ഇന്ദിരാഗാന്ധിയുടെ സമയത്തൊക്കെ മാധ്യമങ്ങളായിരുന്നു പ്രതിപക്ഷം .

ഇന്നത്തെ മാധ്യമക്കാർ ഒന്നടങ്കം ഗോസാമികളായി മാറിയപ്പോൾ ഇവിടെയിപ്പോൾ കാട്ടിലെ തടി തേവരുടെ ആന വലിയോ വലി . ലോക്ക് ഡൗണിൽ ആഭ്യന്തരമന്ത്രി വനവാസത്തിന് പോയപ്പോൾ ഇപ്പോൾ രണ്ടാമതും കുതിരക്കച്ചവങ്ങളുമായി ഇറങ്ങിപുറപ്പെട്ടിട്ടുണ്ട് .

കർണാടകത്തിലും മധ്യപ്രദേശിലും രാജസ്ഥാനിലും ഗുജറാത്തിലുമൊക്കെ എംഎൽഎ മാരെ വിലയിട്ടുകൊണ്ടിരിക്കുകയാണ് . രാജ്യത്തിൻറെ കെട്ടുറപ്പിനെ ബാധിക്കുന്ന നിയമങ്ങളുമായി ഇറങ്ങിപ്പുറപ്പെട്ടപ്പോൾ പാവങ്ങളായ സ്ത്രീകളുടെ കണ്ണീരിന്റെ ഫലമായി രാജ്യം തന്നെ ഇല്ലായ്മകളിലേക്ക് കുതിക്കുമ്പോൾ ആഭ്യന്തരമന്ത്രിക്ക് ഇപ്പോഴും എന്തെന്നില്ലാത്ത സന്തോഷം .

എന്തിനും ഒരതിരുണ്ട് !

ആർഎസ്എസ്സിലും ബിജെപിയിലും അകമഴിഞ്ഞ് വിശ്വസിച്ച് നേതാക്കന്മാരെ ന്യായീകരിച്ചുകൊണ്ടിരുന്ന ഒട്ടനവധി സുഹൃത്തുക്കൾ ഇപ്പോൾ മൗനത്തിലാണ് . ഒട്ടനവധിപേർ പ്രതികരിച്ചുതുടങ്ങി . ഒട്ടനവധി ആളുകൾ മാറി ചിന്തിച്ചുതുടങ്ങി . ലോക്ക് ഡൗണിൽ കാൽനടയായും സൈക്കിളിലും കിലോമീറ്ററുകൾ താണ്ടിയവരുടെയും അവരുടെ കുടുംബത്തിലെ അംഗങ്ങളുടെയും കൂട്ടുകാരുടെയും അയൽവക്കക്കാരുടെയും

ചിന്താഗതികളിൽ വന്ന മാറ്റം മാത്രം മതി അടുത്ത തിരഞ്ഞെടുപ്പുകളിൽ ഇന്നത്തെ ഭരണാധികാരികൾക്കെതിരെ വിധിയെഴുതുവാൻ .

കടുത്ത വർഗീയ വിഷം ചീറ്റിയും പാക്കിസ്ഥാന്റെ പേര് ഇടക്കിടക്കെ വലിച്ചിഴച്ചും പാവപ്പെട്ട ഇന്ത്യൻ ജനതയെ പറ്റിച്ച ഇപ്പോഴത്തെ ഭരണാധികാരികൾ

സ്വയം കുഴിക്കുന്ന കുഴികളിൽ വീണുപോകുന്ന കാലം വിദൂരമല്ല .

എല്ലാറ്റിനും ഒരതിരുണ്ട് എന്ന യാഥാർഥ്യം ഉൾക്കൊള്ളാതെ ഇപ്പോഴും വർഗീയത വിളമ്പിയും പ്രതികരിക്കുന്നവരെ അറസ്റ്റ് ചെയ്തും എതിർപാർട്ടിക്കാരെ കളിയാക്കിയും ഭരണാധികാരികൾ മുന്നോട്ട് പോകുന്നു. ജിഡിപി എന്താണെന്നോ അത് താഴോട്ട് പോകുകയാണെന്നോ പഠിക്കാതെ ചുമ്മാ ചാനലിൽ കയറിയിരുന്ന് പാത്രം കൊട്ടുവാനും വിളക്ക് തെളിയിക്കുവാനും പറഞ്ഞുകൊണ്ട് മണ്ടന്മാരായ ഒരു ജനതയെ മരമണ്ടന്മാരാക്കി മാറ്റുകയാണ് .

കാലിന്നടിയില്‍ മണ്ണുണ്ടോ ?

ഇതിന്നിടയിൽ പെട്രോളിന്റെയും ഡീസലിന്റെയും വില എത്രതവണ കൂട്ടിയെന്ന് ആരെങ്കിലും ശ്രദ്ധിച്ചിട്ടുണ്ടോ ? ഇതിന്നിടയിൽ എത്ര പൊതുമേഖലാ സ്ഥാപനങ്ങൾ വിറ്റു തുലച്ചു എന്നാരെങ്കിലും അന്തിചർച്ചകൾ ചെയ്തിട്ടുണ്ടോ ? ഇതിന്നിടയിൽ എത്ര ലക്ഷം കോടിയുടെ കടം എഴുതിത്തള്ളി എന്നാരെങ്കിലും പറഞ്ഞുകേട്ടിട്ടുണ്ടോ ?

ഇതിന്നിടയിൽ എത്ര പേരെ ജയിലിൽ അടക്കുന്നു എന്നത് ആരെങ്കിലും നിരീക്ഷണം നടത്തിയിട്ടുണ്ടോ ? എത്ര പേര് മരണപ്പെടുന്നു എന്നത് ആർക്കെങ്കിലും അറിയുന്നുണ്ടോ ? എത്ര കോടികൾ എംഎൽ എ മാരെ വിലക്കുവാങ്ങുവാൻ ചിലവഴിക്കുന്നുണ്ട് എന്നാരെങ്കിലും ചോദിച്ചിട്ടുണ്ടോ ? എന്ത് പറ്റി നമ്മുടെ ഇന്ത്യക്ക് ? എന്ത് പറ്റി നമ്മുടെ മഹാരാജ്യത്തിന് ? എന്ത് പറ്റി ഇന്ത്യയിലെ ജനങ്ങൾക്ക് ? ഇവിടെ ബുദ്ധിജീവികൾ ? എവിടെ ഉശിരുള്ള പത്ര പ്രവർത്തകർ ? എവിടെ ചങ്കൂറ്റമുള്ള ബ്ലോഗെഴുത്തുകാർ ? എവിടെ നന്മയുള്ള കാർട്ടൂണിസ്റ്റുകൾ ? എവിടെ ട്രോളർമാർ ?

നമ്മുക്ക് നാമേ പണിവത് നാകം..

പാക്കിസ്ഥാൻ പ്രധാനമന്ത്രി ഇമ്രാൻഖാൻ പറഞ്ഞത് ഓർക്കുന്നു : ''ഇന്ത്യയിൽ ഈ തിരഞ്ഞെടുപ്പിൽ (2019 ) മോഡിജി തന്നെ വീണ്ടും അധികാരത്തിൽ എത്തണം , കാരണം നമ്മുടെ പണി കുറച്ചു കുറഞ്ഞു കിട്ടും '' . ശരിയാണ് ഇന്നത്തെ ഇന്ത്യയെ നശിപ്പിക്കുന്നത് എതിരാളികളായ പാകിസ്ഥാനോ ചൈനയോ അല്ല . അതൊക്കെ ഭരണാധികാരികൾ വളരെ ഭംഗിയായി നിർവഹിക്കുമ്പോൾ നമ്മുക്ക് നാമേ പണിവത് നാകം നരകവുമതുപോലെ എന്നത് യാഥാർഥ്യമാവുന്നു .

ഉപദേശകരാൽ തള്ളിമറിക്കുന്ന മുഖ്യമന്ത്രി

ഇനി അടുത്ത തള്ളിന്റെ ആസ്ഥാനമായ കേരളത്തിലേക്ക് കടക്കാം . ദൈവത്തിന്റെ സ്വന്തം തള്ളായ കേരളത്തിന്റെ ഇന്നത്തെ അവസ്ഥ അതിദയനീയമാണ് . ഉപദേശകരാൽ തള്ളിമറിക്കുന്ന ഒരു മുഖ്യമന്ത്രി ഭരിക്കുന്ന നാട്ടിൽ നടക്കുന്ന ചിലതൊക്കെ കാണുമ്പോള്‍  വിഷമിക്കുവാനേ നിർവാഹമുള്ളൂ .

നാടിന്റെ പ്രധാന വരുമാന സ്രോതസ്സായ പ്രവാസികളുടെ കരച്ചിലുകൾ കാണുവാൻ ഇവിടെ ആർക്കും സമയമില്ല . ഓണത്തിന്നിടക്ക് പുട്ടുകച്ചവടം പോലെ ചില ഊഹക്കച്ചവടക്കാർ സ്വന്തം നാടിന്റെ ഡാറ്റാബേസുകൾ അടിച്ചുമാറ്റി വിദേശ കമ്പനികൾക്ക് വിൽക്കുവാൻ ശ്രമിക്കുമ്പോൾ അവരൊക്കെ കൂട്ടുപിടിക്കുന്നത് ഉന്നതങ്ങളിലെ സ്വാധീനശക്തികളിലും രക്തബന്ധങ്ങളിലൂടെയുമൊക്കെയാണ് .

കയ്ച്ചിട്ട് ഇറക്കുവാനോ മധുരിച്ചിട്ട് തുപ്പാനോ പറ്റാത്ത അവസ്ഥകളിലേക്ക് ഭരണാധികാരികളെ സ്വാധീനിക്കുമ്പോൾ വര്ഷങ്ങളോളം അവരുണ്ടാക്കിയെടുത്ത സൽപ്പേരുകൾ ചീട്ടുകൊട്ടാരം പോലെ തകർന്നുപോകുകയാണ് .

മുഖ്യമന്ത്രീയുടെ വീട്ടിലെ അരമനരഹസ്യമാണ് സ്പ്രിംഗ്ളറിലൂടെ അങ്ങാടിപ്പാട്ടായി മാറിയത് . സംസ്ഥാനം അതിഭയാനകമായ സാമ്പത്തിക ബുദ്ധിമുട്ടിലൂടെ ഇഴഞ്ഞു നീങ്ങുമ്പോൾ , സംസ്ഥാനത്തിന്റെ നെടുംതൂണുകളായ പ്രവാസികൾ നാട് അണയുവാൻ കഷ്ടപ്പെടുമ്പോൾ ഭരണാധികാരികൾ അടുത്ത പഞ്ചായത്ത് തിരഞ്ഞെടുപ്പിനുള്ള കളികളിൽ മുഴുകിയിരിക്കുകയാണ് .

ഇപ്പോഴൊന്നും ഒരു പഞ്ചായത്ത് തിരഞ്ഞടുപ്പ് നടത്താനൊന്നും ജനങ്ങൾ സമ്മതിക്കരുത് . ആദ്യം കരുതൽ പിന്നീടാകാം കരുത്തു കാണിക്കൽ .

തള്ള് തള്ള് തള്ള് തള്ള് തല്ലിപ്പൊളി വണ്ടിയെന്ന ഗാനവുമായി ജനങ്ങൾ ഒന്നടങ്കം ഈ വക തള്ള് നേതാക്കളുടെ കഴുത്തിൽ

ചെരുപ്പുമാലകൾ അണിയിച്ചുകൊണ്ട് റോഡിലൂടെ നടത്താതിരിക്കട്ടെ എന്ന് മാത്രം പ്രാർത്ഥിച്ചുകൊണ്ട് ,

ന്യുസിലാൻഡിന്റെ പ്രധാനമന്ത്രിയെയും കാനഡയുടെ പ്രധാനമന്ത്രിയെയും സ്തുതിച്ചുകൊണ്ട് ദാസനും

ചൈനക്കാർ മേലാൽ തള്ളുകളുമായി റോട്ടിലിറങ്ങിയാൽ കാലുകൾ തല്ലിയൊടിക്കുമെന്ന് പറഞ്ഞുകൊണ്ട് വിജയനും